YESAYA 3 - Alkitab Singog In Mongondow Masa In Tanaa

Kodoḻiokan kon Yerusalem

¹ Totuubí, ki Tuhan Inta Mokawasa Totok in mogamábí nongkon Yerusalem bo Yohuda in bayongan tongkaaḷ in kaanon bo inumon. Intau mita doman inta pongatamai monia:

² pahlawan mita bo tontara, hakim, nabi, mononoḷanow bo monononggina,

³ porwira, itoi mita bo intau moḷoben, mososihir bo mogogoiní kon dimukud.

⁴ Ki Tuhan in moduíbí kon tayow mobiag mita mobaḻí itoi in rayat, bo mosia in momarenta podudui in ibog monia.

⁵ Intau mita mosidorotandon. Intau moguod mopoompámai kon guranga, bo intau diá kopangkat mopoompámai kon intau moḷoben.

⁶ Kon dodai intua intau in motundú kon i utatnea tobatú bo moguman kon inia, “Tongábí iko in koḷambung inta mopia; tuamai in ikodon in mobaḻí itoi nami kon sempo inta nopuḻing in roriga tanaa.”

⁷ Táe sia in motubagbí, “Akuoi in deemanbí mongongundam! Akuoi in diá doman kokaanon bo diá doman koḷambung. Dikabí baḻíon in akuoi itoi in bangusa!”

⁸ Totuu, Yerusalem ain noḷabú! Yohuda ain noumpag! Popisí in bayongan tosingogon bo oaid monia moḷawang kon i Tuhan bo monontot kon kawasa-Nea.

⁹ Dodia monia inta moḷoḷatú moponiata kon aid monia inta moraat. Koonto-ontong mako mosia in mogaid kon dosa naonda bo intau in Sodom dungkuḷmai. Mobodito in mosia! Mosia in mopoangoi in bodito kon i monia tontaní.

¹⁰ Ki Tuhan in noguman, “Poyaputdon kon intau inta motoindudui kon i-Nakó kon mosia in mopiabí bo mosaḷamat. Mosia in mokaanbí kon bungai in siniḷopíannea.

¹¹ Táe moboditodon in intau moraat! Mosia in pomiaanbí ná pinogogaid monia kon intau ibanea.

¹² Umat-Ku in rorigaanbí in intau mopopoḷuan in doit bo daiton gamáan in mopoporente. Umat-Ku in poḷaḻeon in itoinea mita modapot in diádon kotaauannea in daḷan inta musti bayáannea.”

Ki Tuhan in monisig kon umat-Nea

¹³ Ki Tuhan in taḷaoḷatdon sin mogugat bo monisig kon umat-Nea.

¹⁴ Ki Tuhan in mobaḻí hakim kon itoi mita in umat-Nea. Naa in ponapud i Tuhan kon i monia: “Moiko inta nogagow kon bungai in anggur kon gobá mita; baḷoimu nopuḻing in pakakat inta inagow monimu kon intau bogá.

¹⁵ Nongonu sin moiko in mondorotbí kon umat-ku bo momakisa mogamá kon kapunyaan in intau bogá? Akuoi, ki Tuhan Inta Totok in moḷantud bo Totok in mokawasa ain noguman.”

Toingat kon bobay mita in Yerusalem

¹⁶ Ki Tuhan in noguman, “Moḷoḷatú totok in bobay mita in Yerusalem! Mosoing in mosia, moibog monilok bo mododia in bobayá monia. Ḷampangnea in ai-aidan, bo toninsing in singog in galang mita in sioḷnea.

¹⁷ Táe Akuoi in mohukumbí kon i monia; uḷu monia in mopuḻingbí in paḻí bo ḷogatan.”

¹⁸ Moiangoibí in wakutunea ki Tuhan in mogamá nongkon bobay mita in Yerusalem in bayongan ḷambá inta poyunggagá monia: bongkow in uḷu, galang in sioḷ, boboḷ,

¹⁹ ḻingkit, cadar,

²⁰ koḷubung, bongkoḷ mita kon kokaḷ bo kon ogotan,

²¹ sising bo nganti-nganting in ngiung,

²² ḷambung in rame inta mongo gaga mita, mantel, dompet,

²³ ḷambung monipit, ḷambung linen, aḷuang bo koḷubung mobanat.

²⁴ Tanaa in mosia mopomaké in mongo bo mongobondu, moiduduimai mobongkogdon in bó monia. Togot in ogotan monia inta moaḷus baḷuianbí in uwoi inta mokasar. Buok in uḷu monia inta mogaga in bangkuḷuganbí. Ḷambung monia inta mongopia toḻiuanbí in inta nongoberak. Tanaa moḷunat in mosia; kon singgai moiduduimai pogot monia in diá mopia popisí in dinaḷóan.

²⁵ Ḷoḷaki, inta mongoropot mita, in matoi kon poparangan.

²⁶ Kon bonawang mita in kotá intau in mononogumatoi bo mogamui, bo kotá tatua tontaní in naonda bo bobay inta pinilangan inta iḻimitú kon butá.