YEREMIA 19 - Alkitab Singog In Mongondow Masa In Tanaa

Kendi inta nobotak

¹ Ki Tuhan in nopotabá kon inakó notaḷui kon kendi, bo nonongganut kon tongonumai in itoi in bangusa bo tongonumai in imang inta nongogurangdon mita,

² sin mayá moyotakin monia mayá in Ḷopá in Hinom mongin Bonawang Beling. Kon tua akuoi in musti mopotaau kon onu inta pinongoyow-Nea kon inakó.

³ Akuoi in musti moguman nanaa, “Ei datu mita in Yohuda bo intau in Yerusalem! Indongogai in singog poguman-Ku kon inimu, Akuoi ki Tuhan Inta Totok in mokawasa, Allah in Israel. Akuoi in mopoangoi in bodito moḷoben kon tampat tanaa dá intau inta mokodongog in moitaḻikokog.

⁴ Tua in aidan-Ku sin bangusa tanaa in nonaḷádon kon i-Nakó. Mosia in noponajisdon in tampat tanaa pinongin noposumba in kuruban kon dewa mita inta diá kinotaauan monia, kon i mogoguyang monia bo kon datu mita in Yohuda. Mosia in nomonu doman kon tampat tanaa in dugú in intau mita inta diá kotaḷá.

⁵ Mosia in noposindogdon in mezbah kon i Baal sin moposumba in adí mita monia nobaḻí kuruban payongon, bokaka Akuoi in diábí kon dodai in onda in nopotabá kon i monia nogaid kon tua, nodapotbí in diábí kon dodai in onda in ná tatua nomuká kon bonu in raian-Ku.

⁶ Tuamai, moiangoibí in wakutunea in tampat tanaa diádon tangoion Topet andeka Ḷopá in Hinom, táe Ḷopá Bidon Pororataan.

⁷ Kon tampat tanaa pogogaion-Ku in bayongan tomayá in intau in Yohuda bo intau in Yerusalem. Mosia in pomayá-Kubí in taḷowon in musung mita monia bo ḻimodon kon poparangan. Mayat monia in pomayá-Kudon mako in kaanon in ḷagapan bo mahaḷuk mokokaan kon mahaḷuk ibanea.

⁸ Akuoi in mopoantugbí in bodito inta motoyang kon kotá tanaa dá modapot in bayongan in intau inta moitaḻib kon tua in moitaḻikokogbí bo mokoningkim.

⁹ Musung in moḻipungbí kon kotá tanaa, bo moḷongasi moḻimod kon intau inta nogutun kon bonunea. Pongopungan tatua in námaidon tua in kotoyangnea, nodapot in intau mita kon kotá tanaa mosikaanandon kon tumpaḷa yobayat, nodapot in ki adí mita monia tontaní.”

¹⁰ Onda intua ki Tuhan in nopotabá kon inakó noḷosi kon kendi tatua kon tayowon in intau mita inta dinumudui kon inakó.

¹¹ Akuoi in mustibí moguman kon i monia kon ki Tuhan Inta Totok in mokawasa noguman nanaa, “Bangusa bo kotá tanaa in rimumudon-Kubí dá mobaḻí naonda bo kendi inta norimumud tatua inta diá bidon motaau tompiaan bui. Intau in moḷobongbí kon mayat mita monia kon Topet, sin diádon in poḷobongan ibanea.

¹² Kotá tanaa takin intau inta nogutun kon bonunea in baḻíon-Kubí naonda bo Topet.

¹³ Bayongan in baḷoi kon Yerusalem bo bayongan in baḷoi in datu mita in Yohuda in mobaḻíbí monajis naonda bo Topet; sin kon tudu in atop in baḷoi mita tatua ain sinubá in dupa sin posumba kon dewa mita in ḷangit, bo moposumba in anggur kon dewa mita ibanea.”

¹⁴ Bo akuoi in nonaḷámai kon Topet, tampat inta pinopotabáan kon inakó nopotaau in koyow i Tuhan. Akuoi in minayá kon dangkuḷon in Baḷoi Tuhan bo sinimindog kon tua, bo nopotaau kon bayongan in intau,

¹⁵ kon ki Tuhan Inta Totok in mokawasa, Allah in Israel in noguman nanaa, “Popisí in moiko pamandot bo doí mokidongog, dá Akuoi in mopoangoibí kon kotá tanaa bo kon bayongan in ḻipú kon diugneamai in bayongan bodito inta ain sinomayá-Ku.”