YEHEZKIEL 36 - Alkitab Singog In Mongondow Masa In Tanaa

Barakat i Allah kon Israel

¹ Ki Tuhan in noguman, “Ei intau ilo-ilow, posingogdon kon buḷud mita in Israel bo pokiindongogaidon in mosia mokidongog kon tosingogon i Tuhan Inta Totok in moḷantud,

^2-6 ‘Kon tungkuḷ in bangusa mita kon diugmai nonubu poḷat nogagow kon i monimu, mosia in noningkuḻedon kon sinangkub in Israel. Takin pia in gina mosia in noguman kon tanaa in tombuḷud dungkuḷmai tatua nobaḻí kapunyaan monia. Tuamai, ei buḷud mita bo tombuḷud mita, tapá mita bo ḷopá, ei kotá inta ain nobaḻí apug bo inta sinaḷáandon in mogogutunnea poḷat doman pinogagowan bo siningkuḻe in bangusa mita kon diugneamai, indongogaidon onu in pinoguman i Tuhan Inta Totok in moḷantud kon inimu: Kon dodai in sinumagab in torú-Ku, sinorúan-Ku in bangusa mita inta kon diugmumai ḷontúnea kon tua in Edom, popisí in takin pia in gina bo takin doman aid moningkuḻe, ain nogagow kon butá-Ku bo nogagow kon rawang mita in bonoknea. Tanaa in tumorú in Akuoi popisí in bangusa mita tatua in noningkuḻedon totok bo nopoompámaidon kon i monimu.

⁷ Akuoi, ki Tuhan Inta Totok in moḷantud in mongibot kon bangusa mita inta kon diugmu tua in singkuḻeonbí doman.

⁸ Táe kon inimu in poguman-Ku ei buḷud mita in Israel, pangkoi mita in kayumu in momoḻimpingbí bo mobogoi in bungai bui kon umat-Ku Israel inta diádon moonggot bo mobui.

⁹ Akuoi in kon dotámu ei Israel, bo tantúon-Kudon kon butámu in pasoḷan bidon bui bo amboran bui in pinomuḷa.

¹⁰ Dugangan-Kubí in kobayong in umat-Ku Israel. Mosia in mogutunbí kon kotá mita bo bui moposindog in bayongan in apugnea.

¹¹ Intau mita inta nogutun kon inimu takin bobiagonnea in dugangan-Kubí, dá mobaḻídon mobayong totok mobayo-bayongdon kon inta muna, bo mosia in mononggadí mononggompubí kon mobayong. Mosia in mobiagbí kon tua ná dungkuḷ bo baḻíon-Kudon mobiag mooyúon, ná inta diápa kon dodai in onda in kinoyitakan monimu. Dá kotaauandon monia kon Akuoibí in ki Tuhan.

¹² Umat-Ku Israel, in diaan-Kubí mobui bo mogutun kon butánea bui. Butá tatua in mobaḻídon kapunyaan monia tontaní bo umuran mobogoi in bungainea dá ki adí mita monia in diádon matoi bui in gogoy.’

¹³ Akuoi, ki Tuhan Inta Totok in moḷantud in noguman, ‘Totuubí kon butá tanaa in tango-tangoian mokokaan kon intau bo mogogagow kon mongo adí mita – bangusa inta nogutun kon tua.

¹⁴ Táe pinangkoi kon tanaa mako butá tanaa in diá bidon mokaan kon intau andeka diádon mogagow kon i adí mita monia. Akuoi ki Tuhan Inta Totok in moḷantud ain nosingog.

¹⁵ Diá bidon paraḷu in butá tanaa in mokodongog kon singkuḻe in bangusa mita andeka mobaba kon singkuḻe in intau. Butá tanaa in diá bidon moyompat bui kon bangusa inta nogutun kon tua. Akuoi, ki Tuhan Inta Totok in moḷantud ain nosingog.’ ”

Pinonoimbaguan kon Israel

¹⁶ Ki Tuhan in noguman kon inakó,

¹⁷ “Ei intau ilo-ilow, kon dodai in intau mita in Israel nogutun kon butá monia tontaní, kinotorandon monia in aid bo dodia monia. Inanggap-Kubí kon dodia monia tua in poton, naonda bo bobay inta inangoinea.

¹⁸ Pinotugat-Ku kon i monia in torú-Ku popisí in mosia totokdon in noḻimod kon butá tatua bo nongotor pinongin berhala mita monia.

¹⁹ Mosia in ihukum-Ku pinodoyon kon kobobiag bo dodia monia, bo pinorarit-Ku in mosia kon butá mita in intau ibanea.

²⁰ Kon ondakabí in bayáan monia, mosia in umuranbí mopokotormai kon tangoi-Ku inta motusi. Sin intau mita in noguman nanaa, ‘Bangusa tanaa in umat i Allah, táe mosia in mustibí monaḷámai kon butá inta inogoi i Allah kon i monia.’

