YEREMIA 33 - Alkitab Singog In Mongondow Masa In Tanaa

Dandi ibanea inta nobogoi in kamang

¹ Kon dodai in akuoi sinahang kon palas, akuoi in nokouḻí kon koyow nongkon i Tuhan

² inta nomaḻí kon butá bo nomia poḷat nogukat kon tampatnea. Sia in noguman,

³ “Pokuanidon kon i-Nakó, dá tubagan-Kubí; potaau-Kubí kon inimu in soaḷ mita inta mopia bo inta mokotongaw inta diápa kinotaauanmu.

⁴ Komaḻig i datu in Yohuda bo baḷoi mita kon kotá in Yerusalem ain kinokai sin moginropot kon poḷukadan kon pinongopungan bo pinonubuan in musung. Táe Akuoi, ki Tuhan, Allah in Israel, noguman kon

⁵ diábí in mangaḻenea in monayow kon intau in Babel, sin tua in tongábí mokopopisí kon kotá tanaa mopuḻing in mayat in intau mita inta pinatoi-Ku kon bonu in torú bo rogi-Ku kon i monia. Akuoi in doídon moindoi kon kotá tanaa, sin intaunea mita ain nogaid kon inta moraat.

⁶ Táe kon singgai moiduduimai poguḻiton-Kubí bui in kaadaan in kotá tanaa bo intau inta nogutun kon bonunea; mosia in buibí moropot. Akuoi in mobogoibí kon i monia in kobiagan mooyúon bo koamanan inta mobayong totok.

⁷ Yohuda bo Israel in baḻíon-Ku ponango-nangoian ná dungkuḷmai bo mosia in simindogbí bui mobaḻí umat-Ku.

⁸ Akuoi in mondaritbí kon i monia nongkon dosa mita inta ain inaidan monia kon i-Nakó; dosa mita bo aid moraat monia in ampungan-Kubí.

⁹ Yerusalem in mobaḻí koḷungangaan bo koyunggagaan-Ku. Bayongan in bangusa kon dunia in mobaḻíbí moondok bo mourot poḷat mohoromat kon i-Nakó, aka mokodongogdon kon bayongan inta mopia inta inaidan-Ku kon intau inta nogutun kon Yerusalem, bo kobiagan motompia inta ogoi-Ku kon kotá tatua.”

¹⁰ Ki Tuhan in noguman, “Intau in moguman kon tampat tanaa naonda bo padang gurun, diábí in intau andeka mahaḷuk in mogutun kon tua. Tosingogon monia in totuubí, sin kotá mita in Yohuda bo daḷan mita kon Yerusalem in diádon komintan in bonunea; Diá in intau andeka mahaḷuk inta nogutun kon tua.

¹¹ Táe kon tampat mita tatua in kodongoganbí bui in singog ḷunganga bo pia in gina takin dowawá in ponikaan. Kodongoganbí doman in dondong in intau mita inta nodia kon kuruban sukur kon Baḷoi-Ku. Mosia in mogumanbí, ‘Posukurdon kon i Tuhan Inta Totok in mokawasa, sin mopia in Sia bo tabi-Nea in mononoi.’ Butá tanaa in baḻíon-Kubí mobiag motompia ná dungkuḷ. Akuoi, ki Tuhan, ain noguman.”

¹² Ki Tuhan Inta Totok in mokawasa in noguman, “Butá bo kotánea mita inta ná padang gurun tanaa diá inutunan in intau andeka mahaḷuk. Táe umpaka natua, kon singgai moiduduimai oyúonbí in rawang mita in bonok tampat popokaanan in intau kon dombanea mita.

¹³ Kon kotá mita inta kon butá mita kon buḷud, kon sioḷan in buḷud, butá in Yohuda dotá in toḷatan, bo kon butá in Benyamin takin ḻipú mita kon diugmai in Yerusalem, bo kon kotá mita in Yohuda, gombala mita in mogiapbí bui kon domba mita monia. Akuoi, ki Tuhan, ain noguman.”

¹⁴ Ki Tuhan in noguman, “Moiangoibí in wakutunea Akuoi in mogintompod kon dandi inta ain pinomia-Ku takin Israel bo Yohuda.

¹⁵ Kon dodai intua intau moadil tobatú nongkon buí i Daud in piḻíon-Kubí mobaḻí datu. Datu tatua in mogaid kon onu inta moadil bo inta totuu kon sinangkub in butá.

¹⁶ Intau in Yohuda bo intau inta nogutun kon Yerusalem in posaḷamatonbí bo mobiag moaman. Kotá in Yerusalem in tangoian ‘Tuhan Mopoposaḷamat Naton’.

¹⁷ Akuoi, ki Tuhan, modandi kon umuran oyúon in intau tobatú nongkon buí i Daud inta mobaḻí datu in Israel;

¹⁸ umuranbí oyúon in imang mita nongkon suku in Lewi inta mogundoi kon i-Nakó bo moposumba in kuruban mahaḷuk, gandum bo sosumba inta pinayong.”

¹⁹ Ki Tuhan in noguman kon inakó,

²⁰ “Akuoi in nomiadon kon dodandian takin in singgai bo doḷom, sinbá singgai bo doḷom umuran mamangoi kon wakutunea; dodandian tatua diábí motaau inggamáan.

²¹ Natua doman in Akuoi ain nomia kon dodandian takin i mogogundoi-Ku ki Daud, kon nongkon buínea tantúbí oyúon in intau inta mobaḻí datu, bo Akuoi in nomiadon kon dodandian takin imang mita buí i Lewi kon mosia in umuranbí mogundoi kon i-Nakó. Dodandian mita tatua in diábí motaau popatan.

²² Akuoi in modugangbí kon buí in mogogundoi-Ku ki Daud, bo imang mita suku in Lewi, dá kobayong monia in mobaḻídon ná kobayong in bungaion kon pintad bo tundi kon ḷangit inta diá koiapan.”

²³ Ki Tuhan in noguman kon inakó,

²⁴ “Sinaridianmudon degá onu inta pinoguman in intau kon Israel bo Yohuda? Mosia in noguman kon Akuoi in noḷumbúdon kon bangusa doyowa tatua inta ain piniḻí-Ku tatua. Tuamai in inanggapdon monia noompá in umat-Ku, bo diádon inanggap monia saḷaku tobatú bangusa.

²⁵ Táe ná doman onda in Akuoi, ki Tuhan, ain nomia kon dodandian takin in singgai bo doḷom, bo nomia kon hukum inta nonompia kon ḷangit bo butá,

²⁶ natua doman in Akuoi in tantú mokadai kon dodandian-Ku takin buí i Yakub bo takin in mogogundoi-Ku ki Daud. Intau tobatú nongkon buí i Daud in piḻíon-Ku momarenta kon buí i Abraham, i Ishak, bo i Yakub. Akuoi in monotabibí kon umat-Ku, bo mopobaḻí kon i monia mooyúon bui.”