YEREMIA 16 - Alkitab Singog In Mongondow Masa In Tanaa

Ibog i Tuhan kon i Yeremia

¹ Ki Tuhan in noguman bui kon inakó, kai-Nia,

² “Dika motonibuḷoi bo mokouḻí kon adí kon tampat tanaa.

³ Potaau-Ku kon inimu onu in mobaḻí kon adí mita inta pononggadí kon naa bo takin guyanganea.

⁴ Mosia in matoi kotugatan in yampoi in takit inta mokopatoi, bo mosia in matoi kon poparangan andeka matoi in gogoy. Diábí tobatúmai in intau in mongombaḷ andeka moḷobong kon i monia. Mayat monia in moirarit magí mako naonda bo pupuk kon butá, bo kaanon in ḷagapan bo mahaḷuk inta mokokaan kon tapú.

⁵ Dika mayá in baḷoi in intau inta koyogot in nonogumatoi, Yeremia. Dikabí monogumatoi kon i ineka. Akuoi in diá bidon momarakat kon umat-Ku bui takin kobiagan motompia, bo diádon doman mopoontong in tabi bo tanob kon i monia.

⁶ Intau nooyúon bo nobogá kon butá tanaa in matoi bo diábí in moḷobong kon i monia. Diábí tobatúmai in intau in rumoriga andeka mokiḷogat in uḷunea saḷaku tomponuot nonogumatoi kon i monia.

⁷ Diábí doman in moibog mogaid kon ponusaan sin moḻipoi kon intau inta nonogumatoi. Diábí in dinumudui nonogumatoi nodapotbí kon intau inta kinopatoian i amá andeka i inánea.

⁸ Dika tumuot kon baḷoi in intau inta koyogot in nononbobutungan. Dika mongaan monginum takin i monia.

⁹ Indongogai in onu in inta potaau-Ku, Tuhan Inta Totok in mokawasa, Allah in Israel in noguman kon inimu. Singog ḷunganga in gina bo pia in kamang takin rame in bobutungan ponikaan in pogogaion-Ku komintan. Tua in indoianbí mako in intau mita inta nobiag kon tungkuḷ in iko nobiag.

¹⁰ Aka iko in mopotaau in naa komintan kon i monia, degá ḻibóon monia nongonu sin Akuoi in mohukumbí kon i monia námai tua in kobogatnea. Mosia in moḻibóbí onu in taḷá bo dosa monia kon i-Nakó, ki Tuhan Allah monia.

¹¹ Potaaudon kon i monia kon Akuoi in noguman nanaa, ‘Mogoguyangmu ain nonaḷámai kon i-Nakó sin mosumba bo moibada kon ilah mita ibanea. Mosia in nonaḷámaidon kon i-Nakó bo doí tumoḷutui kon atorang-Ku mita.

¹² Táe moiko in nogaid kon moiḻiu in raat bui. Moiko in pamandot bo tongá dumudui kon ibogmu tontaní inta moraat. Moiko in doí tumoḷutui kon i-Nakó.

¹³ Tuamai, moiko in poguntunon-Ku nongkon butá tanaa bo ḷumbúon-Ku kon butá inta totokbí in diá kinotaauanmu bo in mogoguyangmu. Kon tua moiko in moibada singgai doḷom kon ilah mita ibanea, bo Akuoi in diá bidon motabi kon inimu.’ ”

Umat i Tuhan in mobuidon mangoi nongkon pinoḷumbúan

¹⁴ Ki Tuhan in noguman, “Moiangoibí in wakutunea intau in diá bidon mongibot podoyon kon i-Nakó, Allah inta nobiag, inta nodia kon umat in Israel iḻumuai nongkon Mesir,

¹⁵ táe podoyon bidon kon i-Nakó, Allah inta nobiag, inta nodia kon umat in Israel iḻumuai nongkon butá tobatú kon utuan bo nongkon bayongan in butá ibanea inta pinoporaritan-Ku kon i monia. Mosia in diaan-Kubí mobui kon butá monia, butá inta ain inogoi-Ku kon mogoguyang monia.”

Hukuman inta pouma

¹⁶ Ki Tuhan in noguman, “Akuoi in mogoiníbí kon nobarong in mododomok kon toyá sin modomok kon intau mita tanaa. Onda intua mogoiní in Akuoi kon mogogungkú sin mogaḷow kon i monia kon bayongan in buḷud bo tombuḷudnea, bo kon angob mita in tombuḷud batu.

¹⁷ Akuoi in nokoontong kon bayongan inta inaidan monia. Diábí in noibuni kon i-Nakó; dosa doman mita monia ain inontong-Ku.

¹⁸ Dosa bo aid monia moraat in tuḻían-Kubí pongin hukuman kodua noguntuḷ, sin mosia in noponajisdon kon butá-Ku takin berhala mita. Berhala mita tatua in diábí konyawa naonda bo mayat.”

Ki Yeremia in noponiata in pirisayanea kon i Tuhan

¹⁹ Tuhan, Ikobí in inta noḷukad kon inakó bo nobogoi in ropot kon inakó; Iko in notuḷung kon inakó kon dodai in nororiga. Bangusa mita nongkon popod in butá in mamangoibí kon ini-Mu bo moguman, “Mogoguyang nami in tongábí oyúon in ilah uboḷ inta totokbí in diá in mangaḻenea.

²⁰ Mokoaid degá in intau kon ilahnea tontaní? Notantúbí kon diá! Inta pinomianea tua in notantúbí kon deeman Allah.”

²¹ “Tuamai,” guman i Tuhan, “kon tanaa baḻíon-Ku in bangusa mita mokorasa kon kawasa bo ropot-Ku sinbá modapot in mononoi mosia in monotaaudon kon Akuoibí in Tuhan.”