YEHEZKIEL 41 - Alkitab Singog In Mongondow Masa In Tanaa

¹ Ḷoḷaki tatua in nodia kon inakó sinumuot in gopot kon yuak, inta sinangoian Tampat Inta Motusi. Inukurnea in lorong inta nopobayá ná tatua: kobanatnea in toḷu nometer,

² bo kooḷadnea in doyowa bo tobotak nometer. Bo inukurnea doman in Tampat Inta Motusi tatua: kobanatnea in doyowa nopuḷú nometer bo kooḷadnea in mopuḷú nometer.

³ Onda intua sinumuot in sia kon gopot kon dotá in bonunea. Inukurnea in lorong inta nopobayá ná tatua: kobanatnea in tometer, kooḷadnea in toḷu nometer, bo dindingnea posibotak kobunodnea in toḷu botobotak nometer.

⁴ Bo inukurnea doman in gopot tatua: inta notonggopat, kobanat bo kooḷadnea in tumopopuḷú nometer. Onda intua sia in noguman kon inakó, “Naa in Tampat Inta Totok in motusi.”

Gopot mita inta inaidan kon dinding in Baḷoi i Tuhan

⁵ Naonda in ḷoḷaki tatua nogukur kon dinding dotá in bonunea kon Baḷoi i Tuhan: kobunodnea in toḷu nometer. Kon dinding posiḻibu in Baḷoi Tuhan tatua oyúon in gopot mita inta kooḷadnea in doyowa nometer.

⁶ Gopot mita tatua in tumototoḷu noḷandakan bo kon pomuḷoi in toḷandakan tumototoḷu nopuḷú in gopot. Dinding dotá in ḷuai kon batúan in ḷandakan in monipi-nipit nongkon dinding inta kon ḻimonagannea, dá gopot mita tatua in motaau ingguputan in ḷandakannea diá bidon bain momubú bui kon dinding in Baḷoi i Tuhan tatua.

⁷ Nongkon ḷuai in dinding Baḷoi Tuhan tatua koontongan notongkai in kobunodnea nongkon ḻimonag nodapot in omonikanea. Kon dinding dotá in ḷuainea nongkon Baḷoi i Tuhan, kon dotá in ḷuai in gopot mita tatua, oyúon in tukad moḷoben doyowa dá intau motaaubí in moponik nongkon ḷandakan kon ḻimonag bo mayá in ḷandakan induanea bo intoḷunea.

^8-11 Dinding dotá in ḷuainea tatua kobunodnea in doyowa bo tobotak nometer. Bangunan tatua in oyúon in ngaranea inta mopobayá in gopot mita kon dotá in utuan kon Baḷoi Tuhan, bo ngara ibanea inta mopobayá in gopot mita kon dotá in toḷatan. Kon ḻibu in Baḷoi Tuhan oyúon in teras inta kooḷadnea in doyowa bo tobotak nometer, toḷu nometer nongkon butá, bo pinotongkai in koḷantudnea in pondasi in gopot mita kon dinding in Baḷoi Tuhan. Kon sigad in teras bo bangunan mita inta pinaké in imang mita, oyúon in dangkuḷon inta kooḷadnea in mopuḷú nometer, kon dotá in koḷoigi koḷanan in Baḷoi Tuhan.

Bangunan kon dotá in toyopan

¹² Kon dotá in dangkuḷon kon dotá in toyopan, oyúon in baḷoi moḷoben inta kobanatnea in opat nopuḷú boḻima nometer bo kooḷadnea in toḷu nopuḷú boḻima nometer, bo kobunod in dindingnea mita in doyowa bo tobotak nometer.

Ukuran mita in Baḷoi Tuhan

¹³ Ḷoḷaki tatua in nogukur kon kobanat in Baḷoi Tuhan: Ḻima nopuḷú nometer. Nongkon dotá in tumi in Baḷoi Tuhan nodapot kon dinding tumi in baḷoi moḷoben kon dotá in toyopan tatua yayúnea in ḻima nopuḷú doman nometer.

¹⁴ Dotá in muna in Baḷoi Tuhan inta noitayow in pomukaan takin dangkuḷon kon koḷoigi koḷanannea, kooḷadnea in ḻima nopuḷú nometer doman.

¹⁵ Ḷoḷaki tatua in nogukur doman kon baḷoi moḷoben inta noitayow kon dangkuḷon kon dotá in toyopan: kooḷadnea in ḻima nopuḷú nometer, noitakin domandon in dindingnea koḷoigi koḷanannea. Yuang mita kon Baḷoi Tuhan, in yuang kon muna, Tampat Inta Motusi, bo Tampat Inta Totok in motusi,

Yuang mita in Baḷoi Tuhan takin tombonunea

¹⁶ binongkowan kayu, nongkon taḷog nodapot in dodimpayónea mita. Dodimpayó mita tatua in motaaubí oḻingoian in toipoi.

¹⁷ Bayongan in dinding kon dotá in bonunea iḷambáan in noyagi-yagimai in kurigan

¹⁸ in pangkoi in palem bo kerub, tobatú in pangkoi in palem kon sigad in kerub doyowa. Kerub tatua in doyowa in pogotnea,

¹⁹ tobatú in pogot in intau inta sinumayow kon pangkoi in palem kon dotá in koḷoigi, bo pogot in singa in sinumayow kon pangkoi in palem inta kon dotá in koḷanan. Kurigan mita tatua in oyúonbí kon bayongan in Baḷoi Tuhan,

²⁰ pinangkoi kon taḷog nodapot kon ḻimonikan in ngara.

²¹ Oigi mita in ngara nongkon Tampat Inta Motusi notonggopat. Kon tayowon in Tampat Inta Totok in Motusi oyúon in inta ontongon naonda bo mezbah nongkon kayu.

Mezbah nongkon kayu

²² Koḷantudnea in tometer bo tobotak bo kooḷadnea in tometer. Sikunea mita, taḷognea bo dindingnea in pinomia nongkon kayu. Ḷoḷaki tatua in noguman kon inakó, “Naa in meja inta kon tayowon in koangoian i Tuhan.”

Ngara mita

²³ Kon popod in lorong inta nopobayá in Tampat Inta Motusi oyúon in ngara tobatú, natua doman in kon popod in lorong inta nopobayá in Tampat Inta Totok in Motusi.

²⁴ Ngara mita tatua in ginapang in ḷoḻingkopnea inta nobuká kon yuak.

²⁵ Ngara mita in Tampat Inta Totok in Motusi iḷambáan in kurigan mita in pangkoi in palem bo kerub mita, naonda bo kon dindingnea mita. Kon tayowon in yuang kon muna inta kon dotá in ḷuainea oyúon in toipoi nongkon kayu.

²⁶ Kon dindingnea posibotak oyúon in dodimpayónea mita, bo dindingnea in iḷambáan in kurigan mita in kayu palem.