YESAYA 32 - Alkitab Singog In Mongondow Masa In Tanaa

Datu inta moadil

¹ Indoiaidon, moiangoibí in wakutunea datu tobatú momarenta moadil bo itoi mita in bangusa mopobayá in inta moadil.

² Kon batúannea mosia in naonda bo tampat pogogadopan kon tompot bo deḷang. Mosia in naonda bo ongkag inta moiḻig kon rawang in bungaion, naonda bo batu moḷoben pononiungan kon butá inta noḷogatdon.

³ Intau inta mokoontong in diábí momilog, bo inta mokodongog in monaridi.

⁴ Intau inta dungkuḷmai morogi in mobaḷui bidon mosabar bo momangaḻedon totok. Intau inta motapoḷ in dilá in mokosingogdon mosilang.

⁵ Intau bodok in diá bidon anggapon intau ihoromat, bo intau mouboḷ in diá bidon tangoion motuḻid.

⁶ Intau bodok mosingog kon tosingogon inta mobodok bo monomayá kon inta moraat. Onukabí in aidan andeka inta singogonnea in nobaḻí bidon singkuḻe kon i Allah. Diábí kon dodai in onda in sia mobogoi in kaanon kon intau inta gogoyon andeka oinumon kon intau inta morogang.

⁷ Bo intau mouboḷ morai bo mogaid kon onu inta moraat. Sia in motayak kon daya sin mopobodito kon intau bogá pongin tosingogon mita inta uboḷ bo moḷamboi kon i monia mokouḻí kon haknea.

⁸ Táe intau inta motuḻid in ginanea monomayá kon soaḷ mita inta mopia bo mogaid kon inta mopia doman.

Ponisigan bo ponompiaan

⁹ Indongogaidon, ei bobay mita inta mobiag mosanang, noiḷuat nongkon inta mororiga!

¹⁰ Tanaa moiko mokorasa kon moaman, táe degá totaongpamai moiko in kobuḻiandon in kamang, sin bungai mita in anggur mogoguyaat, bo bungai in boyó ibanea in diá domandon.

¹¹ Nodapot in tanaa mako moiko in nobiagpa nosanang noiḷuat nongkon roriga. Táe tanaa, mourotdon sin moondok! Ḷongkutdon in ḷambungmu bo pogibingkoḷotdon in bintoḷ ponogumatoian.

¹² Ombaḷaidon in gobámu mita inta moḷumbá bo gobá mita in anggurmu inta mobayong totok in bungainea,

¹³ sin butá in bangusaku kinobiagan in mainggoa bo bonganga. Oo, ombaḷaidon in baḷoimu mita tampat pobobarasanangan in intau bo kotá inta nopuḻing in rame!

¹⁴ Nodapot in komaḻig in taḷaan bo ki iná in kotá inta morame mobaḻídon moingongow. Buḷud bo ḷangkeang mita poḷoḷukadan sinondodaidon in butá modapot in mononoi. Keledai mita ḻindong bo domba mita in modondaḷoi magí mako kon tua bo mokaan kon bonok kon tua.

¹⁵ Táe komintanpa doman ki Allah in mamangoibí takin kawasa-Nea. Dá padang gurun in mobaḻídon gobá mita inta moḷumbá, bo gobá mita in mobaḻídon naonda bo kayuon.

¹⁶ Kon sinangkub in butá in mobaḻí bidon in aid mojujur bo moadil.

¹⁷ Kon batúan in intau in mogaidbí kon onu in moitutui, dá oyúon in kobiagan motompia bo moonow modapot in mononoi.

¹⁸ Umat i Allah in moiḷuatbí nongkon roriga bo mobiag kon tampat inta moaman bo mopia.

^19-20 Totuu mosanang in moiko komintan sin tugat in tubig kon pinomuḷamu, bo bobiagonmu in kon ondakabí in bayáannea pongaanan takin diá in monuyayow. Táe musungmu in nádon onda bo kayuon inta inonag in uyan batu bo kotá monia in rumbunon.