YESAYA 26 - Alkitab Singog In Mongondow Masa In Tanaa

Ki Allah nopountung kon umat-Nea

¹ Kon dodai intua intau mopodondong in dondong tanaa kon butá in Yohuda “Totuu moroton in kotá naton; ki Allah tontaní in noposindog in benteng-Nea, kon naa mosaḷamat in kita.

² Bukádon in bonawang mita, sinbá tumuot in bangusa inta motoindudui, bangusa inta nogaid kon onu in kinoibog i Allahnea.

³ Tuhan, Iko mobogoi in dodamean bo kobiagan motompia kon intau inta moroton in ginanea, sin mopirisaya in sia kon ini-Mu.

⁴ Umurandon popirisaya kon i Tuhan, sin ki Tuhan Allah tantú moḷukad kon i naton.

⁵ Ki Tuhan mopoonag kon intau inta moḷoḷatú; Sia in morimumud kon kotá monia inta dininding, bo potondodaion-Nea in butá.

⁶ Intau mita bogá bo inta mororiga in moritakbí kon inia.”

⁷ Intau inta motuḻid in gina in mongin daḷan inta motuḻid, sin Iko, Tuhan in nomontang kon daḷan bayáannea.

⁸ Kami in dumudui kon onu inta sinantú-Mu, o Tuhan, bo tantú mogoḷat mako kon ini-Mu; Ikobí in dayowon bo inta tano-tano bo in gina nami.

⁹ Dimukudku in mokotanob kon ini-Mu kon dodai in doḷom, ginaku in mogoḷat mako kon ini-Mu kon dodai in doḷo-doḷom. Aka Iko in monisig kon dunia naa, intau mita kon dunia naa in monotaaudon kon onu inta moitutui.

¹⁰ Umpaka intau moraat pinopoaidan in inta mopia, diábí doman in sia mobalajar kon onu inta mobanar. Kon negara inta oyúon in hukum sia in mopoaidbí doman kon inta motombogá, bo doíbí motarima kon kawasa i Tuhan.

¹¹ Tuhan, Iko in nogoḷatdon mohukum kon musung-Mu mita, táe diábí kinotaauan monia. Pomayádon mako mosia in mooyá in mokoontong kon tabi-Mu kon umat-Mu. Pomayádon mako modait in mosia moyopú pongin hukuman inta ain pinopooḷat-Mu mako kon i monia.

¹² Tuhan, Iko in mopobaḻíbí kon inami mobiag motompia; bayongan inta inaidan nami, Ikobí in nopoaid kon inami.

¹³ Kami in nokoimontandon in kinawasa in tuang mita ibanea, táe tongábí Iko in ináku nami, o Tuhan Allah nami!

¹⁴ Mosia tua in minatoi bidon bo diábí mobiag bui, dimukudnea in diábí mobiag bui. Sin mosia in nodaitdon iyopú-Mu bo pinopatan-Mudon kon bonu in gina.

¹⁵ Binaḻí-Mudon kami umat-Mu nobayong totok, o Tuhan, bo pinooḷad-Mudon in butá nami, tuamai Iko umuran inuntu.

¹⁶ Iko ain nohukum kon i nami; kon bonu in roriga kami in nobui mangoi kon ini-Mu, bo nosambayang kon ini-Mu, Tuhan.

¹⁷ Naonda bo bobay inta mononggadídon monahang kon monakit bo momaḷú sin monakit, natuata in kami kon tayowon-Mu, Tuhan.

¹⁸ Kami in sidia bo monahang kon monakit, táe diábí nopononggadí in onu bo onu; kami in diábí nobogoi in kasaḷamatan kon dunia, diábí doman nodugang kon kobayong in intaunea.

¹⁹ Umat-Mu inta ain minatoi in mobiagbí bui, awak mita monia in mobiagdon bui. Intau inta ain iḷobong kon bonu in butá in mobiagbí bo morogiow. Naonda bo oḷú inta mokoonow kon butá, Iko in momiag kon umat-Mu inta ain noonggot in minatoi.

Ki Tuhan in monisig bo monompia bui

²⁰ Tuotdon kon bonu in baḷoimu, ei bangusaku, bo ḻingkopaidon in ngara. Pogadopdon motoyong modapot in torú i Tuhan mooyongdon.

²¹ Ki Tuhan in moponagbí nongkon tampat-Nea kon soroga sin mohukum kon intau kon dunia sin dosa monia. Pinoḻimodan inta inaidan monia inumado-adop in poniatabí. Butá in diábí momumbun kon intau mita inta minatoi iḻimod.