YESAYA 1 - Alkitab Singog In Mongondow Masa In Tanaa

¹ Buk tanaa tombonunea in koyow mita kon Yohuda bo Yerusalem inta pinoniata i Allah kon i Yesaya, ki adí i Amos, kon tungkuḷ in ki Uzia, ki Yotam, ki Ahas bo ki Hizkia in nomarenta kon Yohuda.

Ki Allah nonoboḷow kon umat-Nea

² Indongogaidon ei ḷangit, tondudutka ei butá! Ki Tuhan in noguman, “Adí mita inta ain biniag-Ku nomarontak kon i-Nakó.

³ Sapi in kotaauanneabí in kitoginea, keledai in monotaaubí kon tampat pongogaanan inta sinadia i tuangnea. Táe umat-Ku Israel in diá; diábí in mosia nonotaau intua.”

⁴ Moboditodon in moiko bangusa inta binaradosa, intau mita inta moromú bo moraat! Moiko nion in noitampuḻisi popisí in dosamu mita. Moiko in nondoídon kon i Tuhan bo nonoḻikudon kon i Allah Inta Totok in motusi inta musti sumbáan monimu.

⁵ Nongonu sin moiko in umuranbí momayow? Moibog degá in moiko hukumon moiḻiu kon tua in kobogatnea? Uḷumu ain nopuḻing in paḻí mita, gina bo raianmu monakit.

⁶ Nongkon uḷu nodapot kon paḷad in sioḷ diádon in nopia in kon awakmu. Moiko in nopuḻingdon in bobagá mita, inumuḷo-uḷow bo paḻí mita. Paḻímu mita tatua in diápa dinaritan andeka binakut, diá doman inundaman in ḷana.

⁷ Ḻipúmu ain iyompat; kotámu mita in nodaitdon sinurub. Koonto-ontongmu in intau ango-angoi mogamá kon butámu bo morimumud kon bayongan yagi-yagi.

⁸ Tongá Yerusalem in sinaḻiban, táe nobaḻídon kotá inta kinokopungan bo diádon kodaya, naonda bo ḷuḷung kon gobá in anggur andeka ḷaig kon gobá in melong.

⁹ Aka ki Tuhan Inta Totok in mokawasa diá noposaḷamat kon tongonumai in intau kon i naton, yo kita in noyopú bidon komintan, naonda bo Sodom bo Gomora.

¹⁰ Yerusalem, itoimu mita bo bangusamu ain nobaḻí naonda bo intau in Sodom bo Gomora. Indongogaipa onu inta pinoguman i Tuhan kon inimu; tondudutka onu inta sinundú i Allah naton.

¹¹ Ki Tuhan in noguman, “Kainimukamai dá moibogbí in Akuoi in bayongan kuruban inta umuranmu posumba kon i-Nakó? Mobúbí in Akuoi in domba mita kuruban pinayong bo ḷongó in ki adí in sapimu. Dugú in sapi koḷakian, domba bo bembé kinodoí-Kubí.

¹² Ki ine in nopotabá kon i monimu modia kon bayongan in sosumba tatua kon tungkuḷ in moiko mamangoi moibada kon i-Nakó? Ki ine in nopotabá kon i monimu mododondaḷoi magí mako kon Baḷoi Motusi-Ku?

^13-14 Diábí in baragunanea in podiaan kon sosumbamu tatua. Doíbí in Akuoi kon bónea. Morongó in Akuoi bo diádon mokotahang in mokoontong kon i monimu monanob kon Buḷan Mobagu, singgai mita in Sabat bo singgai mita moḷoben takin poyoyodungkuḷan in agama. Bayongan tua in ain sinamakan monimu in dosamu mita bo nobaḻídon dodiaan kon i-Nakó; moḷopídon in Akuoi in mobaba kon tua.

¹⁵ Aka moiko motonggó kon ḻimamu sin mosambayang, doíbí in Akuoi moindoimai. Diábí pandungon-Ku mongo kotongonu in moiko mosambayang, doíbí in Akuoi mokidongog, sin ḻimamu tatua in pinoḻimodmu kon nobayong in intau.

¹⁶ Daritaidon in awakmu kodariton totok. Gogaiai in bayongan inta moraat inta inaidan monimu tua. Dikadon bui mogaid kon inta moraat,

¹⁷ pobalajardon mogaid kon inta mopia. Posindogdon in inta moadil bo ḷumbúdon in aid mondorot; ogoidon kon uno-unon in hak monia bo duḷuai in pelekara in boba-bobay mita.”

¹⁸ Ki Tuhan in noguman, “Igai toḻisíon naton in pelekara tanaa. Umpaka moiko mopura bayan popisí in dosamu mita, yo moiko in daritan-Kubí modapot in mobudó naonda bo kapot. Umpaka dosamu mita mobarong bo mobogat, moiko in ampungan-Kubí komintan.

¹⁹ Aka moiko moibog motoindudui kon i-Nakó, moiko in motarimabí kon bayongan inta mopia inta ogoi in butámu.

²⁰ Táe aka moiko moḷawang kon i-Nakó, moiko in matoibí kon poparangan. Akuoi, ki Tuhan, ain nosingog.”

Kotá inta moraat

²¹ Kotá inta koḻipod motoindudui, tanaa mako in nádon onda bo sundaḷ tobatú! Dungkuḷmai bayongan in intaunea in moadil bo mojujur, táe tanaa in pinogutunandon in moḷoḻimod mita.

²² Yerusalem, dungkuḷmai iko in naonda bo saḷaka, táe tanaa iko in diádon koboḻi. Dungkuḷmai iko naonda bo anggur inta moromimit, táe tanaa in nádon tubig inta noḻiau.

²³ Itoimu mita momomarontak bo nobaḻí ki ata in mononakow; mosia in moibog motarima kon tombuinag bo doit posogó. Mosia in doíbí moduḷu kon uno-unon kon pongadilan; doí mokidongog kon popongaduan in boba-bobay mita.

²⁴ Tuamai in ki Tuhan Inta Totok in Mokawasa, ki Allah in Israel in noguman: “Ei, musung-Ku mita, Akuoi in motuḻíbí kon yaat in gina-Ku kon i monimu, modapot in moiko diádon mokoposusamai kon i-Nakó bui.

²⁵ Aidan-Kubí intua kon i monimu. Naonda bo intau motubá kon logam, moiko in tubáan-Ku; bayongan inta nokotor ḷumbúon-Ku nongkon inimu.

²⁶ Moiko in bui-Ku ogoian in hakim mita bo monononggina ná dungkuḷmai. Dá Yerusalem in tangoiondon kotá inta moadil bo motoindudui.”

²⁷ Ki Tuhan in moadil, dá Sia in moposaḷamatbí kon Yerusalem takin intaunea mita inta inangoian in manasaḷ.

²⁸ Táe intau mita binaradosa inta nomarontak kon i-Nia in yopúon-Neabí, bo bayongan inta nonaḷámai kon i-Nia in yompatonbí.

²⁹ Mosia in angoianbí in oyá sin mosumba kon pangkoi mita in kayu bo mopotondí in gobá mita sin ogoi kon dewa mita.

³⁰ Mosia in mobaḻíbí naonda bo pangkoi in kayu moḷoben inta noḷaḷow in daunnea, bo naonda bo gobá inta diá binonuan in tubig.

³¹ Naonda bo wawa nopokak tongá popisí in rosik in ḻigatu, natua doman in intau mita nongawasa in yopúon in oaid mita moraat monia tontaní, bo diábí in motaau mongampai kon korimumudan tatua.