YEREMIA 20 - Alkitab Singog In Mongondow Masa In Tanaa

Ki Yeremia nobobayowan i Imang Pasyhur

¹ Ki Imang Pasyhur ki adí i Imer in tongguḷu in moḷoḷukad kon Baḷoi Tuhan. Naonda in dinongognea in akuoi nopotaau in bayongan tua,

² pinarentanea sinbá bongkugon in akuoi bo umantungan kon Bonawang in Benyamin, bonawang kon dotá in ḻimonik kon Baḷoi Tuhan.

³ Doḷo-doḷom nobangon monik naonda in ki Pasyhur nomuḻi kon inakó nongkon pinoumantungan, akuoi i noguman kon inia, “Tangoi inta bain ogoi i Tuhan kon inimu in deeman bidon ki Pasyhur, táe ‘Sindoyó kon bayongan in tampat’.

⁴ Ki Tuhan tontaní in noguman, ‘Iko in baḻíon-Ku sindoyó kon inimu tontaní bo kon i yobayatmu mita. Iko in mokoontongbí kon i monia in ḻimodon in musung monia. Bayongan in intau in Yohuda in pomayá-Kubí mako in kawasaan in datu in Babel; tongosilai kon i monia in akuton nobaḻí intau dinakop pobayá in Babel, bo ki agatnea in ḻimodon.

⁵ Musung monia in pomayá-Ku doman mako in mogamá bo mogakut pobayá in Babel in bayongan kaoyúonan in kotá tanaa, bo bayongan in kapunyaannea, nodapotbí in pakakat mita pusaka in datu mita in Yohuda.

⁶ Bo iko, Pasyhur, takin bayongan in motoḷuadímu in domokon doman bo akuton pobayá in Babel. Kon tua matoi in iko bo ḷobongon; natua doman in bayongan in yobayatmu inta ain nokidongog kon uboḷmu mita.’ ”

Ki Yeremia nogamui kon i Tuhan

⁷ Tuhan, Iko in nodondouḷug kon inakó bo akuoi in kinodondouḷugandon. Iko in moropo-ropot in akuoi bo nopokuyungdon kon inakó. Akuoi in irupa-rupamai in bayongan intau, siningkuḻe nongkon doḷo-doḷom dapot in ḷoḷabungnea.

⁸ Pomuḷoi in akuoi mosingog, musti in akuoi momaḷú rumopot totok, “Ḷoḻinga! Bodito!” Tuhan, akuoi in irebeg bo siningkuḻe pomuḷoi mako, popisí in nopotaau in koyow-Mu.

⁹ Táe aka kon bonu in ginaku akuoi in moguman, “Biódon mako ki Tuhan in ḻiongonkudon, doídon in akuoi mosingog podoyon kon tangoi-Nea,” dá koyowmu in naonda bo tuḷú inta moborambang kon bonu in dodobku. Aindon sinungkuḷanku pinondam, táe diá mokoigon in akuoi.

¹⁰ Kodongogan in intau moyogombong kon bayongan in tampat, “Ondok in mongawasa! Igai pongaduon in sia kon i inta nongawasa!” Nodapotbí in bayongan in topotakinku modagin mogoḷat mako kon koḷabúanku. Guman monia, “Degá pongin dondouḷug, kotaḷowan in sia, sinbá motaaudon in kita motuḻí kon yaat in gina kon inia.”

¹¹ Táe Iko, o Tuhan, in kon dotáku; Iko in totok in moropot bo motorindog. Mosia inta mogaḷow bo mondorot kon inakó in moḷabúbí bo kodaitan in daya. Mosia in mooyábí modapot in mononoi, diádon in notuoi in bayongan tomayá monia. Koempengan monia tua in umuranbí toropon.

¹² Táe, o Tuhan Inta Totok in mokawasa, takin aid moadil sinungkuḷan-Mu in intau; Kinotaauan-Mu in gina bo raian monia. Tuamai in ogoipa in akuoi moindoi kon ini-Mu motuḻí kon aid moraat in musung sin pelekaraku tanaa in poposarakankubí kon ini-Mu.

¹³ Podondongdon kon i Tuhan bo dayowdon in Sia sin Sia in mopoḷuat kon intau inta dinorot in intau moraat.

¹⁴ Kinutukdon in singgai kinoḷontaganku! Biódon mako noempeng kon dodai in akuoi pinononggadí i ináku.

¹⁵ Kinutukdon doman in intau inta nodia kon habar inta nokoḷunganga totok kon i amáku, kon dodai in pinotaau kon inia, “Iko in nokouḻí kon adí ḷoḷaki!”

¹⁶ Biódon mako ki inta nodia kon habar tatua in naonda bo kotá mita inta irimumud i Tuhan takin diá in tabi. Biódon mako in sia mokodongog kon karak monakit kon dodai in doḷo-doḷom, bo kokow in parang kon dodai in noutu in singgai.

¹⁷ Sin sia in diá noḻimod kon inakó kon tungkuḷ in akuoi kon bonupa in sian, sinbá akuoi in umuranpa kon bonu in sian i ináku bo bobuḷadíannea in mobaḻí poḷoḷobongan kon inakó.

¹⁸ Nongonu sin akuoi in mustibí pononggadí? Degá tongábí bá mororiga bo mosusa? Bo degá bá kobiaganku in moitaḻib kon bonu in oyá?