YESAYA 28 - Alkitab Singog In Mongondow Masa In Tanaa

Tompoingat kon Dodatuan Utuan

¹ Moboditodon in kotá inta kino ibo-ibog in intau mita moḷoḷoḷangu in Israel! Kogaganea in mopopatdon naonda bo bungang inta noḷaḷow kon tudu in uḷu monia. Moboditodon in kotá inta noḷantud monik kon yuak in ḷopá inta noḷumbá, inta kinosanang in intau mita inta nongoḷoḷangudon totok.

² Ki Tuhan in mopotabábí mangoi kon intau tobatú inta moropot bo motorindog. Koangoinea in naonda bo deḷang kotaki-takin in uyan eis, naonda bo uyan morogot bo ḷunud inta mokoiḻig. Pongin ropotnea pogambatnea in mosia kon butá.

³ Onu inta totok in kinoibog in itoi mita inta nongoḷoḷangu tatua in ritakan.

⁴ Kotá monia inta totok in ponango-nangoian tua in momangkoidon moinggamá. Ukurnea in nádon onda bo ukur in bungai in ara inta noḷutú kon dodai in deemanpa wakutunea; naonda in inontong, bayá-bayádon sinipú bo kinaan.

⁵ Ki Tuhan Inta Totok in mokawasa in mobaḻí karangan in bungang inta mogaga kon ki agat in umat-Nea.

⁶ Ki Tuhan in mobogoibí in aid moadil kon hakim mita, bo barani kon intau mita inta pinoki ḷukadan in kotá bá diá tubuon.

Ki Yesaya bo nabi mita in Yohuda inta noḷoḷangu

⁷ Nabi mita doman bo imang mita in noḷoḷangu popisí in noiḻiudon bayong in anggur bo arak in ininum. Moibambodon in mosia in mayá bo moipintudon magí-mako sin notombaukdon in raian monia. Nabi mita in diádon momangaḻe kon oontongon mita inta inogoi i Allah kon i monia. Imang mita diádon motaau mopoyotutui kon pelekara mita inta kon tayowon monia.

⁸ Meja monia in nopuḻingdon in totuka, nodapot in diádon in tampat modarit.

⁹ Mosia in moguman nanaa kon inakó, kainia, “Kai niamai sia in motundúbí kon i ine? Ki inepabí doman in moparaḷu kon tosingogonnea? Kai niakamai kita naa in mongoadíbí mointok inta bagu inungkak kon teté?

¹⁰ Umpaka yo sia in motundúbí kon i naton kon bayongan in hurup, tosingogon mita bo onu mita in singogon.”

¹¹ Aka moiko doí mokidongog kon inakó, dá ki Tuhan in mopotabádon mangoi in intau ango-angoi sin motundú kon i monimu podoyon kon ḻegú bo tosingogon inta diá komangaḻean.

¹² Ki Tuhan nokipiḻí in tampat pogogaian kon i monimu komintan, táe moiko in doí mokidongog kon i-Nia.

¹³ Tuamai in ki Tuhan notundú kon i monimu pinangkoi kon hurup mita, tosingogon bo onu in singogon. Bo kon tungkuḷ in minayá moiko noḷabú noiboḻingkayang nodapot in kinekeban, noibaaḷ bo kinodomokan.

Batu orotan kon Sion

¹⁴ Indongogaidon onu inta pinoguman i Tuhan, ei mononingkuḻe mita inta nomarenta kon rayat kon Yerusalem!

¹⁵ Moiko in noguman kon moiko ain nomia kon dodandian takin popatoi bo ain nomia kon yopakat takin dunia in intau minatoi. Notantúdon kon i monimu kon bodito inta moiduduimai in diábí moiantug kon inimu, sin moiko in momaké in akaḷ monimu pogoḻingoi kon awakmu.

¹⁶ Tuamai, ki Tuhan Inta Totok in moḷantud noguman nanaa, “Akuoi in mogukat kon dodoyonan inta moropot bo motorindog kon Sion; batu orotan tobatú inta moḷoben in mangaḻenea inta pinaisan: ‘Ki ine in morigon in pirisayanea, diábí umundok popisí in taḷowon.’

¹⁷ Koadilan baḻíon-Ku tontogot pogogukur, bo gina motuḻid baḻíon-Ku tontogot ponigad.” Uyan batu in mobundur mokopodarit kon bayongan in uboḷ inta pongata monimu. Ḷunud in mogiḻigbí kon pogogadopanmu.

¹⁸ Dodandianmu takin popatoi bo yopakatmu takin dunia in intau minatoi in popatandon, dá aka bodito moiangoi, moiko in morimumud ritakan magí-mako.

¹⁹ Moiko in umuran koantugan in bodito bo musti mobaba kon tua pomuḷoi in singgai, doḷo-doḷom, moutu in singgai bo doḷom. Moiko in mourotbí popisí in ondok aka komangaḻean monimu in koyow i Allah.

²⁰ Moiko in naonda bo intau inta moibog mosiug kon ḷantaan inta diá tugat popouḻidan in awak. Daingnea in diá tugat pongoḷob kon awakmu.

²¹ Ki Tuhan in simindogbí ná kon Buḷud in Perazim. Sia in moḷongasibí totok ná kon Ḷopá in Gibeon sin mopobayá in makusud-Nea, makusud inta mokoherang kon intau! Sia in moponiatabí in oaidan-Nea inta mokoherang.

²² Dinongog-Kudon in singog inta sinantú i Allah Inta Totok in moḷantud bo Inta Totok in mokawasa sin moyopú kon sinangkub in butá. Dika momayow kon tosingogon mita tompoingat inta pinoguman-Ku tanaa. Sin mokodugang kon rorigamu in moposaḷamat in awak!

Kobobijaksana i Allah

²³ Indongogaipa in tosingogonku mita, tondudutka in koyowku.

²⁴ Intau monononggobá tobatú diábí tongá umuran momajeko, momasoḷ bo mongarug kon butánea sin bunakan.

²⁵ Aka nosadiadon in butánea, bunakanneadon, ná jintan morondí bo jintan mobudó. Sia in momuḷa kon doyowa norupa in gandum poyopipidon, bo kon sínea in pinomuḷa ibanea.

²⁶ Kinotaauannea naonda in pogogaid kon tua, sin ain sinundú i Allahnea.

²⁷ Sia in diábí momaké in ḷoḻintog sin moḻintog kon jintan morondí andeka bola in roda sin pogiḻing kon jintan mobudó. Pinakéneabí in bobobak inta mogaan.

²⁸ Kon dodai in moḻintog kon gandum, diábí tantú bobakannea modapot in morimumud. Diábí! Kinotaauanneabí in poḷoḻintog moitutui inta poḷat tumakoi kon roda kon tudunea tongá diábí morimumud kon batoḷ mita in gandum tatua.

²⁹ Kabijaksanaan tatua in namangoibí nongkon i Tuhan Inta Totok in mokawasa. Bayongan in tomayá i Tuhan mobijaksana bo umuranbí kodapotan.