YEHEZKIEL 42 - Alkitab Singog In Mongondow Masa In Tanaa

Baḷoi doyowa kon diug in Baḷoi Tuhan

¹ Onda intua ḷoḷaki tatua in nodia kon inakó minayá in dangkuḷon dotá in ḷuai bo kinapitnea in akuoi minayá in baḷoi ibanea kon dotá in utuan kon Baḷoi Tuhan, diá noyayú nongkon baḷoi moḷoben kon dotá in toyopan kon Baḷoi Tuhan tatua.

² Baḷoi tatua kobanatnea in ḻima nopuḷú nometer, bo kooḷadnea in doyowa nopuḷú boḻima nometer.

³ Sí tobatú in baḷoi tatua in noitayow kon dangkuḷon inta kooḷadnea in mopuḷú nometer tatua, bo sínea ibanea noitayow kon taḷog batu kon dangkuḷon kon ḷuai. Baḷoi tatua in toḷu noḷandakan; kon pomuḷoi in ḷandakan in mointo-intok nongkon ḷandakan inta kon ḻimonagannea.

⁴ Kon tayowon in gopot mita tatua, kon dotá in bonunea oyúon in lorong inta kooḷadnea in ḻima nometer bo kobanatnea in ḻima nopuḷú nometer. Ngaranea mita in noitayow kon utuan.

⁵ Gopot mita kon ḷandakan kon ḻimonik in mointo-intok nongkon gopot mita inta kon ḻimonagannea, sin lorongnea mita kon tayowon in gopot mita kon ḻimonik tatua in moḷobe-ḷoben nongkon inta kon ḻimonagannea.

⁶ Gopot mita tatua in toḷu noḷandakan bo diá ginopod in oigi mita ná inta kon baḷoi mita kon palas.

^7-8 Tongo botak nongkon ḷandakan kon ḻimonag, inta doyowa nopuḷú nometer in tongábí dinding komintan, bo inta kon ingguputnea, inta doyowa doman nopuḷú boḻima nometer, in pinogaidandon kon gopot mita. Kon ḷandakan inta totok in kon ḻimonikan oyúon in gopot mita kinobobanat in baḷoi tatua.

^9-10 Kon ḻimonagan in gopot mita inta kon popod kon dotá in pomukaan kon baḷoi tanaa, bo kon popod in dinding, oyúon in ngara inta mopobayá in dangkuḷon kon dotá in ḷuai. Kon dotá in toḷatan nongkon Baḷoi Tuhan, oyúon in baḷoi inta notongkai, noiukat diá noyayú kon baḷoi inta kon dotá in toyopan.

¹¹ Kon tayowon in gopotnea mita oyúon in lorong inta notongkai in lorong kon dotá in utuan. Ukurannea in notongkai, batangannea in notongkai, bo ngaranea mita in notongkai doman.

¹² Kon ḻimonag mita in gopot mita kon dotá in toḷatan, inta kon popodnea kon dotá in pomukaan kon pomangkoian in dinding, oyúon doman in ngara tobatú.

¹³ Ḷoḷaki tatua in noguman kon inakó, “Baḷoi doyowa tatua in motusi. Kon tua, imang mita inta motaau tumayow kon koangoian i Tuhan, mokaan kon kuruban mita inta totok in motusi. Kon tua in musti doman pogukatan kon kuruban mita inta totok in motusi, tuata: kuruban gandum bo kuruban potobut kon dosa andeka kuruban toḻiu in karugian.

¹⁴ Aka imang mita mopaḷutdon mopobayá in oaidan kon Baḷoi Tuhan, bo moibog mayá in dangkuḷon kon dotá in ḷuai, dá pakeang inta ain sinantú pakéon kon dodai in mogundoi yo musti taḷaan monia kon gopot mita tatua. Mosia in mustibí momaké in ḷambung ibanea, bain tua bo motaau in mosia mayá in tampat inta pinoyosipunan in rayat.”

Ukuran in ḻibu in Baḷoi Tuhan

¹⁵ Naonda in nopaḷut mako in ḷoḷaki tatua nogukur kon bangunan in Baḷoi Tuhan kon dotá in bonunea, dinianea in akuoi iḻumuai nongin bonawang pomukaan, bo nogukur kon ḻibu in Baḷoi Tuhan.

¹⁶ Nopomaké in tungkud pogogukurnea inukurnea in sínea kon dotá in pomukaan: doyowa nogatut bo ḻima nopuḷú nometer.

^17-19 Onda intua inukurnea in sínea kon dotá in utuan, kon dotá in toḷatan, bo kon sínea kon dotá in toyopan: kon batúan sínea notongkai in kobanatnea, tumongo dodoyowa nogatut bo ḻima nopuḷú nometer.

²⁰ Dá, koḷoben in butá kon Baḷoi Tuhan in notonggopat, ukurannea in tumododoyowa nogatut bo ḻima nopuḷú nometer kon pomuḷoi in sínea. Butá tatua in iḻibu dininding sin mopoyotondí in butá inta tongá posumbaan kon i Tuhan bo butá inta kon intau mita.