YEREMIA 31 - Alkitab Singog In Mongondow Masa In Tanaa

Israel nobui mangoi kon butánea tontaní

¹ Ki Tuhan in noguman, “Moiangoibí in wakutunea Akuoi mobaḻí Allah in bayongan suku in Israel, bo mosia in mobaḻí umat-Ku.

² Kon padang gurun Akuoi ain noponiata in tabi-Ku kon i monia inta ain noiḷagui kon popatoi. Kon dodai in umat in Israel notayak kon koodoman,

³ nongkon noyayú Akuoi nokipogontong kon i monia. Ei umat Israel, nongkon koḻipodpabímai Akuoi umuran monotabi kon i monimu, bo umuranbí doman in Akuoi moponiata kon Akuoi in umuranbí motabi kon i monimu.

⁴ Bangusamu in baḻíon-Kubí ponango-nangoian ná dungkuḷmai. Komintanpa doman moiko in mogamábí kon rebana bo motayok takin ḷunganga in gina.

⁵ Moiko in mobukabí kon gobá in anggur kon buḷud in Samaria, bo ki inta nomuḷa in mosipúbí doman kon bungainea.

⁶ Totuu, moiangoibí in wakutunea in moḷoḷukad mita kon kotá in momaḷú kon buḷud in Epraim, ‘Koḻigai in kita motakod kon Sion, kon i Tuhan Allah naton.’ ”

⁷ Ki Tuhan in noguman, “Podondongdon takin ḷunganga in gina kon i Israel, umat-Ku – bangusa inta pinoḷontú nongkon bayongan in bangusa. Podondongdon in dondong dodayow, bo potaaudon ‘Ki Tuhan ain noposaḷamat kon i inta ki agat in umat-Nea.’

⁸ Nongkon utuan dinia-Ku in mosia nobui; sinipun-Ku in mosia nongkon popod mita in butá. Intau bilog bo intau ḻempeng in moyotakinbí monia, bobay doman inta bagu nononggadí bo bobay inta dongkadon mogoḷat kon wakutu mononggadí. Mosia komintan in mamangoi mobayongbí totok in mamangoi in butá tanaa.

⁹ Mosia in mayá takin moḷabú in ḷuá, Ḻipoion-Ku bo kapiton-Ku in mosia. Diaan-Ku in mosia mongin tampat mita inta mobayong in tubig, mongin daḷan motondodai inta diá in kopintudan. Kon i Israel, Akuoi in naonda bo ki amá; Epraim in ki adí-Ku ḷoḷaki guya-guyang.”

¹⁰ Ki Tuhan in noguman, “Indongogai ei bangusa mita! Potaaudon in koyow-Ku modapot kon ḷoḷan in dagat Umat-Ku inta ain pinorarit-Ku in sipunon-Kubí bo biagon naonda bo gombala moḷukad kon dombanea.

¹¹ Umat in Israel ain pinosaḷamat-Ku, bo pinoḷuat-Kudon nongkon bangusa inta moropot.

¹² Mosia in mamangoi in Tombuḷud in Sion takin pogot motamburiang, poḷat modondong takin pia in gina popisí in bayongan inta inogoi-Ku kon i monia, gandum, ḷana, anggur, sapi bo domba. Mosia in mobaḻídon naonda bo taman inta mobayong in tubignea, bo diábí kodaitan in onu bo onu.

¹³ Kon dodai intua mongodeaga mita in motayok takin kinoibog in gina. Guyanga bo tayow mobiag tumpaḷa moḷunganga in gina, sin Akuoi in moḻipoibí kon i monia. Kuyang in gina monia baḷuian-Ku in pia in gina, robonoḷ in gina baḷuaian-Ku in ḷunganga in gina.

¹⁴ Imang mita in poguḻíon-Kubí in kaanon inta mobayong totok; bo bayongan inta paraḷuon in umat-Ku ogoi-Kubí. Akuoi, ki Tuhan, inta noguman.”

Tabi i Tuhan kon Israel

¹⁵ Ki Tuhan in noguman, “Kon Rama kinodongogan in ombaḷ, bo amui inta takindon in ajar in gina. Ki Rahel in nongombaḷ kon i adínea mita, sia in doíbí ḻipoion sin diádon in mosia.

¹⁶ Gogaiai in ombaḷmu bo paḻitai in ḷuámu! Diábí doman inta diá in mangaḻenea in inta iḷongasimu kon i adímu mita. Kon inimu oyúonbí in tontuḻínea, ki adímu mita in mobui nongkon butá in musung.

¹⁷ Oyúon in kamang kon inimu in kobiagan moiduduimai; ki adímu mita in mobuibí kon ḻipú tontaní.

¹⁸ Dinongog-Ku umat in Israel noguman takin robonoḷ in gina, ‘O Tuhan, kami naa in naonda bo biag inta diápa iyonok táe sinundú-Mu in kami sinbá motoindudui, bo tanaa kami in nosadiadon mobui mangoi kon ini-Mu. Dá, diádon in kami mobui, o Tuhan, Allah nami.

¹⁹ Iko ain sinoḻikudan nami, táe nomanasaḷ in kami kon aid tatua. Naonda in ihukum-Mu in kami, kinumuyung in kami sin norobonoḷ in gina. Nooyá in kami bo nobaḻí mokooyá popisí in binaradosadon kon dodai in noguodpa.’

