YESAYA 13 - Alkitab Singog In Mongondow Masa In Tanaa

Ki Allah in mohukum kon Babel

¹ Naa in koyow i Allah, inta sinarima i Yesaya adí i Amos soaḷ Babel:

² Pokerabdon in bandera mita in parang kon tudu in buḷud inta noḷogat! Pokuanidon kon tontara mita, bo tonggódon in kokaḷmu sinbá mosia in monubu kon bonawang mita in kotá inta moḷoḷatú tua.

³ Ki Tuhan ain nogoiní kon intau mita inta ain sinokopiḻí-Nea. Mosia in motorindog, mopirisaya kon ropot monia bo motaau pongata. Ki Tuhan in nopotabá kon i monia mohukum kon intau mita inta kinotugatan in torú-Nea.

⁴ Indongogaika in dowawá kon buḷud, ná singog in pinosipunan in intau inta totok in mobarong. Indongogaika in dowawá in dodatuan mita bo bangusa mita inta noyosipun. Ki Tuhan Inta Totok in mokawasa in nonaridi kon tontara mita in parang.

⁵ Mosia in namangoi nongkon ḻipú mita inta noyayú kon popod mita in dunia. Kon bonu in torú-Nea ki Tuhan in nomaké kon i monia sin moyopú kon sinangkub in dunia.

⁶ Pogamuidon, sin singgai i Tuhan in nodiugdon, tuata in singgai koyopúan inta pinoangoi i Tuhan Inta Totok in mokawasa.

⁷ Pomuḷoi in intau naonda bo moḻemé in ḻimanea bo moinggamá in baraninea.

⁸ Mosia komintan koaputan in ondok inta motoyang, bo momaḻikotad sin monakit naonda bo bobay inta koyogot in mononggadí. Mosia in mosiindoian takin ḻia-ḻiaw in gina, pogotnea in mosimpuya popisí in mooyá.

⁹ Singgai i Tuhan in moiangoibí, bo kon singgai tatua ki Tuhan in mopoaid in torú-Nea bo rogi-Nea inta motoyang. Butá in mobaḻí butá inta moḷogat, bo bayongan in intau baradosa in moyopú.

¹⁰ Batúan in tundi bo pinosipunan in tundi mogogai in monindar; mata in singgai in simindip kon dodai in sia momuká, bo buḷan in diá bidon monindar bui.

¹¹ Ki Tuhan in noguman, “Akuoi in mohukumbí kon dunia popisí in aidnea moraat, bo intau mita inta moraat popisí in dosa mita monia. Bayongan in inta moḷoḷatú in poompáan-Kubí, intau mododia bo moromú in hukumon-Ku.

¹² Intau inta posaḷamaton tongá topiḻik, mosia in moyaka-yakagbí nongkon buḷawan taakan.

¹³ Baḻíon-Ku in ḷangit gumugur bo butá in moḷundan nongkon kinoḻitúannea kon singgai in Akuoi, ki Tuhan Inta Totok in mokawasa, mopoontong in torú-Ku.

¹⁴ Intau ango-angoi inta nogutun kon Babel in moirangkapbí bo moḷagui mayá in ḻipúnea-ḻipúnea. Mosia in naonda bo rusa inta noḷagui nongkon moḷoḷutam, andeka paanan in domba inta diá in gombala.

¹⁵ Ki inekabí in kodomokan tumbukonbí modapot in matoi.

¹⁶ Mosia in mokoontongbí tontaní kon adí mita mointok monia romputon, baḷoi mita monia pogagowan bo ki buḷoi mita bobay monia domokon.”

¹⁷ Ki Tuhan in noguman, “Akuoi in nopotabá kon bangusa in Madai sin monubu kon Babel. Mosia in diábí motaau sogóon in saḷaka andeka buḷawan.

¹⁸ Takin puḷu bo piotnea mosia in moḻimod kon intau mita inta nongoguodpa. Mosia in diábí motabi kon adí mita mointok bo diábí motabi kon mongoadí.

¹⁹ Nongkon bayongan in dodatuan, Babel tua in inta totok in mogaga bo mokoyunggagá kon intaunea mita. Táe Akuoi, ki Tuhan, in morimumudbí kon inia, ná inta inaidan-Ku kon Sodom bo Gomora.

²⁰ Diá bidon tobatúmai intau in mogutun kon tua. Diá bidon in intau in Arab mododondaḷoi inta moposindog in ḷoḷaigannea kon tampat tatua, bo diá bidon in gombala inta modia kon bembé dombanea sin moranut kon bonok kon tua.

²¹ Tampat tatua in pogutunan bidon in biag mita ḻindong. Monikuḷu in monompugadon kon baḷoi mita monia, bo ḷagapan unta in mogutun kon tua. Bembé mita ḷoḷog mosimbanan bidon kon yuak in kinorumbunan tatua.

²² Ganggor in ungkú in kayuon bo serigala in kodongogan nongkon puri mita bo komaḻig mita in Babel. Wakutu korimumudannea motoyongdon bo wakutunea in diá bidon baḷuian bui.”