YEREMIA 2 - Alkitab Singog In Mongondow Masa In Tanaa

Tabi i Allah kon Israel

¹ Ki Tuhan in nopotabá kon inakó

² nopotaau in koyow tanaa kon bayongan in intau kon Yerusalem, “Ei Israel, kinotoropan-Ku kon iko in totok in motoindudui kon tungkuḷ in iko noguodpa; totuu moḷoben in tabimu kon tungkuḷ in kita bagupa notonibuḷoi. Minayá in padang gurun in Akuoi dinuduianmu nongin butá inta diá sinompinomuḷaan.

³ Israel, iko in Akuoi tontaní in kitogi, batoḷ in dodob-Ku inta kinotabi-Ku. Akuoi in nopouma in bodito kon bayongan in intau inta nopororiga kon inimu, Akuoi, ki Tuhan, ain nosingog.”

Dosa in mogoguyang in bangusa in Israel

⁴ Indongogai in koyow i Tuhan, ei moiko buí i Yakub, suku mita in Israel!

⁵ Ki Tuhan in noguman, “Taḷá onu in nouḻí in mogoguyangmu kon i-Nakó, nodapot in mosia nomaḻidawan kon i-Nakó? Mosia in nomatuk kon berhala inta diá in mangaḻenea bo imbuitnea mosiadon tontaní in nohina.

⁶ Akuoi in diádon pinandungmai; Akuoi, inta ain nokapit kon i monia kon daḷan, bo nodia kon i monia iḻumuai nongkon Mesir sinumaḻib kon rawang in bungaion, tampat inta diá in mobobiag inta nobayong in pobeukan, bo inta noingkag bo mokoanib doman – tampat inta diá inutunan bo diá bayáanmai!

⁷ Mayá in butá inta mopia inatod-Ku in mosia sin mokaan kon bungai mita in pinomuḷa bo bayongan in inta mopia kon tua. Táe kon tua butá-Ku in pinonajisdon monia bo kapunyaan-Ku in binaḻí monia mokorongó.

⁸ Imang mita diá in moḻibó kon onda in Akuoi, Tuhannea. Intau mita inta nokadai kon hukum in diá doman nonotaau mongo ki ine in Akuoi, mongongawasa mita in nomarontak kon i-Nakó. Nabi mita in mosingog podoyon kon tangoi in Baal, bo nosumba kon berhala inta diá in baragunanea.”

Inta pinonapud i Tuhan kon umat-Nea

⁹ Ki Tuhan in noguman, “Tanaa in umat-Ku in pinelekara-Ku bui, bo buínea in sisigan-Ku.

¹⁰ Bayádon pongin bingkí in dagat in Siprus kon dotá in toyopan, potabádon in intau mayá in dotá in utuan kon butá in intau in Kedar, taridiaidon kon tua kotaridion, mongo nokoimontandon in nobaḻí in natua?

¹¹ Diápabí nokoimontanmai in bangusa tobatú in noponoḻiu in ilahnea umpaka tua deeman Allah totu-totuu. Táe, umat-Ku in noponoḻiudon kon i-Nakó, inta mokoyunggagá kon i monia sinoḻiuan monia in ibanea mako inta diá mokoaid kon onu bo onu.

¹² Manangka intua, ei ḷangit, kodandúdon! Moitongau bo kourotdon!

¹³ Umat-Ku ain nogaid kon doyowa norupa in dosa: mosia in nonoḻikud kon i-Nakó, bokaká in tubig mobogoi in kobiagan kon intau; mosia in nogaid kon tabang noḷombang inta diá mokosion kon tubignea.”

Bungai in aid inta diá motoindudui in Israel

¹⁴ “Israel in deemanbí ata, deemanbí doman buí in ata. Táe nongonu sin sia in nobaḻí bidon kokaanon in musungnea?

¹⁵ Musungnea in noganggor kon inia naonda bo singa, butánea in binaḻídon noḷogat bo diá in mangaḻenea, kotánea mita in nodait kinaan in tuḷú, pinomayádon mako diá in mogogutun.

¹⁶ Ei Israel, buokmu in ginonsingan in intau in Mempis bo Tahpanhes.

¹⁷ Iko tontaní in nokopopisí kon bayongan inta nobaḻí kon inimu, sin kon tungkuḷ in iko kinapit-Ku kon binayáan, iko in nonoḻikud kon i-Nakó, Ki Tuhan Allahmu.

¹⁸ Onu in mangaḻe in binayáanmu in Mesir? Monginum degá kon tubig in Ongkag in Nil? Onu in mangaḻenea in bayáanmu in Asyur? Monginum degá kon tubig in Ongkag in Eprat?

¹⁹ Aidmu tontaní inta moraat in mohukum kon inimu tontaní iko in nororiga popisí in nondoí kon i-Nakó, ki Allahmu. Tanaa in nanamnea totuu mopait bo mopomporí aka Akuoi toḻikudanmu bo diá horomatonmu. Akuoi, ki Tuhan Allahmu ain nosingog; Akuoibí in Tuhan Inta Totok in moḷantud bo Inta Totok in mokawasa.”

