YEHEZKIEL 45 - Alkitab Singog In Mongondow Masa In Tanaa

Butá mita inta ain sinantú kon i Tuhan

¹ Kon tungkuḷ in butá tatua diápa silaion mobaḻí butá budel kon batúan in suku, yo mustibí tontaníon in tongosilai kon i Tuhan. Butá tatua in kobanatnea in musti mopuḷú bodoyowá noribu bo ḻima nogatut nometer, bo kooḷadnea in mopuḷú noribu nometer. Komintan butá tatua in sinantú motusi.

² Bo pogaidan kon Baḷoi Tuhan in sinadia nongkon butá tatua tongosilai inta notonggopat, ukurannea in doyowa nogatut bo ḻima nopuḷú nometer kon batúan in sínea, bo iḻibu in lapangan kooḷadnea in doyowa nopuḷú bo ḻima nometer bo kon tuata in musti poposindogan in Baḷoi Tuhan.

³ Tongobotak in butá tatua, inta kobanatnea in mogatut bo doyowa nopuḷú bo ḻima noribu nometer, bo kooḷadnea in ḻima noribu nometer musti sadiaan kon poposindogan in Baḷoi Tuhan, tuata in butá inta totok in motusi.

⁴ Butá tatua in motusi, bo sinadia kon imang mita inta mopobayá in oaidan posumbaan kon Baḷoi Tuhan. Tongosilai nongkon butá tatua in mobaḻíbí tampat poposindogan in baḷoi monia, bo tongosilai doman in pakéon poposindogan in Baḷoi Tuhan.

⁵ Tongo botak doman nongkon butá inta kooḷadnea mopuḷú bo doyowa noribu boḻima nogatut nometer bo inta kobanatnea in ḻima noribu nometer in musti sadiaan kon intau mita in Lewi inta nopobayá in oaidan monia kon bonu in Baḷoi Tuhan. Kon tua in poposindogan in kotá mita inta motaau pogutunan monia.

⁶ Koḻikud in butá inta motusi tatua, musti poyotondíon in tongosilai in butá inta kobanatnea mogatut bo doyowa nopuḷú bo ḻima noribu nometer bo kooḷadnea in doyowa nopuḷú bo ḻima noribu nometer, sin pomiaan kon kotá tobatú inta motaau pogutunan i inekadon nongkon bangusa in Israel.

Butá tonsilai in mongongawasa inta nomarenta

⁷ Bo kon mongongawasa inta momarenta in musti doman posadiaan kon butá. Butá tatua in noibontang nongkon sigad kon toyopan in butá inta ain sinantú kon i Tuhan tatua, nodapot kon Dagat Toyuak, bo nongkon sigad kon dotá in pomukaan nongkon butá inta ain sinantú tatua, nodapot in pinosigadan kon dotá in pomukaan kon butá tatua. Dá kobanatnea in notongkai in kobanat in tongosilai in butá inta inogoi kon suku mita in Israel.

⁸ Butá tatua in nobaḻí kapunyaan in mongongawasa inta nomarenta kon butá in Israel, sinbá diádon in sia mondorot bui kon umat-Ku, táe mobogoidon in butá inta noiḻiu tua mobaḻí kapunyaan in suku mita in Israel.

Inta nobaḻí oaidan in mongongawasa inta momarenta

⁹ Ki Tuhan Inta Totok in moḷantud in noguman, “Tugatdon in dosamu mita, ei mongongawasa mita in Israel! Gogaiaidon in dodiamu inta mopomia ibo-ibog bo mondorot kon rayat tua. Aidaidon in onu inta moitutui bo moadil. Dikadon mokoimontanmai in moiko in mopoguntun kon umat-Ku nongkon butá monia. Akuoi, ki Tuhan Inta Totok in moḷantud in nomarenta kon tua kon inimu.

¹⁰ Pakédon in pononimbangan bo pogogukuran inta mobanar:

¹¹ Tongo epa in pogukuran kon inta noingkag tua in mustibí motongkai in bonunea in tongo bat inta pogukuran kon inta notontubig. Patokannea in musti tongo homer. Dá ukuran mita tatua in mustibí nanaa: Tongo homer notongkai in mopuḷú no epa notongkai in mopuḷú no bat.

