YEREMIA 11 - Alkitab Singog In Mongondow Masa In Tanaa

Ki Yeremia bo dodandian i Tuhan

¹ Ki Tuhan in noguman kon inakó,

² “Tondudutka in sarat mita dodandian inta pinomia-Ku takin umat-Ku. Potaaudon kon intau in Yohuda bo intau in Yerusalem kon

³ Akuoi, ki Tuhan Allah in Israel, mongutuk kon i inekabí inta diá motoindudui kon sarat mita in dodandian-Ku tatua.

⁴ Dodandian tatua in inaidan-Ku takin mogoguyang monia kon dodai in mosia dinia-Ku iḻumuai nongkon Mesir, ḻipú inta naonda bo naraka kon i monia. Akuoi in nopotabá kon i monia tumoindudui kon i-Nakó bo mogaid kon bayongan inta pinarenta-Ku. Tanaa in pinoguman-Kudon doman kon intau mita in Yohuda bo intau in Yerusalem kon aka mosia bo motoḷutui kon i-Nakó yo mosia in mobaḻí umat-Ku bo Akuoi in ki Allah monia.

⁵ Aka mosia mogaid kon bayongan intua, Akuoi in mogintompodbí kon dandi-Ku kon mogoguyang monia kon butá inta mopia bo nooyúon, inta tanaa inutunan monia tua, in ogoi-Ku kon i monia.” Akuoi in notubag, “Mopia, Tuhan.”

⁶ Bo ki Tuhan in noguman kon inakó, “Bayádon kon kotá mita kon Yohuda, bo kon daḷan mita kon Yerusalem. Potaaudon in koyow-Ku tanaa kon intau mita kon tua. Potabá in mosia monaridi bo dumudui kon sarat mita in dodandian-Ku.

⁷ Tungkuḷ in Akuoi nodia kon mogoguyang monia iḻumuai nongkon Mesir, Akuoi in nodandi totok kon i monia sinbá motoindudui kon i-Nakó. Nodapot in singgai naa Akuoi tantúpabí doman nopotoingat kon umat-Ku kon tua,

⁸ bo nopotabá kon i monia dumudui kon dodandian-Ku tatua, táe mosia in doíbí mokidongog bo doí motoḷutui. Nodapotbí in mosia umuranbí pamandot bo moraat ná koḻipod. Tuamai bayongan in hukuman inta pinais kon bonu in dodandian tatua aindon pinopoḷabú-Ku kon i monia.”

⁹ Onda intua ki Tuhan in noguman bui kon inakó, “Intau in Yohuda bo intau in Yerusalem aindon noyopopog moḷawang kon i-Nakó.

¹⁰ Mosia in nogaidon kon dosa inta pinomia in mogoguyang monia inta doí motoindudui kon i-Nakó, Mosia in nosumba kon ilah mita ibanea bo doí dumudui kon parenta-Ku. Pinomayá Israel andeka Yohuda iḻimimpatdon kon dodandian inta ain pinomia-Ku takin mogoguyang monia.

¹¹ Tuamai, Akuoi, ki Tuhan nopotoingat kon Akuoi in mopoangoibí in bodito kon i monia bo mosia in diábí mokoḷagui kon tua. Aka mosia mokuani mokituḷung kon i-Nakó, Akuoi in doíbí mokidongogmai.

¹² Bo intau in Yohuda bo intau in Yerusalem minayá nokituḷung kon ilah mita ibanea inta sinumba monia pinongin nobogoi in sosumba kuruban. Ilah mita tatua in diábí mokoposaḷamat kon i monia kon dodai in bodito tatua mamangoi.

¹³ Ilah mita in intau in Yohuda nobayong totok, ná kobayong in kotá mita monia. Intau in Yerusalem noposindog in mezbah mita ná kobayong in daḷan mita kon kotá in Yerusalem sin moposumba in kuruban kon Dewa Baal.

¹⁴ Tuamai, Yeremia, dikadon sambayanganmu in mosia andeka mopoigum kon i-Nakó motuḷung kon i monia! Aka mosia kon bonu in roriga bo mopoigum in totuḷung kon i-Nakó, doíbí in Akuoi mokidongogmai kon i monia.”

¹⁵ Ki Tuhan in noguman, “Umat-Ku inta kinotabi-Ku ain nogaid kon inta moraat mita. Mosia in diádon in hak tumuot kon Baḷoi-Ku. Kai monia kamai kon pongin momia kon dandi mita, bo pongin moposumba in mahaḷuk, mosia in mokoampaidon kon bodito. Degá pongin natua mouḻí monia in mosanang?

¹⁶ Nokoimontandon in Akuoi nonangoi kon i monia pangkoi in zaitun mobambar, nopuḻing in bungai in ayop inta mopia. Táe, tanaa takin singog in gotup inta motoyang turubon-Ku in daunnea mita bo putoḷon-Ku in bayongan in tanganea.

¹⁷ Akuoibí in inta ain noposindog in Israel bo Yohuda, Akuoi, Tuhan Inta Totok in mokawasa. Táe tanaa in Akuoi ain nonomayá kon mopoangoi in bodito kon i monia. Mosiadon tontaní inta nokopopisí kon tua komintan, sin mosia in nogaidon kon inta moraat, tuata in noposumba in kuruban kon i Baal dá sinumorú in Akuoi.”

Yopopog moḻimod kon i Yeremia

¹⁸ Ki Tuhan in nopotaau kon inakó in tomayá moraat in musungku mita kon inakó.

¹⁹ Akuoi in naonda bo domba inta diábí in curiga dinia kon tampat pororataan. Diábí kinotaauanku kon akuoibí inta nobaḻí makusud in tomayá mita moraat monia. Mosia in noguman, “Igai pupuḷon naton in pangkoi in kayu tanaa kon dodai in sia in momungaipa; yopúon naton in sia sinbá tangoinea in ḻiongondon in intau.”

²⁰ Bo akuoi in nosambayang, “O Tuhan Inta Totok in mokawasa, Iko in hakim inta moadil; Ikobí in nonungkuḷ kon raian bo gina in intau. Pelekaraku tanaa in posingayowon-Ku kon ini-Mu. Igumon mako koontonganku in Iko motuḻí kon aid in intau mita tatua.”

²¹ Intau mita in kotá in Anatot moibog sinbá matoi in akuoi. Mosia in noguman, “Aka iko umuran mopotaau in koyow mita i Tuhan kon inami, iko in ḻimodonbí nami.”

²² Tuamai, ki Tuhan Inta Totok in mokawasa in noguman, “Akuoi in mohukumbí kon i monia! Intau mita moguod monia in matoibí kon parang, adí mita monia in matoibí in gogoy.

²³ Akuoi in nonantúdon kon wakutunea mopoangoi in bodito kon intau mita in Anatot, bo aka moiangoidon in hukuman kon i monia tua yo diábí tobatúmai in kotaḻiban.”