Israel doí mosumba kon i Tuhan

²⁰ Ki Tuhan in noguman, “Ain noonggot iko in doí mogundoi kon i-Nakó; doí dumudui andeka mosumba kon i-Nakó. Kon bayongan tudu in buḷud inta moḷantud, bo kon siungon in bayongan in pangkoi in kayu inta mobambar iko in mosumba kon dewa mita mopoḷumbá.

²¹ Iko in pinomuḷa-Ku naonda bo pangkoi in anggur inta piniḻí-Ku nongkon batoḷ inta totok in mopia. Táe tanaa nobaḷuidon in iko, nobaḻídon pinomuḷa ḷoḷog bo diádon in baragunanea.

²² Umpaka iko moinggú bo mogisabong mobayong, táe tamak mita in taḷámu koontongan-Kupabí doman.

²³ Totuu mokobaḻí in iko in mosingog kon iko in diá moromú, bo Baal in diábí kon dodai in onda in dinuduianmu! Indoiai in dodiamu kon ḷopá, torop in aidmu moraat bo akudon! Iko in naonda bo unta kobaayan inta iḷanúan in ibog, moribatuk mamagí mamako diádon koḷamboian,

²⁴ bo mayá in padang gurun inta moingongow. Sia in diádon kodomokan aka koyogot in ḷanuan in ibog. Inta mongibog kon inia in diá bidon paraḷu motayak magí mako, sin kon tungkuḷ in ḷanuannea yo sia bidon tontaní in motayak.

²⁵ Israel, dikabí in iko moribatuk in mogaḷow kon dewa mita, bo dikabí momaḷú in mogoiní kon i monia, sinbá diá tompaḻían in sioḷmu bo moingkag in sigogowmu popisí in morogang. ‘Diá, akuoi in diá bidon mobui,’ gumanmu, ‘sin akuoi in moibog kon dewa mita, bo moibog dumudui kon i monia.’ ”

Israel in patus hukumon

²⁶ Ki Tuhan in noguman, “Naonda bo mononakow inangoian in oyá naonda in kinodomokan, natuata in moiko komintan in mooyábí doman, ei intau in Israel, datu mita bo intaumu mita moḷoben, imang mita bo nabimu mita!

²⁷ Moiko in pokopooyáanbímai, sin kayu topongkó oiníon monimu ki amá bo batu tobatú oiníonmu iná. Moiko in deemanbí mamangoi kon i-Nakó, táe nonaḷábímai kon i-Nakó. Táe aka moiangoidon in roriga, yo Akuoibí in oiníon monimu sinbá mamangoi moposaḷamat kon i monimu.

²⁸ Kon onda in berhalamu mita inta pinomia monimu tua? Aka oyúon in roriga, yo kuanidon in mosia moposaḷamat kon i monimu, aka mokoposaḷamat in mosia! Ei Yohuda, dewamu mita in ná kobayong in kotámu mita!

²⁹ Onu degá in kinodoí monimu kon i-Nakó nodapot in moiko moḷawang kon i-Nakó?

³⁰ Diábí in mangaḻenea in pohukuman-Ku kon i monimu sin moiko in doíbí motarima kon toboḷow. Ná singa inta koyogot in tumorú, natuata in moiko moḻimod kon nabimu mita.

³¹ Ei umat Israel, indongogai in singog-Ku mita tanaa. Nokoimontandon degá in Akuoi naonda bo padang gurun kon i monimu andeka naonda bo butá inta sinimindip? Táe nongonu sin moiko in mogumanbí kon moiko in moibog moiḷuat bo doídon mobui mangoi kon i-Nakó?

³² Oyúon degá in mongodeaga inta mokoḻiong kon ḷambánea, andeka nonikaan bobay inta mokoḻiong kon ḷambung nonikaannea? Táe moiko in noonggotdon totok in nokoḻiong kon i-Nakó – nongkon tungkuḷpabí inta diádon koiapan in koonggotnea.

³³ Moiko in totuu mopandoi in mogaid kon siasat sinbá mokoangá kon gina in intau mita inta kinoibogmu. Bobay sundaḷpa inta totok in moromú in mobalajarpabí doman kon inimu!

³⁴ Ḷambungmu in notamak in dugú in intau bogá bo in intau inta diá kotaḷá, deemanbí dugú in mononakow inta kinodomokan. Tongá umpaka natua,

³⁵ moiko in moguman doman kon moiko in diá kotaḷá, bo Akuoi in diá bidon sinumorú kon inimu. Táe Akuoi ki Tuhan, in mohukumbí kon i monimu popisí in moiko in doí mongaku kon moiko in kotaḷá.

³⁶ Moḷamemet totok in moiko in mayá kon dewa mita in bangusa ibanea sin mokituḷung! Moiko in notantú bidon kon pokudaion in Mesir, notongkai in moiko pinokudai in Asyur.

³⁷ Moiko in monaḷábímai kon Mesir takin kudai bo mooyá. Akuoi, ki Tuhan, ain nondoí kon i monia inta pongata-ngata monimu; moiko in diábí mokouḻí kon kauntungan onu bo onu nongkon i monia.”