YEREMIA 6 - Alkitab Singog In Mongondow Masa In Tanaa

Yerusalem kinopung in musung

¹ Bayádon poḷagui, ei intau mita in Benyamin! Taḷaaidon in Yerusalem! Irupdon in torompet kon Tekoa, bo poyongkitdon in tuḷú tomponuot kon Bet-Kerem! Bodito bo roriga moḷoben in mongindoyó nongkon utuan.

² Kotá in Sion mogaga totok, táe ki Tuhan in morimumud kon inia;

³ mongongawasa mita in mononḷoḷaiganbí kon tua takin tontaranea. Kon ḻibumai in kotá tatua mosia in moposindogbí in ḷoḷaigan mita monia, kon batúannea momiḻí kon tampat inta kinoibognea.

⁴ Mosia in mogumanbí, “Igai, posadiadon monubu kon Yerusalem! Koḻigai in kita monubu singgai in naa!” Táe onda intua mosia in moguman doman, “Ado, nolatdon! Singgai moungkoḷomdon, oḻinow mita in kobanat-kobanatdon.

⁵ Maníka tubuon naton doḷom, bo rimumudon in dinding mita in kotá tatua.”

⁶ Ki Tuhan Inta Totok in mokawasa ain nomarenta kon mongongawasa mita tatua sinbá momupuḷ kon pangkoi mita in kayu bo moposindog in tombuḷud mita poḷukadan sin monubu kon Yerusalem. Ki Tuhan in noguman, “Kotá tanaa in hukumon-Ku sin kon bonunea in inaidandon in nobayong totok in aid mopororiga.

⁷ Ná doman bokaká umuranbí mopoḷuai in tubig modarit, yo natua doman in kotá tatua umuranbí mopoaid in inta moraat. Tongá habar aid moromú bo pogagowan mita in dinongog-Ku nongkon kotá tatua; kekeb bo takit inontong-Ku kon bayongan tampat.

⁸ Ei intau in Yerusalem, igumon mako bayongan in roriga tatua mobaḻí tompoingat kon inimu! Dika modapot in Akuoi monaḷámai kon imonimu bo baḻíon-Ku in kotámu tatua padang gurun inta diá pinogutunan in intau.”

Umat in Israel moibog momarontak

⁹ Ki Tuhan Inta Totok in mokawasa in noguman kon inakó, “Israel in bangkuḷuganbí modapot in naonda bo gobá in anggur inta bungainea in sinipúdon komintan. Tuamai, kon tungkuḷ in oyúonpa in wakutu, posaḷamatdon in kiagatnea.”

¹⁰ Akuoi in notubag, “Tuhan, ki ine in posingoganku, bo ki ine in ogoianku in tompoingat? Mosia in pamandot bo doí monaridi. Kosingan monia bo kodoí monia in koyow-Mu inta pinotaauku kon i monia.

¹¹ Torú-Mu kon i monia doman in modidí kon dodobku, Tuhan! Mobogat totok in momondam.” Bo ki Tuhan in noguman, “Popoaidon in torú tatua kon mongoadí mita kon daḷan mita moḷoben bo kon tayow mobiag mita inta noyosipun. Ḷoḷaki bo bobay in domokonbí, bo intau inta nogoguyangdon in diábí kotaḻiban.

¹² Baḷoi monia in ogoibí kon intau ibanea, natua doman in gobá bo buḷoi bobay mita monia. Intau mita kon butá tanaa in hukumon-Ku.

¹³ Mosia komintan pinomayá mointok andeka moḷoben, motayakbí kon kauntungan podoyon kon aid diá motuḻid. Nodapot in nabi bo imang monguboḷ kon intau.

¹⁴ Kekeb mita in umat-Ku inanggap monia in kekebbí mointok. ‘Ah, diábí nongonu,’ guman monia, ‘komintanbí mopia bo moodom.’ Bokaka totokbí in diá.

