YESAYA 52 - Alkitab Singog In Mongondow Masa In Tanaa

Ki Allah in mopoḷuatbí kon Yerusalem

¹ Pobangondon, ei Yerusalem, pobangondon! Korigon in ginamu! Paké in ḷambung kahoromatanmu! Ei Yerusalem, kotá inta motusi, intau nonajis in diá bidon tumuot mongin bonawangmu.

² Sindogdon nongkon ḷobud, ei Yerusalem, ponopirdon in ḷobud inta noikompit kon inimu. Ḷuatdon in rante inta pinotokig kon sigogowmu, ei intau in Sion inta dinakop!

³ Ki Tuhan in noguman kon umat-Nea, “Moiko in pinotaḷui mako natua, dá tanaa in poḷuaton doman mako natua.

⁴ Koḻipod in moiko minayá in Mesir bo nogutun kon tua nobaḻí intau ango-angoi. Onda intua Asyur nogamá kon kapunyaanmu takin diá in kinodoyonannea.

⁵ Tanaa onu in urusan-Ku kon naa? Intau in Babel nodakop kon i monimu natua mako. Mosia inta nondorot kon i monimu dinumodia bo tantú mopoompámai kon i-Nakó.

⁶ Tuamai in moiko in mongakubí kon Akuoi in Allah, bo kon dodai intua kotaauandon monimu kon Akuoibí inta nosingog kon inimu.”

⁷ Totuu mosanang in mokoontong kon koangoian in totabá, Sia in mayá mongin buḷud bo modia kon habar mopia habar kobiagan mopia, habar kasaḷamatan kon Sion, kainia, “Allahmu in Datu!”

⁸ Indongogaidon in kokow pia in gina in moḷoḷukad in kotá, mosia in morogiow moyotakin! Sin mata monia tontaní in nokoontong kon ki Tuhan in namangoi bui in Sion.

⁹ Porogiowdon, ei rumbun mita in Yerusalem, sin ki Tuhan in noḻipoi kon umat-Nea bo nopoḷuat kon Yerusalem.

¹⁰ Ki Tuhan in nopoontong in kawasa-Nea kon tayowon in mata in bayongan intau. Dá bayongan butá in mokoontongdon kon kasaḷamatan nongkon i Allah naton.

¹¹ Bayádon! Taḷaaidon in kotá in Babel, ei moiko inta nodia kon pakakat mita in Baḷoi i Allah! Dikadon moḻiai kon pakakat inta nonajis: potusidon in awakmu kon dodai in diápa mobuat.

¹² Moiko in diábí ḻimika-ḻikat in mayá, bo diábí ná intau inta moḷagui. Sin ki Tuhan in modiabí kon i monimu: ki Allah in Israel in mogoḻiungbí kon i monimu nongkon bayongan tampat.

Mogogundoi inta nobaba kon roriga

¹³ Ki Tuhan in noguman, “Totuubí, mogogundoi-Ku in mokodapotbí kon aidannea; sia in horomatonbí bo poḷantudon.

¹⁴ Dungkuḷmai nobayong in intau in noitaḻikokog in nokoontong kon inia, pogotnea in pinoguyaat dá deemandon ná pogot in intau.

¹⁵ Táe tanaa nobayong in bangusa in binaḻínea nongoherang, datu mita nongobió popisí in noitongau. Mosia in mokoontong bo momangaḻe, inta dungkuḷmai diá kinotaauan monia.”