YESAYA 12 - Alkitab Singog In Mongondow Masa In Tanaa

Dondong Sukur

¹ Moiangoibí in wakutunea moiko in modondong: “Tuhan, akuoi mopoyaput in sukur kon ini-Mu, Sin Iko in noḻipoi kon inakó. Koḻipod Iko in sinumorú kon inakó, táe tanaa in noinggamádon in torú-Mu.

² Totuu, ki Allah tua in mopoposaḷamatku, akuoi in mopirisaya kon i-Nia. Akuoi in diábí moondok, sin Sia in moginropot kon inakó. Mopoposaḷamatku in ki Allah, Kon i-Nia in popoyaputanku in dondong.

³ Naonda bo tubig motumping mokoguḻí kon rogang in intau, natuata in moiko in moposanang kon gina, popisí in pinosaḷamat i Allah.”

⁴ Moiangoibí in wakutunea moiko in moguman, “Posukurdon kon i Tuhan, bo sumbadon in Sia. Potaaudon kon bangusa mita koagungan bo bayongan in inta inaidan-Nea.

⁵ Podondongdon kon i Tuhan, sin Sia in nomiadon kon nobayong in inta mokoherang. Pomayádon mako in sinangkub in dunia mokodongog kon onu inta inaidan-Nea.

⁶ Ponggoḷokapdon ei intau mita in Sion, podondongdon takin sanang in gina. Ki Allah mokudus in israel totuu kon momulia, Sia in nogutun kon yua-yuak monimu.”