YESAYA 42 - Alkitab Singog In Mongondow Masa In Tanaa

Mogogundoi i Tuhan

¹ Guman i Tuhan, “Naa in mogogundoi-Ku inta binaba-Ku, intau inta piniḻí-Ku inta mokosanang kon gina-Ku. Akuoi ain nobogoi in kawasa-Ku kon inia, sin modia kon koadilan kon batúan in bangusa.

² Sia in diábí kumarak andeka momaḷú moropot, singognea in diábí kodongogan kon daḷan.

³ Aog inta noikoḷungdon diábí putoḷannea, togá inta nokuyoyowdon diábí piongannea. Takin satia in sia in moponiata kon inta totuu,

⁴ Diá in gagawang andeka kobuḻian in kamang, modapot in inta moadil in posindogon kon dunia. Ḻipú mita inta moyayú mokotanob kon totundúnea.”

⁵ Ki Tuhan Allah in nomaḻí bo nosongká kon ḷangit; Sia in nomia kon butá bo bayongan inta nobiag kon tudunea. Sia in nobogoi kon intau in poginaan kobiagan bo nyawa. Sia in nopotaau in koyow tanaa kon mogogundoi-Nea mita,

⁶ “Akuoi, ki Tuhan, in mogoiní bo mopotabá kon inimu sin mopobayá in inta moadil iko in kapiton-Ku bo ḷukadan-Ku sin mobaḻí dodandian kon umat intau, bo sindar kon bayongan in bangusa.

⁷ Sin mobuká kon mata in intau bilog, bo mopoḷuat kon intau nongkon sindip in ponjara.

⁸ Akuoibí in ki Tuhan, tuata in tangoi-Ku; Koagungan-Ku in diábí ogoi-Ku kon i ineka; Tangoi-Ku inta ponango-nangoian in diábí ogoi-Ku kon patong.

⁹ Tanaa in inta sinoḻindap-Ku in noniatadon; Akuoi in moibog mopotaau in onu inta mobagu; kon dodai intua diápa mobaḻí, aindon muna pinoguman-Ku kon inimu.”

Dondong dodayow

¹⁰ Podondong in dondong mobagu kon i Tuhan, dayowdon in Sia ei sinangkub in dunia! Ponggonugurdon, ei dagat bo bayongan in tombonunea, ḻipú mita inta moyayú bo bayongan in intau inta nogutun kon tua!

¹¹ Pomayádon mako in padang gurun bo kotánea mita in modayow kon i Tuhan, bo intau in Kedar modayow kon i-Nia! Porogiowdon in intau mita kon kotá in Sela, bo morobaḷú nongkon tudu totok in buḷud!

¹² Yo mosia in mohoromatdon kon i Tuhan, bo mopotaaudon in tangoi-Nea kon ḻipú mita moyayú.

¹³ Ki Tuhan in mayá in muna moparang naonda bo pahlawan tobatú, naonda bo tontara tobatú inta moibog totok moparang. Sia in modidí in kokow in parang, bo mopoontong in kotoyang-Nea kon musung.

Ki Allah in nodandi motuḷung kon umat-Nea

¹⁴ Ki Allah in noguman, “Noonggotdon in Akuoi in diá moposingo-singog; kibio-biómai in Akuoi bo nonahang kon gina. Tanaa in wakutuneadon akuoi mogaid kon oaidan-Ku, Kumarak in Akuoi naonda bo bobay inta mononggadí.

¹⁵ Buḷud bo tombuḷudnea in baḻíon-Ku moḷogat, bayongan in pinomuḷanea iḷaḷowan-Ku. Ḷopá mita in ongkag binaḷuian-Ku nobaḻí padang gurun, Bayongan in danow iningkagan-Ku.

¹⁶ Bangusa-Ku inta bilog in kapiton-Ku pongin daḷan inta diá kinotaauan monia; mosia in diaan-Ku kon daḷan mita inta diá kinotaauan monia. Sindip baḻíon-Ku bayag kon i monia, bo daḷan inta notangkaḻembong in tondodaion-Ku. Tuata in aidan-Ku kon i monia, bo notantú bidon kon aidan-Ku.

¹⁷ Intau inta mopirisaya kon patong berhala bo akúon monia nobaḻí ilah monia, in poompáanmai bo pokopooyáanmai.”

Israel doí tundúon

¹⁸ Ki Tuhan in noguman, “Indongogaidon ei intau mita bongoḷ! Indoiaidon, ei intau mita bilog!

¹⁹ Ki ine degá in mobilo-bilog nongkon Israel mogogundoi-Ku? Ki ine degá in mobongom-bongoḷ nongkon totabá-Ku?

²⁰ Israel, nobayong in inontongmu, táe diá sinaridianmumai, bongoḷanmu in nobuká, táe iko in diá nokidongog.”

²¹ Ki Tuhan in moibog moposaḷamat; Ibogon-Nea hukum-Nea in horomaton bo untuon.

²² Táe bangusa tatua in nodaitdon inagow; mosia in dinakop kon bonu in yuang mita kon bonu in butá, bo binuni kon bonu in ponjara mita mosia in nobaḻí kuruban pinogagowan, bo diá in namangoi notuḷung.

²³ Ki ine in kon sigad monimu in moibog mokidongog kon tanaa, bo monaridi kon singgai moiduduimai?

²⁴ Ki ine in nokiagow kon Israel? Ki Tuhanbí tontaní! Kita naa in binaradosa kon i-Nia, Kita in diá nobiag podudui in parenta-Nea, bo diá dinumudui kon totundú-Nea.

²⁵ Dá binaḻí-Nea in kita notarima kon torú-Nea inta motoyang, bo nororiga popisí in parang inta motoyang. Torú-Nea nomokak kon Israel naonda bo tuḷú, táe diá kinotaauan naton, bo diá nobalajar nongkon onu inta ain kinorasaan naton.