YEHEZKIEL 40 - Alkitab Singog In Mongondow Masa In Tanaa

OONTONGON SOAḶ BAḶOI I TUHAN KON SINGGAI MOIDUDUIMAI 40:1–48:35 Ki Yehezkiel dinia pinobayá in Yerusalem

¹ Kon singgai impuḷúnea kon buḷan imitánea, kon taong indoyowa nopuḷú bo ḻima kon pinoḷumbúan kon inami, mopuḷú bo opat notaong naonda in Yerusalem sinaḷow, kawasa i Tuhan in nongawasa kon inakó, bo dinia-Nea in akuoi minayá.

² Kon oontongon tobatú, ki Allah in nodia kon inakó minayá in butá in Israel pinobayá in buḷud inta totok in moḷantud. Kon tayowonku inontongku in totampat in bangunan inta ná batangan in kotá tobatú.

³ Akuoi in dinia-Nea kon tua bo inontongku in ḷoḷaki tobatú inta mopouḻi-uḻinag naonda bo porunggu sinimindog kon diug in bonawang. Nokadai mako in sia kon tontogot pogogukur nongkon linen bo kayu pogogukur.

⁴ Ḷoḷaki tatua in noguman kon inakó, “Ei intau ilo-ilow, indongogaidon kopia bo taridiai in bayongan inta poontongku kon inimu, sin tuabí in mangaḻe in pinodiaanku kon inimu namangoi in naa. Potaaudon kon bangusa in Israel in bayongan inta ontongonmu.”

Bonawang pomukaan

⁵ Bo akuoi in nokoontong kon Baḷoi i Tuhan inta iḻibu dininding. Ḷoḷaki tatua in nomangkoidon nogukur kon dinding tatua nomaké in kayu pogogukurnea inta koḷanggónea in toḷu nometer. Noniata magí dinding tatua koḷantudnea in toḷu nometer bo kobunodnea in toḷu doman nometer.

⁶ Onda intua minayá in sia in bonawang inta noitayow kon pomukaan. Noponik in sia kon tukadnea bo naonda in noidapot in tudunea, inukurnea in ngara in tatua, kooḷadnea toḷu nometer.

^7-10 Kon tumimai in ngara tatua oyúon in lorong tobatú bo kon sínea posiḷosi tumototoḷu in gopot poḷoḷukadan. Bayongan in gopot tatua notongkai in koḷobennea; notonggopat, koḷanggó in batúan sínea toḷu nometer. Dinding mita pinonigad kon batúan in gopot notongkai doman in kobunodnea, tumododoyowa nometer bo tobotak. Lorong tatua in sinimiḷanggó doman bui bo nopobayá ná yuang moḷoben inta noitayow kon Baḷoi Tuhan. Ḷoḷaki tatua in nogukur kon yuang moḷoben tatua bo noniata magí kooḷadnea in opat nometer; noiukat kon popod in bonawang, kon dotá in bonunea, inta totok in nodiug kon Baḷoi i Tuhan. Dinding mita inta kon dotá inta noitayow kon Baḷoi Tuhan, tometer in kobunodnea.

¹¹ Onda intua ḷoḷaki tatua in nogukur kon kooḷad in lorong kon bonawang; onom nometer bo tobotak, bo kooḷad doman in ḷoḻingkop in bonawang tatua in ḻima nometer.

¹² Kon tayowon in gopot mita poḷoḷukadan inta toto toḷu nometer mita tua, oyúon in dinding noompá inta tobotak in meter in koḷantudnea, bo kobunodnea in tobotak doman in meter.

¹³ Bo ḷoḷaki tatua in nogukur kon sigad nongkon dinding dotá in tumi in gopot tobatú poḷoḷukadan noidapot in dinding kon tumi in gopot poḷoḷukadan inta kon ḷoḷannea, yo mopuḷú bodoyowá nometer bo tobotak.

¹⁴ Sia in nogukur doman kon yuang moḷoben tatua: kobanatnea in mopuḷú nometer. Ngara in yuang tatua nopobayá in dangkuḷon kon ḷuai in Baḷoi Tuhan.

¹⁵ Sigad nongkon bonawang kon dotá in ḷuai noidapot kon dinding in yuang moḷoben kon dotá inta noitayow kon Baḷoi Tuhan in doyowa nopuḷú boḻima nometer.

¹⁶ Kon dinding tumi bo dinding sigad in gopot mita tatua in oyúon in dodimpayó mita mointok. Dinding mita kon dotá in bonunea inta noitayow kon lorong, iḷambáan kurigan in pangkoi mita in palem.

Dangkuḷon ḷuai in Baḷoi Tuhan

¹⁷ Onda intua ḷoḷaki tatua nodia kon inakó nongin ngara kon dangkuḷon kon ḷuai in Baḷoi Tuhan. Kon sí in dinding ḷuainea kon ḻibumai in Baḷoi Tuhan tatua pinosindog in gopot toḷu nopuḷú. Kon tayowon in gopot mita tatua oyúon in taḷog batu

¹⁸ inta noiḻibu kon bayongan in dangkuḷon tatua. Dangkuḷon ḷuainea tatua in moompá-ompá nongkon dangkuḷon dotá in bonunea.

