YEREMIA 32 - Alkitab Singog In Mongondow Masa In Tanaa

Ki Yeremia notaḷui kon butá

¹ Kon taong impuḷúnea kon pinomarentaan i Zedekia datu in Yohuda, inta taong impuḷú bo waḷunea kon pinomarentaan i Nebukadnezar datu in Babel, ki Tuhan in nosingog kon inakó.

² Kon dodai intua tontara i datu in Babel koyogot in nonubu kon Yerusalem. Akuoi in sinahang kon dangkuḷon in komaḻig in datu

³ i Datu Zedekia popisí in pinoponapudan kon nopotaaudon kon ki Tuhan in noguman nanaa, “Datu in Babel in pomayá-Kudon mako in mopotungkud bo mongawasa kon butá tanaa,

⁴ bo ki Datu Zedekia in diábí mokoḷagui. Sia in ogoibí kon i datu in Babel, bo tumayow kon i datu tatua poḷat mongonguman tontaní takinnea.

⁵ Onda intua ki Zedekia in akutondon pobayá in Babel bo mogutun kon tua modapot in Akuoi mohukum kon inia. Umpakabí in sia momarang kon intau in Babel, diábí in sia mokountung. Akuoi, ki Tuhan, ain nosingog.”

⁶ Ki Tuhan in noguman kon inakó,

⁷ kon ki Hanameel, ki adí ḷoḷaki i Salum pokuamaanku in mamangoibí sin mopoigum sinbá taḷuionku in butánea kon Anatot kon wilayah in Benyamin. Sin, akuoibí in pokuadíonnea inta totok in modagin inta kohak motaḷui kon butá tatua.

⁸ Bo noitugat ná inta ain pinoguman i Tuhan, namangoidon in ki Hanameel kon inakó kon palas in komaḻig, bo nopoigum sinbá taḷuionku in butánea. Tuamai in noyakindon in akuoi kon ki Tuhan in totu-totuubí ain nosingog kon inakó.

^9-10 Dá inuboḻianku kon i Hanameel in butá tatua in doit saḷaka mopuḷú bo pitu. Inoiníku in sakusi mita bo kon tayowon monia sinekengku in surat totaḷuiannea, bo kinompitanku in segel bo sinimbangku in doitnea.

¹¹ Onda intua akuoi in nogamá kon surat totaḷuian tatua inta ain kinompitan in segel bo pinomaisan kon sarat mita bo atorangnea mita. Ginamáku doman in surat ibanea inta notongkai intua inta diá kinompitan in segelnea,

¹² Bo surat doyowa tatua in inogoiku kon i Barukh ki adí i Neria ki ompu i Mahseya. Inogoiku intua kon tayowon i Hanameel bo sakusi mita inta ain notekeng kon surat mita tatua, bo kon tayowon in intau mita inta ḻimitú mako kon palas tatua.

¹³ Kon tayowon i monia komintan tatua akuoi in noguman kon i Barukh,

¹⁴ “Ki Tuhan Inta Totok in mokawasa, ki Allah in Israel, nomarenta sinbá gamáanmu in surat doyowa tanaa, pinomayá inta asli andeka inta dongkadon pinais bui, bo bonuon kon kuyon butá tobatú sinbá monahang.

¹⁵ Ki Tuhan Inta Totok in mokawasa, ki Allah in Israel, in noguman kon baḷoi, butá, bo gobá in anggur in kon singgai moiduduimai in potaḷuibí bui kon butá tanaa.”

Sambayang i Yeremia

¹⁶ Naonda in surat mita totaḷuian tatua inogoiku kon i Barukh, nosambayang in akuoi,

¹⁷ “Tuhan Inta Totok in momulia, Ikobí inta nomaḻí kon ḷangit bo butá pinongin kawasa bo ropot-Mu inta moḷoben. Diábí in tobatúmai in mororiga aidan-Mu.

¹⁸ Iko in nopoontong in tabi-Mu inta mononoi kon ribuan in intau, táe Iko in mohukum doman kon intau popisí in dosa in guranganea. Iko in Allah inta momulia bo motorindog; tangoi-Mu in Tuhan Inta Totok in mokawasa.

¹⁹ Tomayá-Mu mita in motoyang, bo aid-Mu mita in mokoherang; Iko in nokoontong kon bayongan inta inaidan in intau, bo motuḻí kon i monia podudui in aid monia.

²⁰ Dungkuḷmai Iko in nogaid kon inta mokoherang bo soaḷ mita inta diá in poḻiu kon Mesir, bo dapot in tanaa doman Iko in umuranpabí doman mogaid kon natua, pinomayá kon sigad in intau in Israel andeka kon sigad in bayongan in bangusa ibanea. Tuamai tanaa Iko in ponango-nangoian kon bayongan tampat.

²¹ Pinongin kawasa bo ropot-Mu inta moḷoben Iko in nodia kon umat in Israel iḻumuai nongkon Mesir. Iko in nogaid kon inta mujizat mita bo inta mokoherang bo aid mita inta mokodoḻiok kon musung.

²² Butá inta mopia bo motobai naa inogoi-Mu kon i monia ná inta ain pinodandi-Mu kon mogoguyang monia.

²³ Táe naonda in mosia namangoi in butá tanaa bo nogagow, mosia in diábí notoḷutui kon parenta-Mu mita, bo diá nobiag podudui in totundú-Mu mita. Bayongan inta pinarenta-Mu kon i monia diá tobatúmai in inaidan monia. Tuamai in pinopoangoi-Mu in bayongan bodito tanaa kon i monia.

