YEREMIA 18 - Alkitab Singog In Mongondow Masa In Tanaa

Ki Yeremia kon baḷoi in intau momomia kon kuyon

¹ Ki Tuhan in noguman kon inakó,

² “Bayádon kon baḷoi in intau mogogaid kon kuyon butá; kon tua potaau-Ku kon inimu in koyow-Ku.”

³ Dá minayádon in akuoi kon baḷoi in intau mogogaid kon kuyon butá bo inontongku yogot in sia mogaid nopomaké in pakakat poḷoḷamag.

⁴ Aka kuyon inta koyogot inaidannea tua diá totok in mopia, dá buionnea pomiaan mobaḻí kuyon inta ibanea podudui in kinoibognea.

⁵ Bo ki Tuhan in nopotabá kon inakó noguman kon umat in Israel,

⁶ “Ei umat-Ku, umpaka dá diá in Akuoi mokoaid kon inimu ná inta inaidan in mogogaid kon kuyon tatua takin butá ḷamentongnea? Naonda bo butá ḷamentong kon ḻima in mogogaid kon kuyon, natua doman moiko in kon bonu in kawasa-Ku.

⁷ Aka kon singgai tobatú Akuoi monantú kon mogamá, morumbun bo morimumud kon bangusa tobatú andeka dodatuan,

⁸ bo bangusa tatua in mogogaidon nongkon dosanea, dá Akuoi in monginggamádon kon niat-Ku tatua.

⁹ Noyotoḻikud kon tua, aka Akuoi monantúdon kon moposindog andeka moginrigon kon bangusa tobatú andeka dodatuan,

¹⁰ táe noiduduimai kon tua bangusa tatua diá motoḷutui kon i-Nakó bo nogaid kon inta moraat, dá niat-Ku tua in inggamáan-Kudon.”

¹¹ Ki Tuhan in noguman kon inakó, “Tanaa, pogumandon kon intau mita in Yohuda bo intau in Yerusalem kon Akuoi in koyogotdon in momia kon tomayá moḷawang kon i monia, bo moposadia in hukuman kon i monia. Potabádon in mosia monaḷámai kon kobobiag inta binaradosa tatua poḷat monompia kon dodia bo gogutú monia.

¹² Táe mosia in motubagbí, ‘Onu in baragunanea? Kami in umuranbí dumudui kon ibog nami tontaní! Kami kon batúannea in mogaidbí kon ibog in gina nami inta moraat!’ ”

Umat in Israel nonaḷámai kon i Tuhan

¹³ Ki Tuhan in noguman, “Ḻibódon kon batúan in bangusa mongo nokoimontandon in nobaḻí in ná tanaa. Umat in Israel ain nogaid kon inta mokokoningkim!

¹⁴ Diá kon dodai in onda in salju moinggamá nongkon buḷud in batu kon Libanon. Diá kon dodai in onda tubig moonow inta noiḻig kon buḷud in noingkag.

¹⁵ Táe umat-Ku in noḻiongdon kon i-Nakó, bo notubá kon dupa sin posumba kon berhala. Mosia in noipintud kon daḷan dungkuḷmai inta musti bayáan monia, bo sinumabat kon daḷan inta diápa sinondodai.

¹⁶ Butá tanaa in binaḻídon monia tampat inta mokokoningkim, bo modapot in mononoi in singkuḻeon. Bayongan intau inta moitaḻib in momombiḻing sin mokoningkim.

¹⁷ Naonda bo ḷobud inirup in tompot in pomukaan, natuata in umat-Ku porariton-Ku kon tayowon in musung. Aka moiangoi in anib, toḻikudan-Kubí in mosia bo diábí motuḷung kon i monia!”

Yopopogan inta moḷawang kon i Yeremia

¹⁸ Intau in moguman, “Igai moyopopog in kita moḷawang kon i Yeremia. Deemanbí tongá sia in motaau mosingog kon i Allah. Umuranbí oyúon in imang inta motaau mobogoi in topotundú, oyúon in intau mobijaksana in motaau mobogoi in tonggina; bo oyúon in nabi in motaau mopotaau kon i naton in koyow mita nongkon i Allah. Igai pongaduon naton in sia kon pongadilan bo diádon mokidongog kon tosingogonnea mita.”

¹⁹ Dá nosambayang in akuoi, “Tuhan, indongogaipa in sambayangku; taridiaipa kaasí onu inta siningog in musungku soaḷ akuoi!

²⁰ Patus degá in mopia tuḻían in inta moraat? Táe mosia in nongaḻidon kon bubú sinbá moḷabú in akuoi kon bonunea. Toropdon kon akuoi noduḷudon kon i monia kon tayowon-Mu, sinbá diá in Iko tumorú kon i monia.

²¹ Táe tanaa, Tuhan, biódon mako in adí mita monia matoi in gogoy andeka matoi kon poparangan. Biódon mako in bobay mita monia kobuḻian in buḷoi ḷoḷaki bo adí; biódon mako in ḷoḷaki mita matoi popisí in yampoi in takit bo intau moguod in matoi kon poparangan.

²² Potabádon in mogogagow daḻí mamangoi kon baḷoi monia, dá kumarak in mosia popisí in ondok. Mosia in nongaḻidon kon bubú sinbá moḷabú in akuoi kon bonunea, bo mosia in notaandon kon potait sin podomok kon inakó.

²³ Táe iko, Tuhan, nonotaau kon bayongan inta sinomayá monia sin moḻimod kon inakó. Tuamai, dika mongampung kon i monia; dika momopat kon taḷá monia. Bongkugdon in mosia modapot in moḷabú. Aidaidon kon i monia podudui in torú-Mu.”