YEREMIA 46 - Alkitab Singog In Mongondow Masa In Tanaa

Mesir sinaḷow kon Karkemis

¹ Ki Tuhan in noguman kon inakó soaḷ bangusa mita,

² pinangkoi kon Mesir. Sia in noguman kon inakó soaḷ tontara i Nekho datu in Mesir, inta sinaḷow kon Karkemis kon diug in Ongkag in Eprat i Nebukadnezar datu in Babel kon taong noginggopat pinomarentaan i Yoyakim, datu in Yohuda. Naa in pinoguman i Tuhan soaḷ tua,

^3-4 “Porwira mita in Mesir mopobaḷú kon tontaranea mosadia, ‘Ruitai in pandong! Pogiḷambungdon in ḷambung uatoi bo sapoyo uwaja! Sadia in kaḻeaw bo tuotdon kon bonu in pipidan! Moiko, tontara tumotakoi kon kabaḷo, popoḷutudon in sabarak! Takoiaidon in kabaḷomu, bo bayá poparang!’

⁵ Táe Akuoi, ki Tuhan, nokoontong kon i monia inumundok sin moondok. Tontara mita monia in sinaḷow, bo noḷagui takin ondok bo diá bidon nobobui ná tumi.

⁶ Inta modoḻikot in diádon nokopoḷagui, bo inta motorindog in diádon noiḷagui kon musung. Mosia in noidatong bo noḷabú kon utuan, kon bingkí in Ongkag in Eprat tua.

^7-8 Ki ine in sia inta noponik naonda bo tubig in Ongkag in Nil, naonda bo ongkag inta iyumanap kon bingkínea mita? Tuata in butá in Mesir. Gumannea, ‘Simindogbí in akuoi bo kawasaanku in dunia. Yopúonkubí in kotá mita takin intaunea.

⁹ Poribatukdon, ei kabaḷo! Bayádon, ei kereta! Unadon, ei intau mita mongobarani inta nodia kon kaḻeaw nongkon Sudan bo Libia. Bo moiko doman, ei inta mongotoyang momiot nongkon butá in Lidia.’ ”

¹⁰ Táe akuoi, ki Yeremia in noguman kon naa in singgai i Tuhan Inta Totok in moḷantud bo mokawasa; kon singgai tatua Sia in notuḻí kon bayongan in musung-Nea. Pitow-Nea in mokaanbí kon i monia modapot in mobotug, bo monginum kon dugú monia modapot in moguḻí. Singgai naa ki Tuhan Inta Totok in mokawasa, noratá kon kuruban-Nea mita kon utuan, kon bingkí in Ongkag in Eprat tatua.

¹¹ Ei intau in Mesir, bayádon kon Gilead sin motayak kon undam! Umpaka natua táe diábí in undam inta mokopia kon i monimu.

¹² Kaadaanmu inta mokooyá ain kinotaauan in bangusa mita. Karakmu in kinodongogandon in sinangkub in dunia. Tontara tobatú moidangat kon tontara ibanea; tumpaḷa in mosia moibaḻikotad kon butá.

Kinoangoian i Nebukadnezar

¹³ Kon dodai in ki Nebukadnezar datu in Babel namangoi nonubu kon Mesir, ki Tuhan in noguman kon inakó, kai-Nia,

¹⁴ “Yeremia, potaaudon in habar tanaa kon kotá mita in Mesir, inta kon Mempis, Migdol bo Tahpanhes, ‘Posadiadon moḷukad kon awak sin bayongan inta oyúon kon i monimu in modaitbí mogoguraat kon bonu in parang!

¹⁵ Nongonu sin ki Apis, dewamu inta moropot tua in noḷagui bidon? Popisíbí in sinaḷow i Tuhan in sia!’

¹⁶ Nobayong in tontaramu in noipintud bo noibanting. Mosia in nosigumanan, ‘igai mobui kon bangusa naton tontaní sinbá kita in kotaḻiban in anib in pitow in musung.’

¹⁷ Tontangoiaidon in tangoi mobagu in ki datu in Mesir. ‘Ki inta motontamá inta nonaḷámai kon kasampatan.’

¹⁸ Akuoi ki Allah inta nobiag, Akuoi in datu, Tuhan Inta Totok in mokawasa. Naonda bo Buḷud in Tabor noipantow kon sigad in buḷud mita, bo Buḷud in Karmel noipantow nongkon dagat, natuata in ropot i inta mamangoi monubu kon inimu.

¹⁹ Posadiadon, intau in Mesir, sin dakopon bo diaan mayá! Mempis in mobaḻídon apugnea – tampat inta moingongow popisí in diádon inutunan.

²⁰ Mesir in naonda bo ki adí in sapi noḷomumu, táe sinuyayow in ḷangow moḷoben nongkon utuan.

²¹ Nodapot in tontara mita inta sinoko tondanannea in diádon mokopongonu nádon ki adí in sapi inta noiḻiudon in ḷongó. Mosia in diádon mokotongod. Komintan momurow bo moḷagui sinbá mosaḷamat. Singgai pohukuman kon i monia in noyaputdon; wakutuneadon mosia koantugan in bodito.

²² Mesir in moḷagui sindaḷan monginggoi naonda bo uḷag popisí in tontara in musung kodiug-kodiugdon. Mosia in monubu kon inia mopomaké in boḻiung naonda bo intau momupuḷ kon kayu

²³ bo monaḷun kon kayuon moromon inta diá motaau tuotan. Tontara in musung diá koiapan, mobaro-barongdon nongkon pangkoḷá. Akuoi, ki Tuhan in noguman.

²⁴ Intau in Mesir in pokopooyáanmai, sin sinaḷow in bangusa nongkon utuan. Akuoi, ki Tuhan, ain nosingog.”

²⁵ Ki Tuhan Inta Totok in mokawasa, Allah in Israel, noguman, “Akuoi in mohukumbí kon Amon, dewa nongkon Tebe, takin sinangkub in Mesir takin dewa mita bo datunea mita. Datu in Mesir bo bayongan in intau inta mopongata kon inia

²⁶ ogoi-Kubí kon i Nebukadnezar datu in Babel bo tontaranea inta moibog moḻimod kon in monia. Táe moiduduimai, Mesir in utunanbí bui ná dungkuḷ. Akuoi, ki Tuhan, ain nosingog.”

Ki Tuhan in moposaḷamatbí kon umat-Nea

²⁷ “Umat-Ku, Israel, dikabí moondok! Mogogundoi-Ku Yakub, dika mourot! Moiko bo buímu in posaḷamaton-Kubí nongkon butá moyayú, kon pinodakopan kon i monimu. Moiko in mobuibí bo mogutun kon butámu takin moaman. Moiko in mobiagbí motomoman; diábí in koondok monimu.

²⁸ Dá dikabí moondok, ei umat-Ku, Akuoi in mamangoibí sin moposaḷamat kon i monimu. Bangusa mita, inta pinoporaritan-Ku kon i monimu, komintanbí yopúon-Ku, táe moiko in diábí pomiaan-Ku natua. Totuu kon moiko in diábí moiḷagui nongkon hukuman táe hukuman-Ku kon i monimu in moadilbí podudui in inta ain sinantú. Akuoi, ki Tuhan, ain nosingog.”