YESAYA 18 - Alkitab Singog In Mongondow Masa In Tanaa

Ki Allah in mohukumbí kon Sudan

¹ Nongkon ḻipú tobatú kon ḷoḷan in ongkag mita in Sudan kinodongogandon in singog in pangkoḷá.

² Nongkon ḻipú tatua namangoidon in totabá mita nongin Ongkag in Nil sinumakoi kon uangga mita sinonkasigan. Ei totabá mita inta mongotoḻidat, ḷagidon pobui kon ḻipúmu inta kinotaḻiban in ongkag mita tatua. Diadon in koyow tobatú potaau kon bangusamu inta moropot bo motorindog, intaumu mita inta moḷantud bo inta moaḷus in kuḻitnea bo inta kinoondok kon sinangkub in dunia.

³ Ei, moiko komintan inta nogutun kon dunia! Tondudut aka bandera mita pinopoponikdon kon tudu in buḷud mita! Indongogaidon aka torompet inirupdon!

⁴ Ki Tuhan in noguman kon inakó, “Nongkon pinogutunan-Ku kon omonik, Akuoi in moḷongow monag takin moonow bo mosanang, ná koonow in oḷú inta nobaḻí kon tungkuḷ in doḷom inta mopatú kon sempo in pobatunan kon boyó, bo ná koriang in sindar in mata in singgai kon tungkuḷ in nobayagdon.

⁵ Kon tungkuḷ in deemanpa sempo in ayop, kon tungkuḷ in toburnea ain nototak bo bungai in anggur diápa noḷutú kon pangkoinea, Sudan in rimumudondon in musung, ná kogogampang in tosilad moratab kon tanga mita in anggur.

⁶ Mayat in tontaranea mita in taḷaandon nobaḻí kokaanon in ḷagapan mita kon sempo in pononinggai, bo mahaḷuk moraat kon sempo in tumping.”

⁷ Moiangoibí in wakutunea sosumba mita poyaputdon kon i Tuhan Inta Totok in mokawasa nongkon butá tatua inta kinotaḻiban in ongkag mita, nongkon bangusanea inta moropot bo motorindog, nongkon intaunea mita inta mongoḷantud bo kuḻit moaḷus bo inta kinoondok kon sinangkub in dunia. Mosia in mamangoibí kon Sion, kon tampat inta pinosumbaan kon i Tuhan Inta Totok in mokawasa.