YEHEZKIEL 37 - Alkitab Singog In Mongondow Masa In Tanaa

Ḷopá in tuḷan mita noingkag

¹ Akuoi kinawasaan i Tuhan, bo Roho-Nea in nodia kon inakó nosiḻig kon ḷopá inta nopuḻing in tuḷan.

² Akuoi dinia i Tuhan noḻibu kon ḷopá tatua, bo inontongku in ḷopá tatua noirarit magí-mako in tuḷan mita inta mobayong totok bo noingkag domandon totok.

³ Ki Tuhan in noḻibó kon inakó, “Ei intau ilo-ilow, degá motaau in biagon bui in tuḷan mita tanaa?” Akuoi in notubag, “Tuhan Inta Totok in moḷantud, tongábí Iko in nonotaau.”

⁴ Bo ki Tuhan nopotabá kon inakó nopotaau in koyow-Nea kon tuḷan mita inta noingkag tatua,

⁵ “Akuoi ki Tuhan Inta Totok in moḷantud mopoirup in tompot poginaan kon bonu in awakmu sinbá mobiag bui in moiko.

⁶ Popokompit-Ku bui in ugat bo tapú kon inimu poḷat bakuton-Ku in kuḻit in moiko. Moiko in ogoian-Ku in poginaan dá mobiag. Dá kotaauandon monimu kon Akuoibí in ki Tuhan.”

⁷ Bo akuoi ki Yehezkiel in nosingog kon tuḷan mita tatua pinodudui kon parenta i Tuhan. Bo koyogotpa in akuoi nosingog tua, dinongogku in singog koḷangká mako, sin tuḷan mita tatua in momangkoidon moyo-moyotondoḷ kon batúannea.

⁸ Koyogot in akuoi monaridimai kon tua, tuḷan mita tatua momangkoidon ougatan bo mobiag in tapúnea, bodongka monguḻit doman táe awaknea in diápabí mogina.

⁹ Ki Allah in noguman kon inakó, “Ei intau ilo-ilow, posingogdon kon tompot. Pogumandon kon Akuoi, ki Tuhan Inta Totok in moḷantud nomarenta kon inia sinbá mamangoi nongkon bayongan in tampat, sin mopoirup in tompot poginaan kon bonu in awak mita inta minatoi tatua sinbá mobiag bui in mosia.”

¹⁰ Dá nosingog in akuoi podudui in parenta i Tuhan bo tompot in nopoirup domandon in poginaan kon bonu in awak mita tatua dá nobiagdon in mosia bo sinimindog. Nobayong totok in mosia, tugatbí mobaḻí paanan moḷoben in tontara.

¹¹ Ki Allah in noguman kon inakó, “Ei intau ilo-ilow, tuḷan mita tanaa in nobaḻí tomponuot kon bangusa in Israel. Mosia in mogamui kon mosia in noingkag, diá kokamang bo diá in kobiagan mopia kon singgai moiduduimai.

¹² Tuamai in ponoḷanowdon kon umat-Ku Israel tatua kon Akuoi, ki Tuhan Inta Totok in moḷantud in momukatbí kon pinoḷobongan kon i monia. Akuoi in mopoḷuaibí kon i monia nongkon tua bo mopobui kon i monia kon butá in Israel.

¹³ Naonda in aidan-Ku mita in tua komintan, umat-Ku in monotaaudon kon Akuoibí in ki Tuhan.

¹⁴ Akuoi in mopoirupbí in tompot poginaan kon bonu in awak monia sinbá mobiag bui in mosia, bo ogoi-Kudon bui in mosia in mogutun kon butá monia tontaní. Dá kotaauandon monia kon Akuoibí in ki Tuhan. Akuoi ki Tuhan ain nosingog bo notantúbí kon mogaid kon tua.”

Yohuda bo Israel sinobatú bui

¹⁵ Ki Tuhan in noguman bui kon inakó,

¹⁶ “Ei intau ilo-ilow, gamádon in tungkud tobatú bo paisdon in tosingogon mita tanaa kon ḻimonikannea, ‘Dodatuan in Yohuda’. Bo gamá in tungkud tobatú ibanea, bo paisdon kon ḻimonikannea: ‘Dodatuan in Israel’.

¹⁷ Onda intua rangkom korigon in tungkud doyowa tatua modapot in popodnea mita moyoguputdon mobaḻí tungkud tobatú.

¹⁸ Aka bangusamu moḻibó kon mangaḻenea,

¹⁹ poguman kon i monia, kon Akuoi, ki Tuhan Inta Totok in moḷantud in mogamá kon tungkud inta nobaḻí tomponuot in Israel bo moponoyobatú takin in tungkud inta nobaḻí tomponuot kon Yohuda. Tungkud doyowa tatua in baḻíon-Kudon tobatú bo kadaian-Ku kon bonu in kawasa-Ku.

²⁰ Kadaiaidon in tungkud doyowa tatua bo poontongdon kon bangusa tatua.

²¹ Bo poguman kon i monia kon Akuoi, ki Tuhan Inta Totok in moḷantud in mogamábí kon bayongan in bangusa-Ku nongkon butá mita inta binayáan monia. Mosia in sipunon-Kubí bo diaan mobui kon butá monia tontaní.

²² Mosia in baḻíon-Kudon tongobangusa kon butá tatua, kon buḷud in Israel. Mosia in parentaanbí in datu tobatú, bo diá bidon moyosilai bui mobaḻí doyowa nobangusa andeka dodatuan.

²³ Mosia in diá bidon mongotor kon awak monia pongin mogaid kon dosa bo mosumba kon berhala mita inta mokorongó. Poḷuaton-Kudon in mosia nongkon bayongan in totuaḻingan inta nokopopisí kon i monia nonoḻikud kon i-Nakó. Potusion-Ku in mosia; mosia in mobaḻí umat-Ku, bo Akuoi in ki Allah monia.

^24-25 Mosia in tobatúondon kon datu tobatú ná ki Daud inta momarenta modapot in mononoi. Takin toḷutui mosia in dumudui kon hukum-Ku mita. Bo modapot in mononoi mosia takin buí monia in mogutun kon butá tatua, butá inta inogoi-Ku kon i Yakub bo pinogutunan in mogoguyang monia.

²⁶ Akuoi in momiabí kon tobatú dodandian takin i monia inta moḷukad kon kobiagan monia inta moodom modapot in mononoi. Barakatan-Kubí bo dugangan in kobayong monia. Kon butá monia tua posindogon-Kubí in Baḷoi-Ku inta mononoi kon tua.

²⁷ Akuoi in mogutunbí moyotakin monia, Akuoi in mobaḻíbí Allah monia bo mosia in mobaḻí umat-Ku.

²⁸ Aka Baḷoi-Ku bo kon yua-yuakdon monia modapot in mononoi, dá kotaauandon in bangusa mita ibanea kon Akuoi, ki Tuhan in ain nomiḻí kon Israel nobaḻí umat-Ku tontaní.”