¹² Pononimbanganmu in mustibí nanaa: 1 syikal notongkai in 20 gera 1 mina notongkai in 60 syikal

^13-15 Naa in dodoyonan ukuran ponantúan kon sosumba mita: gandum: tongosilai nongkon onom nopuḷú in bungai in boyómu jawawut: tongosilai nongkon onom nopuḷú in bungai in boyómu ḷana in zaitun: tongosilai nongkon mogatut in bungai in pangkoinea mita. (Ukurdon podudui in bat: mopuḷú no bat notongkai in tobatú no homer notongkai in tobatú no kor) domba: domba tobatú nongkon pomuḷoi in doyowa nogatut in domba. Moiko in mustibí moposumba in kuruban gandum, kuruban payongon, bo kuruban podamean, sinbá dosamu mita in ampungandon. Akuoi ki Tuhan Inta Totok in moḷantud inta nobogoi in parenta tatua.

¹⁶ Bayongan in intau kon butá tatua in mustibí modia sosumba mita tatua kon mongongawasa inta nomarenta kon Israel.

¹⁷ Siabí inta musti motaḷui kon bobiagon inta pakéon kon kuruban payongon bo bahan mita inta mobaḻí kuruban gandum bo kuruban anggur kon bayongan in bangusa in Israel kon singgai mita moḷoben, Singgai moḷoben Buḷan Mobagu, singgai mita in Sabat bo singgai mita moḷoben ibanea. Sia in mustibí moposadia in kuruban potobut kon dosa, kuruban gandum, kuruban payongon, bo kuruban podamean sin mopoigum in ampung kon bangusa in Israel.”

Singgai mita moḷoben

¹⁸ Ki Tuhan Inta Totok in moḷantud in noguman kon umat-Nea, “Kon singgai imitánea kon buḷan imitánea doman, moiko in mustibí mopotusi in Baḷoi-Ku takin moposumba in sapi koḷakian batánea tobatú inta diá in bogitnea.

¹⁹ Imang in mustibí mogamá kon dugú in kuruban potobut kon dosa tatua, bodongka popoḻepo kon oigi mita in ngara in Baḷoi-Ku, bo kon siku doman opat in mezbah, bo kon oigi mita in bonawang inta nopobayá ná dangkuḷon kon bonunea.

²⁰ Aidai doman natua in kon singgai impitunea kon buḷan tatua, bo kon batúan in intau inta ain nogaid kon dosa takin diá sinumontuon andeka popisí in diá kinotaauannea. Aid natua in moponiata kon moiko in noḷukad kon kototusi in Baḷoi-Ku.

²¹ Kon singgai impuḷú bo opat kon buḷan imitánea, moiko in mustibí morame kon Bobutungan in Paska. Pitu nosinggai in koonggotnea bayongan in intau in musti mokaan kon roti diá iragian.

²² Kon singgai dungkuḷ, mongongawasa inta nomarenta in mustibí moposumba in sapi koḷakian tobatú mobaḻí kuruban potobut kon dosanea tontaní bo dosa in bayongan in rayat.

²³ Kon bonu in poramean inta pitu nosinggai tatua, yo pomuḷoi in singgai sia in mustibí moposumba kon i Tuhan in pitu in sapi koḷakian bo pitu doman in domba koḷakian inta diá in bogitnea, bodongka tubáan siba-sibatu. Pomuḷoi doman in singgai sia in musti doman moposumba in bembé koḷakian saḷaku kuruban potobut kon dosa.

²⁴ Koḻikud intua, musti doman moposumba in gandum mopuḷú bo pitu noliter bo tobotak in kon batúan in sapi koḷakian bo toḷu noliter in ḷana zaitun kon batúan in domba koḷakian.

²⁵ Kon Rame in Singgai Moḷoben Ḷuḷung Daun, inta pangkoion kon singgai impuḷú boḻimanea kon buḷan impitunea, pomuḷoi in singgai kon bonu in pitu nosinggai mongongawasa musti moposumba in kuruban mita inta notongkai intua, tuata in kuruban potobut kon dosa, kuruban payongon, bo kuruban gandum bo ḷana zaitun.”