YESAYA 22 - Alkitab Singog In Mongondow Masa In Tanaa

Toḻindap kon Yerusalem

¹ Naa in koyow kon Ḷopá Oontongon: Ei, intau in Yerusalem, nongonu sin moiko komintan in moponikbí kon tudu in atop in baḷoi?

² Diábí patus in bayongan kotá momia kon rame bo morogiow sanang in gina. Sin pojuangmu mita inta minatoi kon parang tanaa in deemanbí minatoi popisí in noparang.

³ Komintan itoi in tontaramu noḷagui bo dinakop kon tungkuḷ in mosia diápa nokopopiot in piot. Komintan intaumu inta moropot kinodakopan doman umpaka ain noḷagui noyayú.

⁴ Dikadon taridianmu in akuoi; pomayádon mako in akuoi mogamui kon intau mita nongkon bangusaku inta ain minatoi. Dika monungkuḷ moḻipoi kon inakó.

⁵ Totuu, ki Tuhan Inta Totok in moḷantud, bo Inta Totok in mokawasa ain nonantú kon singgai naa nobaḻí singgai kodoḻiokan, kodowawáan bo yogenggeng kon Ḷopá in Oontongon. Dinding mita in kotá ain inumpag. Kuani mokituḷung kodongogandon nodapot kon tombuḷud mita.

⁶ Intau in Siria namangoi kodia-dia in kabaḷo bo kereta in parang, intau in Elam nomaké in puḷu in piot bo piotnea, intau in Kir nosadia kon kaḻeawnea.

⁷ Ḷopá mita inta noḷumbá in Yohuda nopuḻing in kereta in parang. Tontara mita inta sinumakoi kon kabaḷo nosadia kon muna in bonawang mita in Yerusalem.

⁸ Bayongan in poḷoḷukadan in Yohuda norumbun. Kon tungkuḷ intua, moiko monaridi kon pakakat mita in parang kon pototagúan kon ḷoḷutam.

^9-10 Moiko in nokouḻí kon nobayong totok in noḷau kon dinding in kotá in Yerusalem inta paraḷu tompiaan. Moiko in nonaridi kon bayongan in baḷoi kon Yerusalem, nongokai kon tongonumai in kon sigadnea bo nogamá kon batunea sin ponompia kon dinding in kotá. Bo popisí in mosipun kon tubig,

¹¹ moiko in nogaid kon tabang kon bonu in kotá bo nosipun kon tubig nongkon tabang koyongan. Táe moiko in diá nonondudut kon i Allah inta ain noonggot in nonomayá kon tua komintan, bo inta nokopopisí kon tua nobaḻí.

¹² Kon tungkuḷ intua ki Tuhan Inta Totok in moḷantud bo Inta Totok in mokawasa nopotabá kon i monimu nongombaḷ bo nogamui, nongarug kon buok bo nogibintoḷ.

¹³ Táe noyoḻiudon kon tua, moiko in nobarasanang bo norame. Moiko in noratá kon sapi bo domba, nokaan kon ponoyá bo nonginum kon tubig in anggur sindaḷan nomaḷú, “Koḻigai in kita mongaan bo monginum, sin ikoḷom matoi in kita!”

¹⁴ Ki Tuhan Inta Totok in moḷantud bo Inta Totok in mokawasa nokipogontong kon inakó bo noguman, “Totuu, aid monia inta moraat tua in diábí ampungan-Ku modapot in mosia matoi. Akuoi in ki Tuhan, ain nosingog.”

Tompoingat kon Sebna

¹⁵ Ki Tuhan Inta Totok in moḷantud bo Inta Totok in mokawasa nopotabá kon inakó nokipodungkuḷ kon i Sebna, kitogi totaau in tombonu in baḷoi kon komaḻig, sin mopotaau kon inia in koyow i Tuhan tanaa,

¹⁶ “Kainimukamai dá ki inebí in iko naa? Onu in hakmu nodapot in iko nomakang kon poḷoḷobongan kon inimu kon buḷud batu?

^17-18 Oḷatka, ḷumbúon-Ku in iko koyayúon. Iko in tagangan-Ku bo ḻitodon-Ku bo ḻitoion-Ku ná bal pobayá ná ḻipú inta moḷoben. Kon tua iko in matoi kon diug in kereta mita inta pongatamumai. Iko in noporomúmaidon kon tangoi in motoḷuadí i tuangmu.

¹⁹ Tuamai iko in pogogaion-Kudon nongkon oaidanmu bo poponag-Ku nongkon ḷoḻitúanmu inta moḷantud.

²⁰ Kon dodai intua Akuoi in mogoinídon kon mogogundoi-Ku ki Elyakim ki adí i Hilkia.

²¹ Ḷambung in jabatanmu bo togot in ogotanmu popopaké-Kudon kon inia. Bayongan in kawasamu ogoi-Kudon kon inia. Sia in mobaḻídon amá kon intau inta nogutun kon Yerusalem bo Yohuda.

²² Sia in mongawasadon totok kon ḻimonagan in datu inta buí i Daud. Sia in mokadai kon kokunsi in dodatuan. Aka sia in momukat, yo diábí in motaau moḻingkop, bo aka sia in moḻingkop, yo diábí in mokobukat.

²³ Sia in ogoian-Ku in ḷoḻitúan inta moroton naonda bo pakú inta noikeket noropot kon dinding. Bayongan in motoḷuadínea in horomatonbí popisí in sia.

²⁴ Táe ginaḷum takin motoḷuadínea mita kon bonubí in totaaunea. Mosia in tongádon mopoandoḷ mako in kobiagan monia kon inia, naonda bo kuyon pinopobambé kon pakú.

²⁵ Aka tua in mobaḻí, dá pakú inta pinopopakú noropot tua in morabutbí bo moḷabú. Bo tuata in imbuit in inanakan motoḷuadí bo bayongan in intau inta nopoandoḷ in kobiagan kon inia. Akuoi, ki Tuhan, ain nosingog.”