YEREMIA 24 - Alkitab Singog In Mongondow Masa In Tanaa

Doyowa nokaransi in bungai in ara

¹ Kon singgai tobatú naonda in ki Yoyakhin ki adí ḷoḷaki i Yoyakin datu in Yohuda noyotakin in pojabat pomarenta in Yohuda, mongogurig mita bo intau mita inta totok in motaau mogaid kon oaidan monia inakut i Nebukadnezar datu in Babel, bo dinia saḷaku intau dinakop nongkon Yerusalem pinobayá in Babel, ki Tuhan in nobogoi in tobatú oontongon kon inakó. Akuoi in nokoontong kon karansi doyowa binonuan in bungai in ara noiukat kon tayowon in Baḷoi Tuhan.

² Karansi inta dungkuḷ in binonuan in bungai in ara inta mongopia, ná bungai in ara inta pinomungai dungkuḷ, bo karansi inta nogindua binonuan in bungai in ara inta nongoburuk, dá diá motaau kaanon.

³ Bo ki Tuhan in noguman kon inakó, “Yeremia, onu in inontongmu?” Akuoi in notubag, “Bungai in ara, Tuhan. Inta mongopia in totok in mopia, bo inta nongoburuk in totokdon in diá mopia dá diádon motaau kaanon.”

⁴ Dá ki Tuhan in noguman bui,

⁵ “Intau mita inta ain pinomayá-Ku inakut pinobayá in Babel tua in inanggap-Kudon ná bungai in ara inta mongopia tanaa; tuamai Akuoi, Tuhan, Allah in Israel, in mopomiabí kon i monia kopiraan.

⁶ Akuoi in moḷukadbí kon i monia bo modia kon i monia mobui mangoi kon butá tanaa. Akuoi in moposindogbí bui, deemanbí morumbun kon i monia; Akuoi in momuḷabí, deemanbí morabut kon i monia.

⁷ Akuoi in mobogoibí kon i monia in ibog sinbá momangaḻe kon Akuoibí in Tuhan. Dá mosia in mobaḻídon umat-Ku, bo Akuoi in mobaḻí Allah monia, popisí in mosia mobuidon mangoi kon i-Nakó takin ḻimbatú in gina.

⁸ Táe ki Zedekia datu in Yohuda, takin pojabat mita inta modagin kon inia, bo ki agat in intau in Yerusalem inta umuran nogutun kon bonu in butá tanaa andeka inta nomamping kon Mesir, mosia komintan in aidan-Kubí ná bungai in ara inta nongoburuk tanaa, inta diá motaau kaanon. Akuoi, ki Tuhan, ain nosingog.

⁹ Akuoi in mopoboditobí kon i monia námai tua modapot in bayongan in bangusa kon sinangkub in dunia mobaḻídon moondok. Kon ondakabí in pobogoian-Ku kon i monia, mosia in singkuḻeonbí, binaḻí kokosingan bo rebegonmai. Tangoi monia in pakéon mobaḻí kutukan.

¹⁰ Akuoi in mopoangoibí kon i monia in parang, gogoy, bo yampoi in takit dá mosia komintan in matoi bo diá in kotaḷáan kon butá tanaa inta ain inogoi-Ku kon i monia bo kon mogoguyang monia.”