YEREMIA 26 - Alkitab Singog In Mongondow Masa In Tanaa

Ki Yeremia pinongadu kon pongadilan

¹ Naonda in ki Yoyakin ki adí ḷoḷaki i Yosia nobaḻí datu in Yohuda,

² Ki Tuhan in noguman kon inakó, “Bayádon sindog kon palas in Baḷoi-Ku bo posingogdon kon intau mita in Yohuda inta namangoi moibada kon tua. Potaaudon kon i monia komintan in bayongan inta pinoki potaau-Ku kon inimu. Dika gaatan tongopiḻikmai.

³ Degá bo bangusa tatua in moibog mokidongog, bo mogogaiddon in mogaid kon inta moraat, dá pondamon-Kudon in niat-Ku mopobodito kon i monia inta moraat.”

⁴ Ki Tuhan in nopotabá kon inakó moguman nanaa kon i monia, “Akuoi, ki Tuhan, ain nomarenta sinbá moiko in motoindudui kon i-Nakó bo mopobayá in hukum mita inta inogoi-Ku kon inimu.

⁵ Moiko in musti doman mokidongog kon onu inta pinoguman in mogogundoi-Ku mita, in nabi mita inta umuran potabá-Ku mamangoi kon inimu. Táe moiko in doí mokidongog kon i monia.

⁶ Aka moiko tantú momangkang, baḷoi pooibadaan tanaa in aidan-Ku naonda bo Silo, dá bayongan in bangusa kon dunia mopomaké in tangoi in kotá in Yerusalem naa saḷaku kutukan.”

⁷ Bayongan inta siningog-Ku kon Baḷoi i Tuhan tua dinongog in imang mita, in nabi mita bo in rayat.

⁸ Noḻikat naonda in nopaḷut mako in akuoi nopotaau in bayongan koyow i Tuhan ná inta pinarenta-Nea, dinomok monia in akuoi poḷat nomaḷú “Iko in mustibí matoi!

⁹ Mokobaḻíbí totok in iko in moguman podoyon kon tangoi Tuhan kon Baḷoi-Nea naa in mobaḻí naonda bo Silo, bo kotá tanaa in yompaton bo mobaḻí tampat inta diádon utunan.” Bo akuoi in iḻipung in intau mobayong.

¹⁰ Naonda in pojabat mita in pomarenta in Yohuda nokodongog kon onu inta ain nobaḻí, mosia in iḻimikatdon in iḻumuai nongkon komaḻig in datu bo minayá in Baḷoi Tuhan, bo iḻimitú kon Bonawang Mobagu.

¹¹ Imang mita bo nabi mita in noguman kon pojabat mita tatua takin rayat, “Intau tanaa in patusbí hukumon matoi sin nosingogdon in sia kon tosingogon ponayow kon kotá naton naa. Moiko tontaní ain nokodongog kon tua.”

¹² Bo akuoi in noguman, “Ki Tuhan in nopotabá kon inakó nopotaau in koyow inta monayow kon Baḷoi Tuhan bo kotá tanaa ná inta ain dinongog monimu.

¹³ Tuamai in baḷuiaidon in kobobiagmu bo oaidmu mita; Duduiaidon in ki Tuhan Allahmu, sinbá pondamon-Neadon in niat-Nea mopobodito kon i monimu.

¹⁴ Soaḷ akuoi, totuu kon akuoi in kon bonu in kawasamu in mopoaid kon onukabí in koibogmu.

¹⁵ Táe torop, aka moiko moḻimod kon inakó, moiko bo intau in kotá tanaa in mobaba kon taḷá kon pinoḻimodan kon intau inta diá kotaḷá. Sin, ki Tuhanbí inta nopotabá kon inakó mobogoi in tompoingat tatua kon inimu.”

¹⁶ Dá pojabat mita in pomarenta bo rayat in noguman kon imang mita bo nabi mita tatua, “Intau tanaa in nosingog pinodoyon kon tangoi Tuhan Allah naton; diábí patus hukumon matoi in sia.”

¹⁷ Nopaḷut mako kon tua tongonumai in kon sigad in itoi mita in bangusa minayá sinimindog kon muna bo noguman kon intau mita inta noyosipun kon tua,

¹⁸ “Kon tungkuḷ in ki Hizkia nobaḻí datu in Yohuda, ki Nabi Mikha nongkon Moresyet nopotaau kon rayat in koyow tanaa nongkon i Tuhan Inta Totok in mokawasa, ‘Sion in pajekoon naonda bo gobá in tudunea, Yerusalem in mobaḻí pinosipunan kon apug, bo tombuḷud in Baḷoi Tuhan in mobaḻídon kayuon.’

¹⁹ Táe ki Datu Hizkia bo intau in Yohuda in diábí noḻimod kon i Mikha. Nodapotbí in noondok in ki Hizkia kon i Tuhan bo nopoigum sinbá totabion. Dá ki Tuhan in nonginggamádon kon indoyó-Nea kon mopobodito kon i monia. Bo tanaa, gogiódon in kita mopoangoi in bodito moḷoben kon inaton tontaní.”

²⁰ Nokoimontan doman in intau ibanea in nopoyaput in tosingogon ponayow kon kotá tanaa bo bangusa tanaa pinodoyon kon tangoi Tuhan, ná inta inaidanku. Intau tatua tangoinea in ki Uria ki adí i Semaya nongkon Kiryat-Yearim.

²¹ Kon tungkuḷ in ki Datu Yoyakin takin porwiranea mita bo pojabat mita in pomarenta nokodongog kon tosingogon mita i Uria, ki datu in moḷongasi moḻimod kon inia. Táe kinodongogan i Uria in tua bo inagían in ondok bo minayá noḷagui kon Mesir.

²² Táe ki Datu Yoyakin in nopotabá kon i Elnatan ki adí i Akhbor takin tongonumai in intau ibanea minayá in Mesir bo nogamá kon i Uria.

²³ Bo dinia monia in sia nobui minayá kon i Datu Yoyakim. Onda intua pinoki ḻimod in datu in sia, bo mayatnea in iḷumbú kon poḷoḷobongan kon bayongan in intau.

²⁴ Táe tanaa noidoyon kon totuḷung i Ahikam ki adí i Sapan, akuoi ki Yeremia diábí inogoi kon rayat sin ḻimodon.