¹⁹ Kon tua oyúon in ngara moḷoben ibanea inta moḷiu monik in ḷantudnea bo inta nopobayá ná dangkuḷon kon bonunea. Ḷoḷaki tatua in nogukur kon koyayú in ngara moḷoben doyowa tatua: ḻima nopuḷú nometer in yayúnea.

Bonawang Utuan

²⁰ Onda intua ḷoḷaki tatua in nogukur kon bonawang utuan inta nopobayá ná dangkuḷon bonunea.

²¹ Kon bonawang tatua, gopot toḷu poḷoḷukadan kon batúan in sí in lorongnea, dinding mita pinonigad takin yuangnea moḷoben, komintan notongkai in ngara mita inta kon dotá in pomukaan in ukurannea. Lorong in ngara mita tatua kobanatnea in doyowa nopuḷú boḻima nometer bo kooḷadnea in mopuḷú bo doyowa bo tobotak nometer.

²² Bo yuangnea doman moḷoben, dodimpayónea mita, bo kurigan mita in kayu palem in notongkai doman in inta kon dotá in pomukaan. Pitu in tukad in nopobayá in bonawang tatua, bo kon popodnea oyúon in yuang moḷoben inta noitayow kon dangkuḷon dotá in ḷuai in Baḷoi Tuhan.

²³ Noyogintayow in bonawang utuan, oyúon in bonawang ibanea inta nopobayá in dangkuḷon kon bonunea, notongkai inta ná kon dotá in bonawang pomukaan. Intau tatua in nogukur kon koyayú in bonawang tatua: ḻima nopuḷú nometer.

Bonawang toḷatan

²⁴ Noiduduimai kon tua, ḷoḷaki tatua in nodia kon inakó minayá in bonawang toḷatan bo nogukur. Noniata magí bonawang tatua notongkai in bonawang mita ibanea.

²⁵ Dodimpayó in gopotnea mita notongkai in inta kon bonawang mita ibanea. Kobanat in lorong bonawang tatua in doyowa nopuḷú boḻima nometer, bo kooḷadnea in mopuḷú bodoyowá bo tobotak nometer.

²⁶ Pitu notundug in tukad nopobayá ná bonawang tatua bo yuang doman moḷoben in kon popodnea, noitayow kon dangkuḷon dotá in ḷuai In Baḷoi Tuhan. Dinding mita kon dotá in bonunea inta noitayow kon lorong, iḷambáan in kurigan mita in pangkoi in palem.

²⁷ Kon tua in oyúon doman inta mopobayá in dangkuḷon kon bonunea. Ḷoḷaki tatua in nogukur kon koyayú in bonawang doyowa tatua: ḻima nopuḷú nometer.

Bonawang toḷatan inta nopobayá in dangkuḷon kon bonunea

²⁸ Noiduduimai kon tua ḷoḷaki tatua in nodia kon inakó nongin bonawang toḷatan sinumuot kon dangkuḷon kon bonunea. Sia in nogukur kon bonawang toḷatan tatua, bo ukurannea in notongkai in bonawang mita kon dotá in ḷuai.

^29-30 Gopot mita poḷoḷukadan tatua, yuangnea moḷoben, bo dinding mita kon dotá in bonunea notongkai in bonawang mita ibanea. Gopot mita kon bonawang tanaa in oyúon doman in dodimpayónea mita. Lorong in bonawang tatua kobanatnea in doyowa nopuḷú bo ḻima nometer bo kooḷadnea in mopuḷú bodoyowá bo tobotak nometer.

³¹ Táe yuangnea moḷoben in noitayow kon dangkuḷon kon ḷuai. Dinding mita kon dotá in bonunea inta noitayow kon lorong, in iḷambáan doman in kurigan mita in pangkoi in palem. Waḷu notontagá in tukadnea tua nopobayá ná bonawang tatua.

Bonawang pomukaan inta nopobayá ná dangkuḷon kon bonunea

³² Nopaḷut mako kon tua ḷoḷaki tatua in nodia kon inakó nongin bonawang pomukaan sinumuot kon palas kon dotá in bonunea. Sia in nogukur kon bonawang tatua bo ukurannea in notongkai in bonawang mita ibanea.

³³ Gopotnea mita poḷoḷukadan, dindingnea mita dotá in bonunea bo yuangnea moḷoben ukurannea in notongkai ná inta kon bonawang mita ibanea. Kon gopot mita tatua bo kon yuangnea moḷoben oyúon in dodimpayó mita. Kobanat in lorong bonawang tatua in doyowa nopuḷú boḻima nometer bo kooḷadnea in mopuḷú bodoyowá bo tobotak nometer.

