YEHEZKIEL 8 - Alkitab Singog In Mongondow Masa In Tanaa

KI YEHEZKIEL NOKOUḺÍ KON OONTONGON NOGINDUA SOAḶ KI ALLAH 8:1–10:22 Posumbaan kon berhala kon Yerusalem

¹ Kon singgai iḻimanea kon buḷan inggonomnea kon taong inggonomnea kon sempo in pinoḷumbúan kon inami, itoi mita in intau mita inta iḷumbú kon Yohuda in namangoi kon baḷoiku bo iḻimitú takinku. Bo daḻídon in kawasa i Tuhan Inta Totok in moḷantud nongawasa kon inakó.

² Iḷumangag in akuoi bo inontongku in ná batangan in intau. Nongkon ogotannea bo namonag koontongan sia in ná tuḷú, bo nongkon ogotannea bo namonik in koontongan mopouḻi-uḻinag naonda bo porunggu inta inatá.

³ Sia in nopotonggó in naonda bo ḻima, bo norambun kon buokku. Onda intua kon bonu in oontongon tatua, akuoi sinintak in Roho i Allah kinoḷantud namonik in ḷangit bo dinia kon Baḷoi Tuhan kon Yerusalem, kon ngara tumuot kon dangkuḷon inta kon bonunea kon dotá in utuan. Kon tua oyúon in patong berhala inta ain nokopomuká kon torú i Allah.

⁴ Bo inontongku in bayag motarang inta nobaḻí tomponuot kinoangoian i Allah in Israel, ná inta inontongku kon dodai in akuoi kon bingkí in Ongkag in Kebar.

⁵ Ki Allah in noguman kon inakó, “Ei intau inta ilo-ilow, indoidon ná utuan.” Dinumudui in akuoi, bo kon dotá in mezbah kon diug in daḷan tumuot, inontongku in berhala inta nokopomuká kon torú i Allah tatua.

⁶ Ki Allah in noguman kon inakó, “Ei intau inta ilo-ilow, inontongmu onu in yogot nobaḻí? Taridiai in aid mita inta mokorongó inta inaidan in intau in Israel, inta nokopopisí kon Akuoi noiyayú kon Baḷoi-Ku! Igai, bain poontong-Ku kon inimu in inta moiḻiu in mokorongó.”

⁷ Bo dinia-Nea in akuoi minayá in ngara tumuot kon bosínea kon ḷuai bo sinaridian-Nea in bubú tobatú kon dinding.

⁸ Gumannea, “Ei intau inta ilo-ilow, iḷobenai in bubú tanaa.” Naonda in inaidanku, inontongku in ngara tobatú.

⁹ Guman-Nea kon inakó, “Tuotdon bo indoiaidon in aid mita mokotor bo inta mokorongó inta inaidan monia tua.”

¹⁰ Dá akuoi in sinumuot doman bo noindoi. Dinding mita in yuang tatua ginambaran in noyagi-yagimai in uḷag bo mahaḷuk mita haram ibanea, bo noyagi-yagimai doman in gambar berhala inta sinumba in intau mita in Israel.

¹¹ Pitu nopuḷú in itoi in bangusa in Israel in kon tua, noitakin doman in ki Yaazanya ki adí i Sapan. Kon batúannea nokadai kon pototubáan kon dupa inta mosipun kon poyok.

¹² Ki Allah in noguman kon inakó, “Ei intau inta ilo-ilow, inontongmu degá onu in inaidan in itoi mita in Israel takin inumado-adop? Mosia in noibada kon bonu in yuang inta nopuḻing in berhala sin kan Akuoi in nonaḷámaidon kon butá tanaa bo diádon noindoimai kon aid monia.”

¹³ Bo ki Tuhan in noguman kon inakó, “Iko in mokoontong kon i monia mogaid kon inta moiḻiu in mokorongó.”

¹⁴ Dá dinia-Nea in akuoi minayá in bonawang dotá in utuan kon Baḷoi Tuhan bo pinoontong-Nea kon inakó in bobay mita inta mongombaḷmai kon kinopatoian i Dewa Tamus.

¹⁵ Ki Tuhan in noḻibó kon inakó, “Ei intau inta ilo-ilow, inontongmu intua? Nobarongpabí in moiḻiu in mokorongó.”

¹⁶ Dinia-Nea in akuoi kon dangkuḷon kon bonu in Baḷoi Tuhan. Kon diug in ngara tuotan kon yuang motusi, kon sigad in mezbah bo lorong, doyowa nopuḷú bo ḻima in intau. Mosia in nonoḻikud kon yuang motusi, bo dinumokó sinumayow kon pomukaan bo nosumba kon mata in singgai inta momuká.

¹⁷ Ki Tuhan in noguman kon inakó, “Ei intau inta ilo-ilow, inontongmu degá intua? Intau mita in Yohuda tanaa in diá moorop aka tongá mogaid kon inta mokorongó tatua bo mogaid kon inta diádon monotaau kon intau kon sinangkub in butá. Nodapotbí in inaidan monia intua komintan kon naa, kon bonu in Baḷoi-Ku bo nokodugang kon torú-Ku bui. Indoiaika naonda in mosia moningkuḻe kon i-Nakó pinongin aid inta totok in mokotor tanaa!

¹⁸ Mosia in mokonanambí kon torú-Ku inta motoyang! Diábí ampungan-Ku in mosia. Umpakabí mosia momaḷú in mosambayang kon i-Nakó, momaḷúkabí moropot totok, yo doíbí in Akuoi mokidongogmai!”