YESAYA 19 - Alkitab Singog In Mongondow Masa In Tanaa

Ki Allah in mohukumbí kon Mesir

¹ Naa in koyow kon Mesir. Ki Tuhan in namangoi in Mesir sinumakoi kon goḷom inta moḻikat. Berhala mita in Mesir gumugur kon tayowon-Nea bo intau mita in Mesir yimintok in gina.

² Ki Tuhan in noguman, “Akuoi in moposindogbí in ropatoi kon motoḷuadí kon Mesir: Utat moyogintayow in utat, topodiug moyogintayow in topodiug, kotá moyogintayow in kotá bo dodatuan moyogintayow in dodatuan.

³ Diábí pobaḻíon-Ku in tomayá mita in Mesir bo momutoḷ kon ibog in gina monia. Mosia in mopoigumbí in totuḷung kon berhala mita, mopoigum kon tonggina bo topotundú kon mongongundam mita bo dimukud mita.

⁴ Mesir in ogoi-Kubí kon ḻima in datu tobatú motamaa inta momarenta kon i monia pongin aid moromú. Akuoi, ki Tuhan Inta Totok in mokawasa, ain nosingog.”

⁵ Tubig in Ongkag in Nil in gimiotbí bo koonggotannea moingkag.

⁶ Got mita in mobódon in bongkog kon dodai in tubignea kodait-kodait. Bumbung bo bonok in moḷaḷowdon.

⁷ Bayongan in pogogamboran kon kinoouput in bingkí in Ongkag in Nil in mobaḻídon moingkag bo poḷayugondon in tompot.

⁸ Mododomok mita kon toyá inta biasamai modomok kon ongkag tatua in momaḷú bo mogamui popisí in kail bo ḷaḷa monia in diádon in mangaḻenea. Mogogaboḷ mita koinggamáandon in kamang;

^9-10 mosia bo intau mita sinokotondanan monia morobonoḷbí in gina bo kodaitandon in ibog.

¹¹ Totuu modondunguḷ in itoi mita in kotá in Zoan! Intau in Mesir inta totok in mobijaksana nobogoi in tonggina inta nobodok! Totuu mobarani mosia in moguman kon datu kon mosia in buí in intau mita mobijak bo datu dungkuḷmai!

¹² Ei, datu in Mesir, kon onda in monononggina i Tuang inta mopandoi tua? Degá kinotaauanbí monia onu inta sinomayá i Tuhan Inta Totok in mokawasa kon intau in Mesir.

¹³ Itoi mita in Zoan bo Mempis in intaubí mita inta dondunguḷ. Mosia in deemanbí mobaḻí itoi, táe mopoḷaḻebí kon bangusanea.

¹⁴ Ki Tuhanbí in nomaḻí kon i monia nobogoi in tonggina inta mokotoboḻingu. Bungainea kon tua, Mesir mongoitaḷádon, bo mongoikuyungdon naonda bo intau noḷoḷangu inta norondog kon totukanea tontaní.

¹⁵ Kon Mesir diábí in intau inta kodayapa, pinomayá pongawasa andeka rayat, pinomayá intau moḷoben andeka intau biasa.

Mesir in mosumbabí kon i Tuhan

¹⁶ Moiangoibí in wakutunea bangusa in Mesir mobaḻí naonda bo bobay inta kakag. Mosia in mogugur popisí in moondok aka mokoontong kon i Tuhan Inta Totok in mokawasa motonggó kon ḻima-Nea sin mohukum kon i monia.

¹⁷ Butá in Yohuda in mobaḻí kodoḻiokan kon intau in Mesir pomuḷoi in mosia popotoropan kon inta sinantú i Tuhan Inta Totok in mokawasa soaḷ mosia.

¹⁸ Kon tungkuḷ in tua singog in Ibrani in pakéonbí kon bonu in ḻima in kotá in Mesir. Intau mita kon tua mongibot podoyon kon tangoi i Tuhan inta Totok in mokawasa. Kotá tobatú kon sigad in kotá tatua in tangoian “Kotá in Mata in singgai”.

¹⁹ Kon tungkuḷ intua kon yuak in butá in Mesir posindogonbí in mezbah tobatú kon i Tuhan, bo kon pinosigadannea in oigi batu tobatú inta sinondí kon i Tuhan.

²⁰ Mezbah bo oigi tatua in nobaḻí lambang koangoian i Tuhan Inta Totok in mokawasa kon Mesir. Aka bangusa tatua doroton, bo mosia in mokuani mopoigum in totuḷung kon i Tuhan, yo potabá-Neabí in intau tobatú sin moposaḷamat kon i monia.

²¹ Ki Tuhan in mokipogontongbí kon bangusa in Mesir, bo mosia in monotaaudon bo mosumba kon i-Nia, poḷat doman modia kon kuruban bo sosumba kon i-Nia. Mosia in mopoyaputbí in dandi kon i-Nia takin mongibot bo mogaid kon tua.

²² Ki Tuhan in momongkugbí kon bangusa in Mesir, táe mopaḷut mako kon tua Sia in mongundambí bui kon i monia. Mosia in mobuibí mangoi kon i Tuhan, bo Sia in mokidongogbí kon sambayang monia poḷat mongundam.

²³ Kon tungkuḷ intua oyúondon in daḷan moḷoben kon sigad in Mesir bo Asyur. Intau mita nongkon ḻipú doyowa tatua in mayá bo mobuibí mongin daḷan tatua bo mosia in moibada moyotakin.

²⁴ Kon tungkuḷ intua Israel in motongkaidon in ḷoḻitúannea ná Mesir bo Asyur, bo bangusa toḷu tatua in mobaḻídon barakat kon sinangkub in dunia.

²⁵ Ki Tuhan Inta Totok in mokawasa in momarakatbí kon i monia bo moguman, “Barakatan-Ku in moiko, ei mesir umat-Ku, Asyur inta binaḻí-Ku, bo Israel umat inta piniḻí-Ku.”