¹⁵ Mustibí in mosia tua mooyá sin nogaidon kon bayongan inta mokooyá tua. Táe mosia tua in nobunodon in pogot bo diá kooyá. Tuamai in moḷabúbí in mosia ná intau ibanea; modaitdon in ouman monia aka Akuoi mohukum kon i monia. Akuoi, ki Tuhan, ain nosingog.”

Israel doí kapiton i Tuhan

¹⁶ Ki Tuhan in noguman kon umat-Nea, “Sindogdon kon poyotangaan mita in daḷan, bo taridiadon kopira! Ḻibódon in daḷan mita dungkuḷmai, bo onda in mopia-pia kon sigadnea. Duduiaidon in daḷan tatua, sinbá moiko in mobiag moodom.” Táe mosia in noguman, “Diá, kami in doíbí mongin daḷan tatua!”

¹⁷ Bo ki Tuhan in nopobui-buimaidon in noduí kon moḷoḷukad mita sin mopotoingat kon i monia sinbá mokidongog kon singog in torompet saḷaku tomponuot. Táe umat in noguman, “Kami in doíbí mokidongog.”

¹⁸ Manangka intua ki Tuhan in noguman, “Indongogai, ei bangusa mita! Mustibí kotaauan monimu onu in mobaḻí kon umat-Ku.

¹⁹ Taridiai, ei butá! Umat-Ku in doíbí motarima kon totundú-Ku bo diá motoindudui kon i-Nakó. Mobaḻí bungai in tomayá monia in popoangoi-Ku in inta mokororiga kon i monia.

²⁰ Onubí in mangaḻenea in kamania inta dinia monia kon i-Nakó nongkon Syeba, andeka toyokayu nongkon butá moyayú? Doíbí in Akuoi in motarima kon sosumba monia. Doíbí in Akuoi kon kuruban mita payongon monia.

²¹ Akuoi in mokopopisíbí kon intau mita tanaa moipintud bo moḷabú. Guyanga ḷoḷaki bo adí, yobayat bo topodiug komintanbí moyopú.”

Pinonubuan nongkon utuan

²² Ki Tuhan in noguman, “Bangusa tobatú inta moropot in niondon tayo-tayow mangoi nongkon butá inta moyayú kon utuan. Mosia in mamangoi sin moparang.

²³ Mosia in nodia kon piot bo pandong; mosia in moraat bo diábí in ampung. Ná singog in dagat modoḷodok natuata in singog in sioḷ in kabaḷo monia inta sinakoian monia sin mamangoi monubu kon Yerusalem.”

²⁴ Nokodongog kon habar tatua, intau mita in Yerusalem kinodaitandon in daya. Mosia in inangoian in ondok, bo nororiga naonda bo bobay inta mononggadí.

²⁵ Mosia in diá mokobaḻí in moponag kon daḷan andeka mayá in gobá, sin kon bayongan in tampat musung mita in modia kon pakakat in parang sin mongindoyó.

²⁶ Ki Tuhan in noguman kon umat-Nea, “Pakédon in daing karong bo ponangkuḻitodon kon ḷobud. Ponogumatoidon bo pogamuidon takin roriga in gina naonda bo intau inta nongombaḷ sin kinopatoian i adínea tuḷong, sin momomutú in daḻídon monubu kon i monimu.”

²⁷ Bo ki Tuhan in noguman kon i Yeremia, “Tungkuḷaidon in umat-Ku, ná pogogujimu kon logam. Taridiaidon in dodia monia!

²⁸ Mosia komintan in momomarontak inta pamandot, naonda bo kotogat in bitú bo uatoi. Oaid monia in diá mopia bo maya-mayá mako sin mopotaau in habar inta moporomú kon intau ibanea.

²⁹ Poḷoḷoḷangan in nopatúdon totok, táe kotoran in logam diá doman moḷoḷayat bo moinggamá. Diá in mangaḻenea umat-Ku umuranbí tungkuḷan sin pomurnion, sin intaunea mita inta moraat diá iḷumbú.

³⁰ Mosia in tangoianbí saḷaka iḷumbú, sin Akuoi, ki Tuhan, ain noḷumbú kon i monia.”