YEHEZKIEL 43 - Alkitab Singog In Mongondow Masa In Tanaa

Ki Tuhan nobui mangoi kon Baḷoi-Nea

¹ Onda intua ḷoḷaki tatua in nodia kon inakó minayá in bonawang inta noitayow in pomukaan,

² bo kon tuata inontongku in nongkon dotá in pomukaan sindar mopouḻi-uḻinag inta nobaḻí tomponuot kon kinoangoian i Allah in Israel. Singog i Allah in kodongogan naonda bo singog in tubig kon dagat, bo dunia in moporia-riang popisí in sindar kinoangoian i Allah.

³ Oontongon tatua in notongkai in inta inontongku kon dodai in ki Allah namangoi sin morimumud kon Yerusalem, bo ná inta inontongku kon Ongkag in Kebar. Bo inumumpag in akuoi bo nosundud.

⁴ Sindar mopouḻi-uḻinag tatua minayá nopobayá in bonawang kon dotá in pomukaan bodongka sinumuot kon bonu in Baḷoi Tuhan.

⁵ Roho i Tuhan nobingkat kon inakó bo dinianea in akuoi kon dangkuḷon dotá in bonunea; kon tua inontongku in Baḷoi Tuhan inta kinawasa in sindar kinoangoian i Tuhan.

⁶ Kon dodai in ḷoḷaki tatua sinimindogpa mako kon diugkumai, dinongogku in ki Tuhan in noguman kon inakó nongkon bonu in Baḷoi Tuhan, kai-Nia,

⁷ “Ei intau ilo-ilow, naa in ḷoḻitúan pomomarentaan-Ku. Kon naa in pogutunan-Ku kon yua-yuak in umat in Israel bo momarenta kon i monia modapot in mononoi. Pinomayá mosia, andeka datu mita monia, diá bidon in mongotor kon tangoi-Ku inta motusi pongin mosumba kon berhala andeka pongin moḷobong kon minatoi datu mita monia kon tampat tanaa.

⁸ Dungkuḷmai in datu mita monia in momia kon ḷoḷuang mita bo oigi mita in komaḻig monia kon sí in ḷoḷuang bo oigi mita in Baḷoi-Ku, dá tongádon dinding tobatú in kon sigadnea. Mosia in nongotordon kon tangoi-Ku inta motusi pinongin aid monia inta mokorongó. Tuamai in iyopú-Ku in mosia kon bonu in torú-Ku.

⁹ Táe pangkoion kon tanaa mako mosia in mustibí mogogai in mosumba kon berhala bo momamping kon tuḷan in datu mita monia. Mopaḷut mako kon tua, Akuoi in mogutun kon yua-yuak monia modapot in mononoi.”

¹⁰ Bo ki Tuhan in noguman bui, “Ei intau ilo-ilow, potaaudon kon umat in Israel soaḷ Baḷoi-Ku tanaa, bo pokitaridiaidon in mosia kon tomayánea. Pokopooyámaidon in mosia popisí in bayongan in dosa monia.

¹¹ Bo naonda in mooyá in mosia popisí in aid mita monia, insilangaidon in tombaḷoi in Baḷoi-Ku tanaa kon i monia: batangannea, ngaranea mita tumuot bo ḷumuai, ḷandakan in baḷoinea, bayongan in atorang bo hukumnea mita. Paisdon intua komintan kon i monia sinbá koontongan monia bo moindoi kon naonda in pononompia kon bayongan in yagi-yagi, poḷat dumudui kon bayongan in atorangnea.

¹² Naa in sipat totokan in Baḷoi Tuhan: Bayongan in butá kon diugnea kon tudu in buḷud in totok in motusi.”

Mezbah

¹³ Naa in ukuran in mezbah podudui in ukuran inta pinaké kon mogukur kon Baḷoi Tuhan. Kon ḻibumai in sioḷ in mezbah oyúon in got inta koonagnea in tongobotak in meter bo kooḷadnea in tongobotak doman in meter, sínea kon dotá in ḷuai koḷantudnea in tongokoar in meter.

