YEREMIA 3 - Alkitab Singog In Mongondow Masa In Tanaa

Israel diá motoindudui

¹ Ki Tuhan in noguman, “Aka buḷoi bobay gaaton i buḷoinea ḷoḷaki, bo bobay tatua in mobaḻídon ki buḷoi in intau ibanea, dá ki buḷoinea dungkuḷ in diá bidon motaau mogamá bui kon inia mobaḻí buḷoi, sin aid natua in mokogoguyaatbí kon butá tanaa. Iko Israel, in nobayongdon totok in ki buḷoimu, umpaka yo tanaa iko in moibog bui mamangoi kon i-Nakó!

² Ḷangagka, kon tudu mita in buḷud! Tampat táonda inta diápa dodai in onda in inangoianmu sin sumundaḷ? Naonda bo intau in Arab kon padang gurun, natuata in iko ḻimitú kon bingkí in daḷan mogoḷat mako kon intau inta moibog mopogogitog kon totabian. Iko in moponajis in butá tanaa pongin tuaḻing bo aidmu inta moraat.

³ Tuamai in tubig nongkon ḷangit diá moḷabú, bo uyan kon sempo in pononubú diá doman moiango-angoi. Iko in naonda bo bobay sundaḷ, bo diá kotoguoyá.

⁴ Kon dodai in rorigamu tatua iko in noguman kon i-Nakó kon Akuoi in ki amámu, bo Akuoi in motabi kon inimu pinangkoipamai iko nointokpa.

⁵ Iko in noguman doman kon Akuoi in diábí umuran tumorú kon inimu. Tuata inta siningogmu, ei Israel, táe kon dodai doman intua aidanmu doman in bayongan inta moraat inta motaau aidanmu.”

Israel bo Yohuda in musti tumobat

⁶ Kon tungkuḷ in pinomarentaan i Datu Yosia, ki Tuhan in noguman nanaa kon inakó, “Inontongmudon degá in onu inta inaidan in Israel, bobay inta diá motoindudui tatua? Sia in nonaḷámai kon i-Nakó bo sinumundaḷ kon bayongan tudu in buḷud inta moḷantud bo kon siungon in bayongan pangkoi in kayu inta mobambar.

^7-8 Irai-Ku naonda in sia momia kon tua mita, yo sia in mobuidon mangoi kon i-Nakó. Táe sia in diábí nobui, nodapotbí in minayá sinumundaḷ. Tuamai Akuoi in nogaat bo nopoguntun kon inia. Yohuda, ki utat in Israel, inta diá motoindudui tua in nokoontong kon tua komintan, táe sia in diábí inagían in ondok. Nodapotbí in sia dinumayan doman nobaḻí sundaḷ,

⁹ bo beresibí diá inagían in oyá. Sia in nonuaḻing popisí in nosumba kon batu bo pangkoi in kayu, dá butá tanaa in nobaḻídon nonajis.

¹⁰ Naonda in nogaid kon tua mita, Yohuda inta diá mosatia tua nobui kon i-Nakó táe tongá ki ubo-uboḷmai, sin ginanea in diábí notuḻid. Akuoi, ki Tuhan, ain nosingog.”

¹¹ Onda intua ki Tuhan nopotaau kon inakó kon umpaka Israel nonoḻikudon kon i-Nia, táe Israel in noniata magí in mopia-piabí kon Yohuda inta diá motoindudui tua.

¹² Ki Tuhan in nopotabá kon inakó mayá sin mopotaau in naa kon Israel: “Ei Israel inta diá mosatia, pobuidon mangoi kon i-Nakó! Akuoi in totokbí in motabi bo diábí mononoi in torú-Ku kon i monimu.

¹³ Akudon kon iko in kotaḷá bo ain nomarontak kon i Tuhan, Allahmu. Akudon kon bayongan siungon in pangkoi in kayu inta mobambar iko in nobogoidon in tabimu kon ilah mita in bangusa ibanea, bo diá dinumudui kon parenta-Ku mita. Akuoi, ki Tuhan ain nosingog.”

¹⁴ Ki Tuhan in noguman, “Ei umat inta diá mosatia, pobuidon mangoi kon i-Nakó! Moiko in Akuoi in kitogi. Akuoi in mogamábí kon inimu, tumongo batu in kon batúan in kotá, tododoyowa in kon batúan in inanakan, bo modia kon i monimu mobui kon Buḷud in Sion.

¹⁵ Akuoi in mobogoibí kon inimu in itoi mita inta motoindudui kon i-Nakó. Mosia in mobaḻí itoi monimu takin bijaksana bo momangaḻe kon i monimu.

¹⁶ Bo aka moiko modugangdon mobayong kon butá tanaa, yo intau in diá bidon mongonguman kon soaḷ Poti Dodandian-Ku. Mosia in diá bidon morai andeka monorop bui, nodapotbí in mosia diá bidon moparaḷu andeka mogaid kon Poti Dodandian ibanea.

¹⁷ Kon dodai intua kotá in Yerusalem in tangoiondon ḷoḻitúan ‘Pomomarentaan i Tuhan’, bo bayongan in bangusa in mosipun kon kotá tatua sin mosumba kon i-Nakó. Mosia in diá bidon dumudui kon ibog in gina monia inta pamandot bo moraat tua.

¹⁸ Israel in dumugangdon kon Yohuda, bo moyotakindon mamangoi nongkon butá pinoḷumbúan kon dotá in utuan. Mosia in mobuidon kon butá inta ain inogoi-Ku nobaḻí butá kapunyaan kon mogoguyangmu.”

Totuaḻingan in umat i Allah

¹⁹ Ki Tuhan in noguman, “Israel, Akuoi in moibog motarima kon inimu mobaḻí ki adí-Ku, bo mobogoi kon inimu in butá inta mokosanang, butá inta totuu mopia kon sinangkub in dunia. Ibogon-Ku iko in monangoi kon i-Nakó ki Amá, bo diádon moḷagui bui kon i-Nakó.

²⁰ Táe notongkai in buḷoi bobay inta diá mosatia, iko in diá doman nosatia kon i-Nakó. Akuoi, ki Tuhan, ain nosingog.”

²¹ Kon tudu in buḷud mita kinodongogan in dowawá; tua in singog in umat in Israel inta nongombaḷ bo noigum totok, popisí in mosia ain binaradosa, bo nokoḻiongdon kon i Tuhan Allah monia.

²² Ei moiko komintan inta ain nonaḷámai kon Tuhan, pobuidon mangoi! Sia in monompiabí kon i monimu, bo baḻíon-Nea in moiko motoindudui. Moiko in moguman, “Oo, tanaa kami in mamangoi kon i Tuhan, sin Sia in ki Allah nami.

²³ Diábí in mangaḻenea kami in noyotakin nosumba kon berhala mita kon tudu mita in buḷud! Totuḷung kon umat in Israel in tongábí mamangoi nongkon i Tuhan Allah nami.

²⁴ Posumbaan kon i Baal, berhala inta mokooyá tatua ain nokopopisí kon inami kinobuḻian in adí mita nami bo biag nami sapi bo domba, bayongan inta ain siniḷopían in mogoguyang nami nongkon dungkuḷpamai.

²⁵ Dá, pomayádon mako in kami in mobaba kon oyá, bo pomayádon mako in kami mobaḻí mohina. Sin, kami bo mogoguyang nami ain binaradosa kon i Tuhan Allah nami, bo diá kon dodai in onda in notoḷutui kon parenta-Nea mita.”