YEREMIA 35 - Alkitab Singog In Mongondow Masa In Tanaa

Ki Yeremia bo inanakan i Rekhab

¹ Naonda in ki Yoyakin ki adí i Yosia nobaḻí datu in Yohuda, ki Tuhan in noguman kon inakó

² “Bayádon poyosingog in intau mita inanakan i Rekhab. Diadon in mosia kon yuang tobatú kon bonu in Baḷoi-Ku, bo tugungaidon in anggur kon i monia.”

³ Dá minayádon in akuoi nonontomu kon bayongan inanakan i Rekhab, inta ki Yaazanya (ki adí in intau tobatú inta tangoinea in ki Yeremia ki adí i Habazinya) noyotakin in bayongan i utatnea bo i adínea mita inta ḷoḷaki.

⁴ Akuoi in nodia kon i monia kon Baḷoi Tuhan kon bonu in yuang in murí mita i Nabi Hanan ki adí i Yigdalya. Yuang tatua kon ḻimonik in yuang i Imang Maaseya ki adí i Salum, kon diug in yuang in pojabat mita ibanea. Ki Maaseya in pogawai moḷantud inta moindoi kon ngara mita kon Baḷoi Tuhan.

⁵ Onda intua akuoi nogukat kon tayowon in intau mita in Rekhab tua in palo mita inta nopuḻing in anggur, bo galas mita. Bo akuoi in noguman kon in monia, “Nonginumpa uḻe.”

⁶ Táe mosia in notubag. “Kami in diábí monginum kon anggur. Mogoguyang nami ki Yonadab ki adí i Rekhab in nogimaḷow kon inami bo buí nami in monginum kon anggur. Imaḷow tatua in mononoibí.

⁷ Kami in diábí motaau in monompinomuḷa bo diá doman motaau in mononggobá andeka oyúon in gobá in anggur. Kinoouput in kobiagan kami in diá doman mobaḻí in moposindog in baḷoi. Kami in mustibí mogutun kon bonu in ḷoḷaigan, sinbá motaau umuran mogutun kon butá tanaa saḷaku intau ango-angoi.

⁸ Bayongan inta pinarenta i Yonadab kon inami ain sinokoduduian nami. Kinoouput in kobiagan, kami bo adí buḷoi nami in diábí nonginum kon anggur.

^9-10 Kami in diábí moposindog in baḷoi sin pogogutunan nami, táe kami in nogutun kon bonu in baḷoi ḷoḷaigan. Kami in diá doman kogobá in anggur, gobá andeka bibit in gandum sin pomuḷaan. Impoḷok in singog, bayongan inta pinarenta in mogoguyang nami ki Yonadab tatua, nodaitbí sinokoduduian nami.

¹¹ Táe naonda in ki Datu Nebukadnezar nonubu kon butá tanaa, kami in nonantúdon kon moḷagui nongkon tontara in Babel bo tontara in Siria, bo noḷagui minayá in Yerusalem. Tuamai in nogutun kon naa in kami.”

^12-13 Bo ki Tuhan Inta Totok in mokawasa, Allah in Israel, nopotabá kon inakó minayá kon intau in Yohuda bo Yerusalem, bo nopoyaput in koyow i Tuhan tanaa kon i monia, “Akuoi, ki Tuhan, noḻibó nongonu sin moiko in doíbí mokidongog kon i-Nakó, bo doí dumudui kon parenta-Ku mita.

¹⁴ Ki Yonadab in nogimaḷow kon buínea in monginum kon anggur, bo mosia in motoindudui kon imaḷow tatua. Nodapot in singgai naa diá tobatúmai in intau nongkon i monia in nonginum kon anggur. Táe Akuoi in tantúbí mosingog kon i monimu, bo moiko in doí mokidongog.

¹⁵ Tantúbí in Akuoi mopotabá kon i monimu in bayongan mogogundoi-Ku nabi mita, bo mosia in nonongginadon kon i monimu kon bá monombaḷui kon oaidmu bo mogogai in mogaid kon inta moraat. Mosia in mobogoi in toingat kon i monimu sinbá diá mosumba kon ilah mita ibanea bo diá doman mogundoi kon i monia, sinbá moiko in umuran motaau mogutun kon butá tanaa inta ain inogoi-Ku kon inimu bo kon mogoguyangmu. Táe moiko in doíbí moindoimai bo doí mokidongog kon i-Nakó.

¹⁶ Buí i Yonadab in motoindudui kon parenta i amá mogoguyang monia, táe moiko in diá motoḷutui kon i-Nakó.

¹⁷ Tuamai, Akuoi, ki Tuhan Inta Totok in mokawasa, Allah in Israel, in mopoangoibí kon i monimu – intau in Yohuda bo Yerusalem – bayongan in bodito inta ain sinantú-Ku kon i monimu, ná inta ain pinoguman-Ku. Tua in inaidan-Ku popisí in moiko in doí mokidongog aka Akuoi mosingog kon inimu, bo moiko in doí tumubag kon dodai in Akuoi mogoiní kon i monimu.”

¹⁸ Bo Akuoi in noguman kon intau mita inanakan i Rekhab kon ki Tuhan Inta Totok in mokawasa, Allah in Israel, noguman nanaa, “Moiko in notoinduduidon kon mogoguyangmu ki Yonadab, bayongan in parentanea aindon dinuduian bo pinobayá.

¹⁹ Tuamai, Akuoi, ki Tuhan Inta Totok in mokawasa, Allah in Israel modandi kon nongkon buí i Yonadab ki adí i Rekhab umuran oyúon in intau ḷoḷaki inta mobantung kon i-Nakó.”