²⁰ Israel, iko in adí inta kinotabi-Ku totok, adí inta totok in kinotabi, batoḷ in dodob-Ku. Pomuḷoi indoyóon-Ku in iko kotoropan-Ku in iko takin tanob. Iko in pinomia-Ku takin nopuḻing in tabi.

²¹ Tomponuotaidon in daḷan mita, posindogdon in tomponuotnea mita tayakdon in daḷan inta binayáanmu koḻipod. Ei, Israel, pobuidon! Pobuidon mangoi kon kotámu mita inta dungkuḷ.

²² Modapot in toonu moḻia-ḻiaw in ginamu, ei bangusa inta diá motoindudui kon i-Nakó? Akuoi in nomaḻídon kon inta mobagu kon dunia, tobatú inta diá notombuḷoi – naonda bo bobay diá motombuḷoi in moḷukad kon ḷoḷaki.”

Kobiagan mopia in umat i Allah kon singgai moiduduimai

²³ Ki Tuhan Inta Totok in mokawasa, Allah in Israel in noguman, “Aka umat-Ku binaḻí-Kudon ponango-nangoian ná dungkuḷmai, dá kon butá in Yohuda bo kon ḻipúnea mita yo kodongogandon bui intau in moguman, ‘Igumon mako ki Tuhan in momarakat kon tombuḷud motusi kon Yerusalem tampat pogutunan inta ain sinantú kon i-Nia.’

²⁴ Intau in mogutun kon Yohuda bo kon ḻipúnea mita. Kon tua in oyúon bidon in monononggobá bo mononombobiagon kon sapi bo dombanea.

²⁵ Mosia inta moḷopí in poguḻíon-Ku bui, bo inta moḷungkoyó popisí in ginogoi in pobotugon-Ku.

²⁶ Kon dodai intuata intau in mogumandon, ‘Naonda in nosiug noḷoḷot, mopiadon in korasaanku.’

²⁷ Akuoi, ki Tuhan, in noguman kon moiangoibí in wakutunea butá in Israel bo Yohuda puḻingan-Ku in intau bo bobiagon.

²⁸ Ná koḻipod Akuoi noḷukad kon i monia sinbá kon singgai moiduduimai Akuoi in morabut, morumbun bo morimumud kon i monia, natua doman Akuoi in moḷukad kon i monia sinbá Akuoi in moginrigon bo moposindog kon i monia bui.

²⁹ Kon dodai intua intau in diá bidon moguman bui, ‘Guyanga mokaan kon inta moboil, ingipon i adínea in mongilu,’

³⁰ táe ki ine bidon inta nokaan kon noboil, yo ingiponnea bidon tontaní in mongilu. Batúan in intau in matoibí popisí in dosanea tontaní.”

³¹ Ki Tuhan in noguman, “Moiangoibí in wakutunea Akuoi momia kon dodandian mobagu takin umat in Israel bo Yohuda.

³² Táe dodandian tatua in deemanbí ná dodandian inta pinomia-Ku takin mogoguyang monia kon dodai in mosia kinapit-Ku iḻumuai nongkon Mesir. Umpaka in Akuoi naonda bo ki buḷoi monia ḷoḷaki, táe mosia in nonoḻikud kon dodandian-ku takin i monia.

³³ Naa in dodandian mobagu inta bain pomiaan-Ku takin umat in Israel: Hukum-Ku mita in tagúon-Ku kon bonu in gina monia, bo paison-Ku kon gina monia. Akuoi in mobaḻí Allah monia, bo mosia in mobaḻí umat-Ku.

³⁴ Diá bidon paraḷu tobatúmai in intau nongkon i monia in mositundúan bá monotaau kon i Tuhan. Sin mosia komintan, moḷoben mointok, in monotaau bidon kon i-Nakó. Taḷá mita monia in ḻiongon-Ku bidon, dosa mita monia in ampungan-Kubí. Akuoi, ki Tuhan, ain nosingog.”

³⁵ Mata in singgai sinadia i Tuhan sin monimbayag kon tungkuḷ in singgai; buḷan bo tundi mita in monimbayag kon tungkuḷ in doḷom. Dagat in kinaui-Nea dá mobokoḷ monomburá, Ki Tuhan Inta Totok in mokawasa, tuata in tangoi-Nea.

³⁶ Ki Tuhan in nodandi, “Aka hukum in dunia naa bo diápa mobaḷui yo Israel in tantúbí oyúon saḷaku bangusa.

³⁷ Aka kuma kon singgai tobatú bo koukuran in ḷangit, bo apad in butá kotaridian, kon dodai intuata Israel in indoíon-Kudon popisí in bayongan in aid monia inta moraat. Akuoi, ki Tuhan, ain nosingog.”

³⁸ Ki Tuhan in noguman, “Moiangoibí in wakutunea bayongan in Yerusalem posindogon bui saḷaku kotá-Ku, nongkon Ḷangkeang in Hananeel modapot in Bonawang Sikunea.

³⁹ Nongkon tua bares in sigadnea mopobayá in Tombuḷud in Gareb, bo moboyuk ná Angob.

⁴⁰ Sinangkub in ḷopá tatua, inta pinaké saḷaku poḷoḷobongan bo tampat poḷoḷumbúan kon apat, bo bayongan in gobá tudunea kon bingkí in Ongkag in Kidron modapot kon Bonawang in Kabaḷo mopobayá ná pomukaan, in pinotondídon kon i-Nakó. Kotá in Yerusalem in diábí rumbunon bui andeka rimumudon.”