YEREMIA 12 - Alkitab Singog In Mongondow Masa In Tanaa

Ki Yeremia nogamui kon i Tuhan

¹ “Aka diaanku in pelekaraku kon tayowon-Mu, o Tuhan, yo notantú bidon kon moniatabí kon Ikobí in noitutui. Táe moibogbí doman in akuoi in moḻibó kon inta moadil kon ini-Mu: Nongonu sin intau moraat in mobiagbí mooyúon? Nongonu sin intaubí inta diá motuḻid in mokodapot kon inta koibog monia?

² Pinomuḷa-Mu in mosia naonda bo mobobiag mita, bo mosia in monguakat, mobiag, bo momungai. Mosia in umuranbí mosingog kon inta mongopia soaḷ Iko, táe kon bonu in gina, sabanarnea in mosia in diábí in pandungnea kon ini-Mu.

³ Táe Iko, o Tuhan, nonotaau kon inakó. Iko in nokoontong kon onu in inaidanku, bo kinotaauan-Mu naonda in porasaan in ginaku kon ini-Mu. Diadon in intau mita moraat tatua ḷumuai, diádon in mosia naonda bo domba mayá in pororataan. Ḷukadai in mosia modapot in porataan kon i monia.

⁴ Modapot in toonupa in butá tanaa in moingkag, bo moingkag in bonoknea kon batúan in gobá? Ḷagapan bo mahaḷuk ibanea matoi popisí in aid moraat in bangusa nami. Mosia in mosingog kon akuoi in diábí mokoontong kon ukur monia.”

⁵ Ki Tuhan in noguman, “Yeremia, aka iko in moḷopídon in motanding takin intau, yo umpaka dá iko in motanding in kabaḷo? Aka kon butá inta moaman iko moondok, yo onu in aidanmu aka iko kon kayuon modingungui kon bingkí in Yordan?

⁶ Iko in pinomaḻidawandon noidapot in ki utatmu tontaní; mosia in dinumudui doman nonubu kon inimu. Dikabí mopirisaya kon i monia, umpaka mopia in singog monia.”

Monakit in gina i Tuhan popisí in umat-Nea

⁷ Ki Tuhan in noguman, “Pogogutunan-Ku in diá bidon pandungon-Kumai, butá inta nobaḻí kapunyaan-Ku in sinaḷáan-Kudon, bo umat-Ku inta kinotabi-Ku aindon inogoi-Ku kon bonu in kawasa in musungnea mita.

⁸ Umat inta piniḻí-Ku noḷawang kon i-Nakó; naonda bo singa kon kayuon natuata in mosia moganggor kon i-Nakó. Tuamai in Akuoi morongó kon i monia.

⁹ Mosia in naonda bo ḷagapan inta sinampí in boniá nongkon bayongan tampat. Oinídon in bayongan in mahaḷuk in kayuon dumugang mogindait kon i monia.

¹⁰ Nobayong in mongongawasa ango-angoi in nomoguyaatdon kon gobá in anggur-Ku bo noruntai kon gobá-Ku mita. Ḻipú-Ku inta mogaga binaḻí monia padang gurun inta moingongow.

¹¹ Oo, Akuoi nokoontong kon i monia nomaḻí kon ḻipú-Ku nobaḻí tampat moingongow inta mokonakit kon gina. Komintan pinomayá mako, diá in noindoimai.

¹² Nongkon ḷoḷan in padang gurun kon buḷud, intau mita mamangoi sin mogagow. Akuoi in nopoangoi in parang sin momoguyaat kon bayongan in ḻipú dá diádon tobatúmai in mobiag modame.

¹³ Umat-Ku in momuḷa kon gandum, táe dugidon in sinipú. Mosia in rumoriga in mogaid táe diá in bungai in siniḷopíannea. Akuoi in sinumorú totok dá bungai in boyó monia diá nopia.”

Dandi i Tuhan kon negara mita topodiugmai in Israel

¹⁴ Ki Tuhan in noguman, “Naa in koyow-Ku soaḷ negara mita topodiugmai in Israel inta ain nomoguyaat kon butá inta inogoi-Ku kon umat-Ku Israel. Naonda bo pinomuḷa inta irabut nongkon butá, natuata in intau mita moraat tatua in poḷuaion-Ku nongkon butá mita monia, bo Yohuda in poḷuaton-Ku nongkon kawasa monia.

¹⁵ Táe naonda in mopoḷuai mako kon i monia, Akuoi in buibí monotabi kon i monia; batúan in bangusa in diaan-Kubí bui mayá in butánea tontaní.

¹⁶ Aka mosia takin ḻimbatú in gina moibog motarima kon agama in umat-Ku bo moibog mongibot takin moguman, ‘Podoyon kon i Tuhan inta nobiag,’ – ná koḻipod in mosia notundú kon umat-Ku nongibot pinodoyon kon Baal – dá mosia in moidugangdon kon umat-Ku bo mobaḻí mooyúon.

¹⁷ Táe bangusa inta doí dumudui kon i-nakó, rabuton-Ku naonda bo pinomuḷa bo yompaton-Ku. Akuoi, ki Tuhan, ain nosingog.”