²¹ Morobonoḷbí in gina-Ku popisí in tangoi-Ku inta motusi in kinotordon in intau mita in Israel kon ondakabí in bayáan monia.

²² Manangka intua, potaaudon in onu inta poguman-Ku, ki Tuhan Inta Totok in moḷantud kon bangusa in Israel, ‘Onu in pomiaan-Ku kon singgai moiduduimai deemanbí popisí in moiko, ei intau mita in Israel, táe popisíbí in tangoi-Ku inta motusi, inta ain kinotor monimu kon ondaka in bayáan monimu.

²³ Poniata-Kubí in kototusi in tangoi-Ku inta moḷoben tua, tangoi inta ain kinotor monimu kon yua-yuak in bangusa mita, dá kotaauandon monia kon Akuoibí in ki Tuhan. Akuoi, ki Tuhan Inta Totok in moḷantud ain nosingog. Pakéon-Ku in moiko kon moponiata kon bangusa mita kon Akuoi naa in motusi, ki Tuhan Inta Totok in motusi.

²⁴ Nongkon batúan in bangusa bo butá, moiko in sipunon-Kubí bo popobui-Ku kon butá monimu tontaní.

²⁵ Mopaḷut mako kon tua moiko in pisikan-Ku in tubig inta mosilang, sinbá modaritdon nongkon bayongan in berhalamu bo nongkon bayongan yagi-yagi inta ain nokokotor kon i monimu.

²⁶ Dá moiko in ogoian-Kudon in gina bo raian inta mobagu. Ginamu inta ná kotogat in batu tua in baḷuian-Ku in gina inta motoindudui.

²⁷ Roho-Ku in popogonú-Ku kon bonu in ginamu bo ḷukadan-Ku in moiko sinbá mobiag podudui in hukum-Ku mita poḷat motoindudui kon bayongan in parenta-Ku.

²⁸ Dá moiko in mogutundon kon butá inta ain inogoi-Ku kon mogoguyangmu. Moiko in mobaḻídon umat-Ku bo Akuoi in mobaḻí ki Allahmu.

²⁹ Moiko in poḷuaton-Kudon nongkon bayongan in inta mokokotor kon inimu. Parentaan-Kubí in gandum sinbá mobiag motoḷubú modapot in moiko in diádon kon dodai in onda in koantugan in gogoy.

³⁰ Dugangan-Kubí in kotoḷubú in pangkoi mita in ayopmu bo bungai mita in pinomuḷa kon gobámu, dá moiko in diádon kon dodai in onda moiyitak kon malarat in kaanon inta mokoraat kon tangoimu kon sigad in bangusa mita.

³¹ Kotoropanbí monimu in dodiamu inta moraat bo aidmu inta diá patus tua, bo morongódon bui in moiko kon awakmu tontaní popisí in dosamu mita bo aidmu inta diá mopia tua.

³² Toropdon ei Israel, kon tua komintan i aidan-Kubí táe deemanbí popisí in moiko. Moiko in mustibí mooyá bo moempeng popisí in dodiamu. Akuoi ki Tuhan Inta Totok in moḷantud ain nosingog.’ ”

³³ Ki Tuhan Inta Totok in moḷantud in noguman, “Naonda in daritan-Ku mako in moiko nongkon bayongan in dosamu, ogoi-Kudon in moiko in mogutun bui kon kotámu mita, bo moposindog bui in apugnea mita.

³⁴ Dungkuḷmai intau mita inta mayá mongin rawangmu mita in nokoontong kon totuudon noḷogat in butá tatua, táe ogoi-Kudon bui in moiko mononggobá kon butá tatua.

³⁵ Dá bayongan in intau mongoherang, popisí in butá tatua inta dungkuḷmai noḷogatdon tanaa in nobaḷuidon nobaḻí taman in Eden, bo kotá mita inta dungkuḷmai noingongow, norimumud bo nobaḻídon apug mita, tanaa in nobaḻídon kotá mita inta notorindog in poḷoḷukadannea bo nosisídon in intaunea.

³⁶ Dá bangusa mita topodiugmai inta oyúonpa, in monotaaudon kon Akuoi, ki Tuhan, ain noposindog bui in kotá mita inta ain norimumud, bo nononggobá bui kon gobá mita inta ain noḷogat. Akuoi, ki Tuhan, ain nosingog bo notantúbí kon mopoaid intua.”

³⁷ Ki Tuhan Inta Totok in moḷantud in noguman, “Ei bangusa in Israel, moiko in ogoi-Kudon bui in mokituḷung kon i-Nakó; dugangan-Kudon bui in kobayongmu naonda bo paanan in domba.

³⁸ Kotá mita inta norimumud in tanaa, kon singgai moiduduimai in mopuḻingbidon in intaunea naonda bo Yerusalem kon singgai mita moḷoben kon singgai dungkuḷmai, nopuḻing in domba mita inta pinosumba. Dá kotaauandon monimu kon Akuoibí in ki Tuhan.”