³⁴ Yuangnea moḷoben in noitayow kon dangkuḷon kon ḷuai. Dinding mita kon dotá in bonunea inta noitayow kon lorong, iḷambáan in kurigan mita in pangkoi in palem. Waḷu notontagá in tukad in nopobayá in bonawang tatua.

Bonawang utuan inta nopobayá in dangkuḷon kon bonunea

³⁵ Imbuitnea ḷoḷaki tatua nodia kon inakó minayá in bonawang utuan. Sia in nogukur kon bonawang tatua bo ukurannea in notongkai in bonawang mita ibanea.

³⁶ Bo gopotnea doman mita poḷoḷukadan, dindingnea mita kon dotá in bonunea bo yuangnea moḷoben in notongkai doman in inta kon yuang mita ibanea. Kon gopotnea mita bo kon yuangnea moḷoben oyúon in dodimpoi mita. Kobanat in lorongnea tatua in doyowa nopuḷú boḻima nometer bo kooḷadnea in mopuḷú bodoyowá botobotak nometer.

³⁷ Yuangnea kon muna doman noitayow kon dangkuḷon kon ḷuai. Dinding mita kon dotá in bonunea inta noitayow kon lorong, iḷambáan in kurigan mita in pangkoi in palem. Waḷu notontangga in tukad mopobayá ná bonawang tatua.

Bangunan mita kon diug in bonawang utuan

³⁸ Kon dangkuḷon kon ḷuai oyúon in gopot tobatú indugangnea kon bonawang bonunea kon dotá in utuan. Nongkon gopot indugangnea tatua oyúon in ngara tobatú inta nopobayá ná yuang moḷoben. Kon tuata in pogingguan kon mahaḷuk mita inta pakéon mobaḻí kuruban payongon.

³⁹ Kon yuang moḷoben tatua, oyúon in meja opat, tododoyowa kon batúan in sínea. Kon tudu in meja mita tatuata ratáan in mahaḷuk inta baḻíon kuruban payongon, andeka kuruban potobut kon dosa andeka kuruban toḻiu in karugian.

⁴⁰ Kon ḷuai in yuang moḷoben tatua oyúonpa doman in meja opat, doyowa in kon batúan in sí in bonawang utuan tatua.

⁴¹ Dá, noyosipun magí waḷu in meja pororataan kon kuruban: opat in kon bonunea, bo opat doman in kon ḷuai in dangkuḷon.

⁴² Meja opat kon gopot indugangnea inta pinaké ponoḻisían kon kuruban payongon in batu bo pinakang. Meja tatua koḷantudnea in tobotak in meter, tudunea in notonggopat, kobanat bo kooḷadnea in toto toḷu nokoar in meter. Kon tudu in meja mita tatua in pinotagúan kon pakakat pororatá kon mahaḷuk pokuruban.

⁴³ Táe meja mita tatua in binongkowan in ḻibunea, kon batúannea pitu nopuḷú boḻima nomili. Bayongan in ponoyá inta pokuruban in tuduon kon meja mita tatua.

⁴⁴ Onda intua ḷoḷaki tatua in nodia kon inakó minayá in dangkuḷon kon bonunea. Kon tua oyúon in los doyowa, tobatú in kon sí in bonawang utuan bo noitayow in toḷatan, bo inta tobatú doman in kon sí in bonawang toḷatan bo noitayow in utuan.

⁴⁵ Ḷoḷaki tatua in noguman kon inakó kon los inta noitayow in toḷatan tatua in sinadia kon imang mita inta mopobayá in oaidan kon Baḷoi Tuhan,

⁴⁶ bo los inta noitayow kon utuan sinadia kon imang mita inta mopobayá in oaidannea kon mezbah. Bayongan in imang tatua musti nongkon buí mita i Zadok. Sin nongkon suku i Lewi tongábí buí i Zadok in motaau mayá tumayow kon i Tuhan sin mogundoi kon i-Nia kon ibada.

Palas dotá in bonunea bo Baḷoi Tuhan

⁴⁷ Ḷoḷaki tatua in nogukur kon dangkuḷon kon bonunea. Notonggopat intua: kobanat bo kooḷadnea in toḷoḻima nopuḷú nometer. Baḷoi Tuhan tua in kon dotá in toyopan, bo kon tayowonnea oyúon in mezbah tobatú.

^48-49 Onda intua dinianea in akuoi kon yuang kon muna kon Baḷoi Tuhan nongin tongonumai notontagá in tukadnea. Sia in nogukur kon yuang tumuot; kooḷadnea in pitu pokali kon doyowa botobotak nometer, takin dinding mita kon posiḷosinea tometer bo tobotak in kobunodnea. Kon koḷoigi bo kon koḷanannea oyúon in oigi pal tobatú. Yuang kon muna tatua in kobanatnea in mopuḷú nometer bo kooḷadnea in onom nometer.