YEREMIA 34 - Alkitab Singog In Mongondow Masa In Tanaa

Koyow kon i Zedekia

¹ Kon dodai in ki Nebukadnezar datu in Babel takin tontaranea inta iniropotan in tontara mita nongkon bayongan in bangusa bo negara inta nokiompu kon inia namangoi nonubu kon Yerusalem bo kotá mita kon diugneamai, ki Tuhan in nosingog kon inakó.

² Sia in nopotabá kon inakó minayá kon i Zedekia datu in Yohuda, bo noguman nanaa, “Akuoi, ki Tuhan Allah in Israel, in mobogoidon in kotá tanaa kon i datu in Babel bo turubonneabí.

³ Iko in diábí mokoḷagui, táe domokonbí bo ogoi kon inia. Iko in moyodungkuḷbí bo mongonguman takinnea, bo iko in mayá in Babel.

⁴ Táe indongogai in tosingogon-Ku tanaa soaḷ iko, Zedekia! Iko in diábí matoi kon poparangan,

⁵ táe matoibí takin motomoman. Bo ná doman onda in pinototubá in rayat kon kamania kon dodai in noḷobong kon mogoguyangmu inta nomarenta noiuna kon inimu, yo natua doman in rayat in motubá kon kamania kon inimu. Mosia in mononogumatoibí bo moguman, ‘Adodoia kaasí! Datu nami in diádon!’ Akuoi, ki Tuhan, ain nosingog.”

⁶ Dá koyow i Tuhan tua in pinotaauku kon i Datu Zedekia kon Yerusalem,

⁷ kon dodai in tontara i datu in Babel koyogotdon in nonubu kon kotá tatua. Mosia in nonubu doman kon kotá in Lakhis bo Aseka, kotá doyowa inta dininding inta nonahangpa kon Yohuda.

Aid motombogá kon ata mita

⁸ Ki Datu Zedekia bo intau in Yerusalem nomia kon dodandian sin mopoḷuat

⁹ kon ata mita in Ibrani monia, pinomayá ḷoḷaki andeka bobay sinbá diá tobatúmai in nongkon bangusa Israel inta mononggata kon tongobangusaannea.

¹⁰ Bayongan in rayat bo pojabat mita in pomarenta inta ain nomia kon dodandian mopoḷuat kon ata mita monia bo diádon bui mononggata kon i monia, totu-totuu mopoḷuat kon i ata monia tatua.

¹¹ Táe noiduduimai nobaḷui in raian monia, bo nogamá bui kon ata mita tatua, bo nomakisa kon i monia nobaḻí ata bui.

^12-13 Dá ki Tuhan, Allah in Israel, nopotabá kon inakó noguman nanaa kon intau mita tatua, “Kon tungkuḷ in Akuoi nodia kon mogoguyangmu iḻumuai nongkon Mesir bo nopoḷuat kon i monia nongkon pinononggataan, Akuoi in nomiadon kon dodandian takin monia.

¹⁴ Akuoi in noguman kon bayongan in ata Ibrani inta ain nobaḻí ata onom notaong in koonggotnea, musti poḷuaton kon imbuit in taong impitunea. Táe mogoguyangmu in doíbí noindoimai andeka nokidongog kon onu inta pinoguman-Ku tatua.

¹⁵ Tongonumai nosinggai inta ain noitaḻib moiko in nomaḷui kon dodiamu bo nogaid kon inta mokosanang kon gina-Ku. Moiko komintan in noibogbí kon mopoḷuat in ata mita tongobangusamu, bo nomia kon dodandian takin-Ku kon bonu in Baḷoi-Ku.

^16-19 Pojabat mita in pomarenta in Yohuda bo Yerusalem takin pogawai mita in komaḻig, imang mita bo bayongan in moḷoḷukad kon butámu ain noposah kon dodandian tatua poḷat noratá kon sapi, pinongkó doyowa, bo minayá kon sigad in doyowa nopongkó tatua. Táe, onda intua nobaḷui in raian monimu bo noningkuḻe kon i-Nakó. Ata mita inta ain pinoḷuat monimu podudui in ibog monia, ginamá bui monimu bo pinakisa nobaḻí ata bui. Tuamai, Akuoi, Tuhan, moguman kon moiko in iḻimimpatdon kon parenta-Ku, bo diá dinumudui kon saratnea mita, sin moiko in diábí nopoḷuat kon tumpaḷa bangusamu Israel. Yo, maníka Akuoi in mobogoi in kabebasan kon inimu: Kabebasan matoi kon poparangan andeka yampoi in takit andeka in gogoy. Akuoi in mopomiabí kon i monimu ná moiko nopomia kon sapi inta iratá monimu tatua. Pomiaan-Kubí in bayongan bangusa kon dunia mokoningkim in mokoontong kon onu in inaidan-Ku kon i monimu.

²⁰ Ogoi-Kubí in moiko kon musung inta moibog moḻimod kon i monimu. Mayatmu in kaanonbí in ḷagapan bo mahaḷuk mokokaan kon mahaḷuk ibanea.

²¹ Ki Zedekia datu in Yohuda bo pojabat mita in pomarentaanea in ogoi-Ku kon intau mita inta moibog moḻimod kon i monia. Ogoi-Kubí in mosia kon tontara in Babel, inta tanaa mako ain nonaḷámai kon i monimu.

²² Parentaan-Kubí in mosia sinbá mobuidon mangoi kon kotá tanaa, poḷat monubu, mogagow, bo monurub. Kotá mita in Yohuda in baḻíon-Ku naonda bo padang gurun inta diá inutunan in intau. Akuoi, ki Tuhan, ain nosingog.”