YEHEZKIEL 5 - Alkitab Singog In Mongondow Masa In Tanaa

Ki Yehezkiel nokibangkuḷug in buoknea

¹ Ki Tuhan in noguman, “Ei intau inta ilo-ilow, gamádon in kedang inta moḷanit bo paké intua pongarug kon kumi bo buokmu. Onda intua simbangdon in buokmu tatua kon pononimbangan bo silaidon toḷu notonsilai.

² Tongosilai in musti tubáanmu kon yua-yuak in kotá tatua naonda in mopaḷutdon in pongopungan. Tongosilai doman in musti tota-totadonmu in kedangmu sindaḷan moḻibu kon kotá tatua. Bo tosilai imbuitnea musti potabudonmu kon baḷangon, bo batukon-Ku in kedang-Ku.

³ Tonggagatai in topiḻik in buok tatua, bakutdon kon bonu in ḻitodan in jubahmu.

⁴ Onda intua pogamá doman kon topiḻik in buok tatua, pogambatdon kon bonu in tuḷú bo biódon mako in mopokak. Nongkon tua tuḷú tatua in ḷumekep kon sinangkub in Israel.”

⁵ Ki Tuhan Inta Totok in moḷantud in noguman, “Indoiai, naa in Yerusalem. Kotá tanaa in inukat-Ku kon putod in dunia, bo iḻibu in negara mita ibanea.

⁶ Táe Yerusalem ain nondoí kon parenta-Ku bo noniata magí noiḻiudon kon kororaat in bangusa mita ibanea, nodapot in noiḻiudon in diá kototoinduduinea kon negara mita inta kon ḻibuneamai. Yerusalem iḻimimpat kon parenta-Ku mita bo doí dumudui kon hukum-Ku mita.”

⁷ Ki Tuhan Inta Totok in moḷantud in noguman, “Ei Yerusalem, Indongogaidon! Iko in diá notoindudui kon parenta-Ku mita bo hukum-Ku mita; pinomaḻidawanmu in noiḻiudon kon bangusa mita ibanea kon ḻibumumai, bo dinumuduidon kon adat kabiasaan in bangusa mita tatua.

⁸ Dá Akuoi, ki Tuhan Inta Totok in moḷantud, noponiata kon Akuoi in musungmu. Iko in hukumon-Kubí kon tayowon in bangusa mita ibanea.

⁹ Popisí in bayongan in aidmu inta kinodoí-Ku, intaumu mita in hukumon-Ku mobogat ná inta diápa kon dodai in onda in inaidan-Ku bo diá bidon aidan-Ku bui.

¹⁰ Guyanga in mokaandon kon i adínea tontaní bo adí in mokaandon kon guyanganea. Natuata in pohohukum-Ku kon i monia, bo inta mobiagpa in porariton-Ku kon bayongan in tampat.

¹¹ Akuoi in ki Allah inta nobiag, ki Tuhan Inta Totok in moḷantud, bo naa in tosingogon-Ku: Popisí in iko ain nongotor kon Baḷoi-Ku pinongin aidmu inta moraat bo mokorongó, dá rimumudon-Ku in iko takin diábí in ampung.

¹² Tongosilai in intaumu in matoibí popisí in yampoi in takit bo malarat in gogoy inta moiuma kon kotá. Tongosilai doman in tota-totadon in kedang kon ḷuai in kotá, bo tongosilai doman in porariton-Ku kon bayongan in tampat bo batukon-Ku in kedang.

¹³ Korasaanmubí in koḷoḷoben in torú bo pomomatoi-Ku modapot in moorop in Akuoi. Naonda intua mita mobaḻí, moyakin bidon in iko kon Akuoi, ki Tuhan, ain noguman kon inimu popisí in torú-Ku kon aidmu inta diá motoindudui.

¹⁴ Iko in mobaḻídon apug mita inta diá in baragunanea bo bangusa mita inta kon ḻibumumai in morebeg kon inimu; bayongan in intau inta moitaḻib in yumayúbí kon inimu.

¹⁵ Aka Akuoi tumorú bo moyaat totok in gina kon inimu poḷat mohukum kon inimu, yo bayongan in bangusa kon ḻibumumai in mokoningkimbí. Singkuḻeonbí monia in iko bo morongó in mokoontong kon inimu.

¹⁶ Daiton-Ku poguyaaton in tongkaaḷ in kaanonmu bo mopomayá mako in intaumu mita gogoyon. Korasaanbí monia naonda in sian mopomporí popisí in gogoyon, naonda bo piot moḷanit noiturak bo nomatoi kon inimu.

¹⁷ Koḻikud in malarat in gogoy yo popoangoi-Kubí doman in yampoi in takit, aid moromú bo parang sin moḻimod kon intaumu, bo mahaḷuk mita inta mokokaan kon intau sin moḻimod kon i adí mita monia. Akuoi, ki Tuhan, ain nosingog.”