¹⁴ Bo got nodapot kon tombutung in mezbah inta kon ḻimonag totok, koḷantudnea in tometer. Kon yuaknea koḷantudnea in doyowa nometer, bo tongobotak in meter in mosisi-sisí nongkon ḻibu in sioḷ in mezbah. Tonsilai nogintoḷu, in tudu totok in mezbah, bo mointo-intok degá tongobotakmai in meter nongkon bongkownea inta kon dotá in bonunea.

¹⁵ Yuang intoḷunea tanaa in tampat pototubáan kon kuruban; koḷantudnea in doyowa nometer. Kon sikunea opat oyúon in noiḷontú naonda bo tungoi.

¹⁶ Tudu totok in mezbah tatua in notonggopat; batúan in sínea tumogogonom nometer in ukurannea.

¹⁷ Kon yuaknea in notonggopat doman, batúan in sínea topopitu nometer, bo sinontompidan in ḷuainea inta tokoar in meter in koḷantudnea. (Kooḷad in gotnea tongobotak in meter.) Kon sínea kon dotá in pomukaan oyúon in tukad inta moponik kon tudu totok in mezbah.

Ponoimpaḷutan kon mezbah

¹⁸ Ki Tuhan Inta Totok in moḷantud in noguman kon inakó, “Ei intau ilo-ilow, indongogaidon in onu inta poguman-Ku kon inimu. Aka mezbah tatua moḷapatdon aidan, mustibí toimpaḷutonmu pongin motubá kon kuruban kon tudunea bo pisikan in dugú in kuruban intua.

¹⁹ Tongábí imang buí i Zadok nongkon suku Lewi in motaau mamangoi in tayowon-Ku sin mopobayá in oaidan pogundoian. Akuoi, ki Tuhan Inta Totok in moḷantud in nomarenta nokiaid intua. Ogoidon kon i monia in sapi koḷakian tobatú inta batáneapa sin pokuruban potobut kon dosa.

²⁰ Gamádon in dugúnea topiḻik bo popoḻepo kon tungoi mita inta kon siku mita in mezbah tatua, bo kon sikunea opat inta kon dotá in bonunea takin doman sí in mezbah inta noiḻibu. Natuata in pogogaidmu mopotusi in mezbah tatua bo tondíonmudon kon i-Nakó.

²¹ Onda intua, gamádon in sapi koḷakian inta pakéon potobut kon dosa tatua, bo tubádon kon tampat inta ain sinantú, inta kon ḷuai in tampat motusi kon Baḷoi Tuhan.

²² Mopoikoḷomai kon singgai iko in musti moposumba in bembé koḷakian tobatú inta diá in bogitnea mobaḻí kuruban potobut kon dosa. Potusidon in mezbah tatua takin dugú in bembé, ná pinogogaidmu kon dugú in sapi koḷakian batánea tatua.

²³ Aka mopaḷutdon aidanmu intua, gamádon in sapi koḷakian tobatú batánea bo bembé koḷakian tobatú batánea, tumpaḷa diá in bogitnea,

²⁴ bo diádon kon i-Nakó. Imang mita in mustibí moponabud in simuton kon tudu in biag doyowa tatua bo tubáan mobaḻí kuruban kon i Nakó.

²⁵ Pomuḷoi in singgai kon bonu in pitu nosinggai, iko in mustibí mopokuruban in bembé tobatú, sapi koḷakian batánea tobatú, bembé koḷakian baḻíon kuruban potobut kon dosa. Mahaḷuk mita tatua in diábí motaau aka oyúon in bogitnea.

²⁶ Pitu nosinggai in koonggotnea imang mita in musti mogaid kon upacara ponoimpaḷutan kon mezbah tatua bo moposadia sinbá motaau pakéon.

²⁷ Naonda in mopaḷut in pitu nosinggai tatua, imang mita in musti momangkoidon moposumba kon tudu in mezbah tatua in kuruban payongon bo kuruban podamean kon umat. Dá mopiadon in gina-Ku kon i monimu komintan. Akuoi, ki Tuhan Inta Totok in moḷantud ain nosingog.”