YESAYA 17 - Alkitab Singog In Mongondow Masa In Tanaa

Ki Allah in mohukumbí kon Siria bo Israel

¹ Ki Tuhan in noguman, “Damsyik in deeman bidon mobaḻí kotá, táe mobaḻí bidon pinosipunan in apat mita.

² Kotá mita in Siria in taḷaandon modapot in mononoi bo nobaḻídon tampat in paanan in bobiagon; diábí tobatúmai in intau in moguntun kon i monia.

³ Israel in kobuḻiandon in moḷoḷukadnea bo Damsyik kobuḻian in kinomerdekaannea. Intau in Siria inta ki agatnea in mobiag kon bonu in kaadaan mokooyá naonda bo intau in Israel. Akuoi, ki Tuhan Inta Totok in mokawasa, ain noguman.”

⁴ Ki Tuhan in noguman, “Moiangoibí in wakutunea koḷantudan in Israel in mopaḷut, bo kobiagannea motompia in moinggamá.

⁵ Israel in nádon onda bo gobá kon Repaim inta nopaḷutdon iratab in gandumnea, bo dongkadon topiḻik in ki agatnea.

⁶ Naonda bo pangkoi in zaitun inta bagu sinipú in bungainea, bo dongkadon tongonumai in kon ḷuntung mita in tanganea, natua doman in Israel tongábí topiḻik in intau in mosaḷamat. Akuoi, ki Tuhan, Allah in Israel, ain noguman.”

⁷ Kon singgai tatua intau in buidon mokituḷung kon i Inta nomaḻí kon inia, ki Allah mokudus in Israel.

⁸ Mosia in diá bidon mogoḷat mako kon bungai in inta inaidan monia tontaní, tuata in mezbah mita pototubáan kon dupa, bo patong mita i Dewi Asyera.

⁹ Kon singgai tatua, kotá mita in Israel inta moropot in poḷoḷukadnea in mobaḻí bidon dongka rumbunnea bo moingongowdon totok, naonda bo kotá mita inta sinaḷáan in intau in Hewi bo Amori kon tungkuḷ in mosia noḷagui kon intau in Israel.

¹⁰ Israel, iko in nokoḻiongdon kon i Allah inta noposaḷamat bo noḷukad kon inimu naonda bo buḷud batu inta moroton. Noyoḻiu kon tua, iko in nomuḷadon kon gobá mita sin ogoi kon dewa mita.

¹¹ Táe umpaka pinomuḷa tatua bayá-bayá monokat bo monobur kon singgai pinomuḷaanmu tua, táe diábí in bungainea. Inta oyúon in tongábí roriga bo porasaan monakit inta diábí moingga-inggamá.

Ḻipú mita in musung in kotaḷowanbí

¹² Bangusa mita inta moropot koyogotdon modowawá; singog in gotup naonda bo boḷontung in bokoḷ kon dagat inta motoyang.

¹³ Mosia in mamangoi naonda bo ḷunud inta motoyang totok. Táe ki Allah in nogogondok kon i monia, bo mosia in noḷagui iyumayú. Mosia in inaḷowan naonda bo baḻeká kon obaga in buḷud pinoḷayug in tompot, andeka ḷobud inirup in deḷang.

¹⁴ Kon tungkuḷ in moḷoḷabungdon mosia in mopoangoi in inta mokoondok totok, táe naonda in modiugdon mobayag mosia in moinggamádon. Tuata in ukur in bayongan intau inta mogagow kon i naton.