YESAYA 45 - Alkitab Singog In Mongondow Masa In Tanaa

Ki Tuhan noduí kon i Kores

¹ Ki Tuhan in nomiḻídon kon i Kores nobaḻí datu; sia in sinundú sin monaḷow kon bangusa mita bo momutoḷ kon kawasa in datu mita. Ki Tuhan in momukatbí kon bonawang mita in kotá tuotannea, diábí tobatúmai in pomayá mako moiḻingkop. Ki Tuhan in moguman kon inia,

² “Akuoi in moposadiabí in daḷan bayáanmu; buḷud bo tombuḷudnea in tondodaion-Kubí, ḷoḻingkop mita tambaga in tokobotakon-Kubí, bonoboi mita uatoi putoḷon-Ku.

³ Dá iko in ogoian-Ku kapunyaan kaoyúonan inta noibuni, sinbá kotaauanmu kon Akuoibí naa in ki Tuhan, Allah in Israel, inta ain nogoiní kon inimu podudui in tangoimu.

⁴ Iko in inoiní-Ku bo inogoian-Ku in donoi, umpakabí diá kinotaauanmu in Akuoi. Potabá-Ku in iko motuḷung kon Israel mogogundoi-Ku, sin mosia in bangusa inta piniḻí-Ku.

⁵ Akuoibí naa in Tuhan, diábí in ibanea mako, Akuoi in Allah inta diá in toḻinduanea. Iko in ain sinon pakakatan-Ku, umpakabí diá kinotaauanmu in Akuoi.

⁶ Tua komintan in inaidan-Ku sinbá nongkon dotá pomukaan modapot kon dotá in toyopan bayongan in intau monotaau kon Akuoibí in Tuhan, diábí in ilah koḻikudbí in Akuoi.

⁷ Akuoibí in nomia kon bayag bo sindip, Akuoi in mopoangoi in barakat bo bodito. Akuoi in ki Tuhan inta nogaid kon tua mita.

⁸ Nongkon ḷangit pinoonag-Ku in kauntungan naonda bo uyan, butá noibog in notarima kon tua, bo nopomuká in kasaḷamatan bo kabebasan; Akuoi ki Tuhan inta nopobaḻí intua.”

Ki Tuhan mongongawasa in dunia bo inta nonompia kon onu inta mobaḻí

⁹ Moboditodon in intau inta mobobayowan takin i Inta nomaḻí kon inia; sia in naonda bo kuyon inta moḷawang kon intau inta nomia kon inia. Eta degá ḷamentong moḻibó kon mogogaid kon kuyon, “Koyogot mongonu in iko?” Degá kuyon mogamui kon inta nogaid kon inia in diá motaau?

¹⁰ Moboditodon in intau inta moguman kon guranganea, “Nongonu sin akuoi in pinononggadíbí nanaa?”

¹¹ Ki Tuhan, Allah mokudus in Israel noguman, “Poḻibódon kon i-Nakó in soaḷ kobiagan moiduduimai. Táe dika moḻibó soaḷ adí-Ku mita, andeka mokiaid in onuka kon i-Nakó.

¹² Akuoibí in ki Tuhan inta nomia kon butá, bo inta nomaḻí kon intau sin mogutun kon tua. Pinodoyon kon kawasa-Ku Akuoi in nosongká kon ḷangit, bo nomarenta kon mata in singgai, buḷan bo tundi mita.

¹³ Akuoibí inta noḻiai kon gina i Kores kon mogaid kon makusud-Ku bo moposindog in koadilan. Akuoi in monondodaibí kon bayongan in daḷan inta kotaḻibannea. Sia in buibí moposindog in kotá-Ku Yerusalem bo mopoḷuat in umat-Ku inta dinakop, takin diábí in sogó bo tondannea.” Ki Tuhan Inta Totok in mokawasa ain noguman.

¹⁴ Ki Tuhan in noguman kon Israel, “Baḻíbí iko in kitogi bungai in pinomuḷa kon butá in Mesir bo kauntungan in Sudan. Intau mita in Syeba inta mongotorindog nobaḻí kapunyaanmu; mosia in dumuduianmai kon tumimu takin inumantungan. Mosia in tumungkudbí bo mongaku, ‘Ki Allah in totu-totuubí kon yua-yuakmu; diábí in ilah koḻikudbí in Sia!

¹⁵ Ki Allah inta noposaḷamat kon Israel in ki Allahbí inta nogadop.

¹⁶ Bayongan in intau inta nogaid kon patong berhala; in pokopooyáanbímai bo singkuḻeon.

¹⁷ Táe Israel in pinosaḷamat i Tuhan; kasaḷamatannea in motantúbí. Moiko in diábí pokopooyáanmai bo singkuḻeon modapot in mononoi.’ ”

¹⁸ Ki Tuhanbí in inta nomaḻí kon ḷangit, Siabí in ki Allah! Siabí inta nomia bo nogaid kon butá, binaḻí noroton bo tantú noisindog mako. Diábí binaḻí-Nea tampat inta noingongow, táe tampatbí inta pogutunan. Siabí inta noguman, “Akuoibí in Tuhan bo diábí in ibanea mako.

¹⁹ Akuoi in diábí tongá umuni-uni in mosingog, andeka tongá bunion kon intau ibanea. Akuoi in diábí nopotabá kon umat-Ku Israel motayak kon i-Nakó takin diá in mangaḻenea. Akuoi, ki Tuhan, mosingog kon inta banar, bo mopotaau kon onu inta totuu.”

Ki Tuhan inta Totok in mokawasa bo dewa mita in Babel

²⁰ Ki Tuhan in noguman, “Poyosipundon bo angoidon moyotakin, moiko komintan inta nosaḷamat kon sigad in bangusa mita! Bodokdon in intau mita inta nongurig kon patong kayu, bo nosambayang kon dewa mita inta diá mokoposaḷamat.

²¹ Pongadu in pelekaramu, poontong in buktinea mita, oo, biódon mako in mosia moyopakat moyotakin. Ki ine in nopotaau intua bo nopotaau intua nongkon dungkuḷmai? Akuoibí naa, ki Tuhan? Diábí in ilah koḻikudbí in Akuoi. Akuoibí in Allah inta moadil bo Mopoposaḷamat, diábí in ibanea mako koḻikudbí in Akuoi!

²² Ei, bayongan intau kon dunia, angoidon kon i-Nakó sinbá moiko in posaḷamaton, sin tongábí Akuoi in Allah, diábí in ibanea!

²³ Akuoi in ain nodandi, bo dandi-Ku in diábí motaau inggamáan; podoyon kon i-Nakó tontaní Akuoi in mongibot: Pomuḷoi in intau in tumungkudbí kon tayowon-Ku, bo kon bonu in tosingogonnea tontaní modandi kon mosatia kon i-Nakó.

²⁴ Intau mita inta noguman, ‘Koadilan bo ropot in tongábí nongkon i Tuhan!’ Bayongan in intau inta doí kon i-Nakó in mamangoibí kon i-Nakó bo mooyá.

²⁵ Táe buí i Yakub in posaḷamatonbí, bo mosia in modayowbí kon i-Nakó, ki Tuhan.