YEHEZKIEL 35 - Alkitab Singog In Mongondow Masa In Tanaa

Hukuman i Allah kon Edom

¹ Ki Tuhan in noguman kon inakó,

² “Ei intau ilo-ilow, kutukdon in butá in Edom.

^3-4 Potaaudon kon intau mita inta nogutun kon tua in onu inta pinotaau-Ku, ki Tuhan Inta Totok in moḷantud kon i monia, ‘Akuoi naa in musungmu, ei intau mita inta nogutun kon buḷud in Edom! Butámu in baḻíon-Kubí moingongow diá in mogogutun, bo kotámu mita in mobaḻídon apug mita. Dá kotaauandon monimu kon Akuoibí in ki Tuhan.

⁵ Nongkon koḻipodpabímai sinaturu monimu in Israel bo nopomayá mako sinota-totad kon dodai in mosia kinoantugan in bodito saḷaku hukuman imbuitnea popisí in dosa monia.

⁶ Tuamai, podoyon kon i tangoi-Ku, ki Allah inta nobiag, ki Tuhan Inta Totok in moḷantud, popatoi in ukurmubí, bo moiko in diábí mokoḷagui nongkon tua. Moiko in kotaḷádon popisí in noḻimod, dá ḷoḻimod in mogaḷow doman kon inimu.

⁷ Kotámu mita kon buḷud in Edom in baḻíon-Kudon moingongow bo bayongan in intau inta tumaḻib kon tua in ḻimodon-Kubí.

⁸ Buḷud mita in bumbunan-Kubí in mayatmu mita, tombuḷud bo ḷopá in puḻingan-Kubí in intau mita inta minatoi kon parang.

⁹ Butámu in baḻíon-Ku rawang in kayuon modapot in mononoi, bo kotámu mita in diá bidon pogutunan in intau. Dá kotaauandon monimu kon Akuoibí in ki Tuhan.

¹⁰ Moiko in noguman kon pinomayá Yohuda andeka Israel bo butánea-butánea in hakmubí, bo mouḻíbí monimu umpakabí Akuoi, ki Tuhan, in ki Allah monia.

¹¹ Tuamai, podoyon kon tangoi-Ku, ki Allah Inta Totok in moḷantud, tuḻían-Kubí in iko, popisí in sinumorú in moiko, nointoi bo nondoí kon umat-Ku. Kotaauanbí monia kon moiko in hukumon-Kubí popisí in aidmu kon i monia.

¹² Dá kotaauandon monimu kon Akuoi, ki Tuhan, ain nokidongog kon singkuḻemu kon tungkuḷ in moiko noguman: Buḷud mita in Israel noingongowdon bo inogoidon nobaḻí kokaanon naton.

¹³ Ei bangusa in Edom, moambungangaḷ in moiko bo moḷoḷatú in singogmu kon i-Nakó. Dinongog-Ku bidon intua komintan.

¹⁴ Akuoi ki Tuhan Inta Totok in moḷantud in noguman: Sinangkub in dunia in mosanangbí kon tungkuḷ in sinangkub in butámu baḻíon-Ku rawang inta moingongow,

¹⁵ ná kinososanang in gina monimu kon dodai in nokoontong kon Israel kapunyaan-Ku nobaḻí noingongow. Buḷud mita in Seir, nodapot in sinangkub in butá in Edom in mobaḻíbí moingongow. Dá bayongan in intau in monotaaudon kon Akuoibí in ki Tuhan.’ ”