²⁴ Intau mita in Babel ain noposindog in dinding mita pongopungan kon ḻibu mita in kotá sin mogagow, bo tanaa mosia in nonubu. Parang, gogoy, bo yampoi in takit in mokopopisí kon kotá tanaa moḷabú kon ḻima monia. Iko in nokoontong kon bayongan inta pinoguman-Mu in noniatadon.

²⁵ Táe umpaka natua, o Tuhan Inta Totok in momulia, Ikobí in nopotabá kon inakó notaḷui kon butá tanaa kon tayowon in sakusi mita, umpaka topiḻikpa bo kotá tanaa in agowondon in intau in Babel.”

²⁶ Onda intua ki Tuhan in noguman kon inakó,

²⁷ “Akuoibí in Tuhan, Allah in bayongan intau. Diábí in mororiga-Ku aidan.

²⁸ Kotá tanaa in pomayá-Kubí mako in kawasaan i Nebukadnezar takin tontaranea mita. Mosia in mogagowbí kon kotá tanaa,

²⁹ bo monurub kon tua modapot in mopayong takin baḷoi mita in intau mita inta nokopomuká kon torú-Ku, sin kon tudu in atop in baḷoi mita tatua notubá in mosia kon dupa kon i Baal bo nopobutak in anggur sin posumba kon dewa mita.

³⁰ Pinangkoipamai kon kinobobiag monia, intau in Israel bo intau in Yohuda ain nogaid kon inta diá nokopia kon gina. Mosia in nopomuká in torú-Ku pinongin aid mita monia inta moraat.

³¹ Pinangkoi kon kotá tanaa pinosindog, intaunea in nopomukádon kon torú-Ku. Dá sinantú-Kudon kon yopúon intua,

³² popisí in bayongan aid moraat in intau in Yohuda bo Yerusalem takin datu mita, pojabat in pomarenta, imang, bo nabi mita monia.

³³ Mosia in nonaḷámaidon kon i-Nakó bo umpakabí Akuoi tantú motundú kon i monia, mosia in doíbí mokidongog bo doí doman mosadar.

³⁴ Nodapotbí in baḷoi inta pinosindog poibadaan kon i-Nakó ain pinonajis monia pinongin nogukat kon berhala mita monia inta mokorongó kon tampat tatua.

³⁵ Mosia in noposindog in mezbah mita kon i Baal kon Ḷopá in Hinom, bo noposumba in adí mita monia kon i Dewa Molokh. Bokaka, Akuoi in diábí nokoimontanmai in nokiaid in natua kon i monia, noidapotbí in diábí kon dodai in onda in noigonúmai kon gina-Ku kon mosia in mogaid kon inta totok in moraat natua bo mokopopisí kon intau in Yohuda baradosaan.”

Dandi inta nobogoi in kamang

³⁶ Ki Tuhan, Allah in Israel, noguman kon inakó, “Yeremia, bangusa in Israel noguman kon parang, gogoy, bo yampoi in takit in mokopopisíbí kon kotá tanaa in moḷabú kon ḻima in datu in Babel. Tanaa, indongogai doman onu in poguman-Ku.

³⁷ Akuoi in mosipunbí kon bangusa tanaa nongkon bayongan butá tampat pinoporaritan-Ku kon i monia popisí in torú-Ku bo rogi-Ku kon i monia. Mosia in diaan-Kubí bui kon tampat tanaa bo ogoi-Kudon mogutun kon naa takin moaman.

³⁸ Mosia in mobaḻí umat-Ku bo Akuoi in mobaḻí Allah monia.

³⁹ Akuoi in mobogoibí kon i monia in tongábí tobatú in tujuan kobiagan: tuata in mohoromat kon i-Nakó modapot in mononoi; tua in modiabí kon kopiaan kon i monia tontaní, bo kon i buí monia.

⁴⁰ Akuoi in momiabí kon dodandian inta mononoi takin i monia. Akuoi in diábí mogogai in mogaid kon inta mopia kon i monia. Baḻíon-Kubí in mosia moondok bo mohoromat kon i-Nakó takin ḻimbatú in gina sinbá mosia diá yumayú kon i-Nakó.

⁴¹ Mopiabí in gina-Ku in mopoaid kon inta mopia kon i monia, bo mopobaḻí kon i monia mogutun motantú kon butá tanaa modapot in mononoi.

⁴² Ná doman onda in pinopopoangoi-Ku in bodito kon bangusa tanaa, yo natua doman in Akuoi in mobogoi in bayongan inta mopia inta ain pinodandi-Ku kon i monia.

⁴³ Intau in moguman kon butá tanaa in nobaḻí naonda bo padang gurun inta diá inutunan in intau bo mahaḷuk, bo butá tanaa in noḷabúdon kon ḻima in intau in Babel. Táe Akuoi in moguman kon singgai moiduduimai gobá tudunea in buibí potaḷui kon ḻipú tanaa;

⁴⁴ Surat totaḷuiannea in tekengonbí, bo kompitan in segel, bo irigonan in sakusi mita. Tua in mobaḻíbí kon butá in Benyamin, kon ḻipú mita kon diugmai in Yerusalem, kon kotá mita in Yohuda, kon kotá mita kon butá mita kon buḷud, kon butá kon siḻigonmai in buḷud, bo kon Yohuda toḷatan. Bangusa tanaa in tompiaan-Kubí bui in kaadaannea kon butá tanaa. Akuoi, ki Tuhan, ain nosingog.”