YEHEZKIEL 7 - Alkitab Singog In Mongondow Masa In Tanaa

Korimumudan in Israel nodiugdon

¹ Ki Tuhan in noguman kon inakó,

² “Ei intau inta ilo-ilow, Akuoi, ki Tuhan Inta Totok in moḷantud, in moguman nanaa kon butá in Israel: Naadon in imbuit in ouman kon sinangkub in butá tanaa!”

³ Ki Tuhan in noguman, “Ei Israel, tanaa in noiangoidon in kopaḷutanmu. Iko in mokonanamdon kon torú-Ku. Iko in sisigan-Ku podudui in aidmu inta moromú.

⁴ Akuoi in diá bidon motabi andeka mongampung kon inimu. Akuoi in mohukumbí kon inimu podudui in bayongan in aid moraat inta ain inaidanmu. Dá kotaauanmudon kon Akuoibí in Tuhan.”

⁵ Naabí inta pinoguman i Tuhan Inta Totok in moḷantud kon bangusa in Israel, “Bodito in moyoduduibí in moiuma kon i monimu.

⁶ Tanaa in bayongan yagi-yagi ain nopaḷut. Naadon in kopaḷutanmu. Diádon in kamang kon inimu.

⁷ Bayongan in yagi-yagi ain nopaḷut kon inimu, ei bangusa mita inta nogutun kon butá tanaa. Tanaa in diá bidon in rame mita kon mezbah mita kon buḷud, dongka bidon kotombaukan in oyúon.

⁸ Diádon moonggot bo moiko in mokonanamdon kon torú-Ku inta motoyang. Moiko in sisigan-Ku podudui in aidmu. Tuḻían-Kubí kon inimu in bayongan in aidmu inta moromú.

⁹ Akuoi in diábí motabi andeka mongampung kon inimu. Akuoi in mohukumbí kon inimu podudui in bayongan in aid moromú inta ain inaidan monimu. Dá kotaauandon monimu kon Akuoibí in ki Tuhan bo Akuoibí in nohukum kon i monimu.”

¹⁰ Singgai koboditoan in bangusa in Israel in noiangoidon. Aid motogat in mongawasa. Koḷoḷatúan in motompodon.

¹¹ Aid moromú mokopopisídon kon modugang mobarong in aid moraat. Bayongan in kaoyúonan, kamuliaan bo tangoi monia inta ponango-nangoian in modaitdon bo diádon monompaḷot.

¹² Wakutunea in ḷagidon moiangoi, singgainea in nodiugdon! Ki inta mototaḷui bo ki inta mopopotaḷui in diábí mokouḻí kon kauntungan onu bo onu, sin hukuman i Allah in moiantug kon bayongan in intau.

¹³ Diábí in mopopotaḷui in mokouḻípa bui kon onu inta ain pinotaḷuinea, sin torú i Allah in moiantugbí kon i ineka. Intau inta moraat in diábí mosaḷamat.

¹⁴ Torompet in mosingog bo bayongan in intau mosadia. Táe diábí tobatúmai in intau in mayá kon tampat poparangan, sin torú i Allah moiantug kon bayongan in intau.

Hukuman popisí in dosa mita in Israel

¹⁵ Kon daḷan mita in kotá oyúon in parang, kon baḷo-baḷoiannea oyúon in yampoi in takit bo malarat in gogoy. Ki inekabí in kon ḷuai in kotá yo matoibí kon bonu in parang, bo inta mogutun mako kon bonu in kotá in matoibí in takit bo gogoy.

¹⁶ Tongosilai in kotaḻibanbí bo moḷagui mayá in buḷud. Kon tua mosia in nádon onda bo ḷagapan mita paḷoma inta binuntun nongkon ḷopá mita; komintanbí mogongot popisí in dosa mita monia.

¹⁷ Bayongan in intau mobaḻíbí moḻemé in ḻimanea bo mourot in duḷudnea.

¹⁸ Mosia in mopomaké in kaeng karong bo bayongan in awaknea in gumugurbí. Uḷu monia in ḷogatanbí bo mosia in pokopooyáanbímai.

¹⁹ Buḷawan bo saḷaka in ḷumbúonbí monia kon daḷan naonda bo apat, sin kon singgai ki Tuhan mopoaid in torú-Nea, yo buḷawan bo saḷaka tua in diábí mokoposaḷamat kon i monia, nodapotbí in tongá mokopopisí kon i monia mogaid kon dosa. Diá bidon in mosia motaau mopomaké intua sin mopoorop kon ibog monia andeka pomonu monia kon sian.

²⁰ Dungkuḷmai mopia in gina monia kon permata monia inta mongogaga, táe popisí in pinakédon monia nomia kon berhala mita inta mokorongó, dá binaḻí i Tuhan in kapunyaan monia nobaḻí inta mokokoningkim.

²¹ Ki Tuhan in noguman kon bangusa in Israel, “Pomayá-Kubí mako in intau mita ango-angoi in mogagow kon i monimu. Intau mita moraat in mogagowbí kon kapunyaanmu bo moponajis intua.

²² Akuoi in mamangoibí aka Baḷoi-Ku poguyaaton bo kotoron in mogogagow mita.

²³ Sinangkub in butá motombaukdon; kon bayongan in tampat oyúon in poḻimodan bo aid moromú.

²⁴ Bangusa mita inta totok in moromú in poangoi-Kubí sin mongawasa kon baḷoimu mita. Intaumu mita inta mongotoyang bo inta mongotorindog in moondokbí aka pomayá-Ku mako in bangusa mita tatua morimumud kon tampat mita pooibadaanmu.

²⁵ Mosia tua in koantuganbí in ajar in gina bo kobuḻian in kamang, bo motayak kon kobiagan moodom, táe diábí mouḻí monia.

²⁶ Bodito bo habar diá mopia in umuranbí mamangoi. Moiko in mopoigumbí sinbá nabi mita moibogpa monoḻindap, táe diádon kotaauan monia. Ná doman tua in imang mita diádon koonu bo onu in tundúon kon umat, bo itoi mita in kodaitandon in tonggina.

²⁷ Datu in mogamui, ki adí ḷoḷaki in datu kobuḻian in kamang bo rayat in gugur mako sin moondok. Akuoi in mohukumbí kon i monimu podudui in bayongan in aidmu bo mohakim kon i monimu ná pinohohakim monimu kon intau ibanea. Dá kotaauandon monimu kon Akuoibí in ki Tuhan.”