YEREMIA 40 - Alkitab Singog In Mongondow Masa In Tanaa

Ki Yeremia nogutun takin i Gedalya

¹ Ki Tuhan in nosingog kon inakó naonda in ki Nebuzaradan, itoi in tontara tatua, nopoḷuai kon inakó kon Rama. Akuoi in diniadon kon tua koumantu-antungpa takin bayongan intau ibanea nongkon Yerusalem bo Yohuda inta inakut saḷaku inta dinakop pinobayá in Babel.

² Itoi in tontara tatua nogoiní kon inakó pinotontaní bo noguman, “Ki Tuhan Allahmu ain nonindoyó kon morimumud kon butá tanaa.

³ Tanaa inaidan-Neadon intua, popisí in bangusamu ain binaradosa bo diá motoḷutui kon i-Nia.

⁴ Tanaa in bukaankudon in pinoumantungan kon inimu bo iko in buḻiankudon. Aka moibog in iko, yo motaaubí in dumudui mayá in Babel, bo ḷukadankubí in iko. Táe aka doí, diábí doman nongonu. Kon sinangkub in butá tanaa mobebasbí in iko in mayábí in onda in koibogmu.”

⁵ Kon dodai in diápa minayá, ki Nebuzaradan in noguman, “Aka moibog, iko in motaaubí mobui mayá kon i Gedalya ki adí i Ahikam ki ompu i Sapan, inta ain dinuí i datu in Babel nobaḻí gubernur kon kotá mita in Yohuda. Iko in motaaubí mogutun takinnea kon sigad in rayat, andeka mayábí in onda in koibogmu.” Bo inogoiannea in tongkaaḷ kaanon bo tombuinag in akuoi, bo inogoineadon in akuoi minayá.

⁶ Akuoi in minayá kon i Gedalya kon Mizpa, bo nogutun kon inia kon yua-yuak in rayat inta sinaḷáan kon butá in Yohuda.

Ki Gedalya, gubernur in Yohuda

⁷ Ki Datu in Babel ain noduí kon i Gedalya nobaḻí gubernur kon Yohuda sin momarenta kon bayongan intau inta nogutunpa kon Yohuda, intau mita inta nobiag totok in nobogá. Tongosilai nongkon porwira mita bo tontara in Yohuda inta diá sinumungkud kon intau in Babel, nokodongogdon kon pinoduían kon i Gedalya tua.

⁸ Dá ki Ismael ki adí i Netanya, ki Yohanan ki adí i Kareah, ki Seraya ki adí i Tanhumet, bo ki adí mita i Epai nongkon Netopa, bo ki Yezanya nongkon Maakha minayá takin intau mita monia kon i Gedalya kon Mizpa.

⁹ Ki Gedalya in noguman kon i monia, “Moiko in dikabí moondok in tumungkud kon intau in Babel. Pogutundon kon butá naton tanaa, bo koibogdon mobaḻí ata in datu in Babel. Mopirisayabí in akuoi kon mosaḷamatbí in moiko.

¹⁰ Pogutundon kon kotá mita inta koibog monimu, bo kumudungdon in mosipun poḷat motagú kon anggur, bungai mita in ayop bo ḷana in zaitun. Akuoi tontaní in mogutunbí kon Mizpa bo mobaḻí toḻiu in rayat aka intau mita in Babel mamangoi.”

¹¹ Kon dodai intua bayongan intau in Israel inta kon butá in Moab, Amon, Edom, bo kon butá mita ibanea, nokodongog kon ki datu in Babel ain nobogoi kon tongosilai in intau in Israel nogutun kon Yohuda, bo sia in noduí domandon kon i Gedalya nobaḻí gubernur.

¹² Tuamai in nonaḷámaidon in mosia kon tampat mita inta pinoporaritan kon i monia, bo nobui kon Yohuda. Mosia in namangoi kon i Gedalya kon Mizpa, bo nosipun kon nobayong totok in anggur bo bungai in ayop.

Ki Gedalya iḻimod

¹³ Noiduduimai kon tua, ki Yohanan bo porwira inta diá sinumungkud kon musung, namangoi kon i Gedalya kon Mizpa

¹⁴ bo noguman, “Kinotaauanmu degá kon ki Baalis datu in Amon nopotabádon kon i Ismael moḻimod kon inimu?” Táe diábí in ki Gedalya nopirisaya kon singog monia.

¹⁵ Bo inumado-adop noguman in ki Yohanan kon i Gedalya, “Biódon mako bayáanku ḻimodon in ki Ismael; diábí tobatúmai in intau in mokotaau kon ki ine in noḻimod. Nongonu sin mustibí pomayá mako in sia in moḻimod kon inimu? Tua in mokopopisíbí kon bayongan in intau in Yohuda inta ain noyosipun kon naa takinmu, moiraritdon bui, bo tua in mokorimumudbí kon bayongan in rayat inta ki agatnea kon Yohuda.”

¹⁶ Táe ki Gedalya in notubag, “Dika! Onu inta pinogumanmu soaḷ ki Ismael tua in diábí totuu!”