YEHEZKIEL 34 - Alkitab Singog In Mongondow Masa In Tanaa

Gombala mita in Israel

¹ Ki Tuhan in noguman kon inakó,

² “Ei intau ilo-ilow, torúaidon in datu mita in Israel, bo potaaudon in onu inta potaau-Ku, ki Tuhan Intau Totok in moḷantud kon i monia, ‘Moboditodon in moiko, ei gombala mita in Israel. Moiko in tongábí morai kon kopontinganmu tontaní, deemanbí kopontingan in dombamu mita.

³ Susunea in inumon monimu, bubuḷnea in pomiaan monimu ḷambung, bo domba inta totok in moḷongó in ratáan monimu bo kaanon. Diábí kon dodai in onda in tompiaanmai monimu in dombamu mita.

⁴ Domba mita inta noḻemé diábí ḷukadan monimu, inta notakit in diábí undaman monimu, inta kinekeban diábí binakut monimu, inta noiḷaḻe bo nobuḻi in diábí tayakon monimu bo diaan mangoi bui. Nodapotbí in bayongan in dombamu tatua in pomiaanbí monimu ibo-ibog.

⁵ Popisí in diádon kogombaḷa, dá domba mita tatua in noiraritdon bo nobaḻídon kokaanon in mahaḷuk moraat.

⁶ Dá domba-Ku mita in minayádon in tombuḷudannea mita inta moḷantud bo kon buḷud mita. Mosia in noibaya-bayá mako kon sinangkub in butá, diábí tobatúmai in intau in nopandungmai bo notayak kon i monia.

⁷ Yo, gombala mita, indongogai in onu inta potaau-Ku, ki Tuhan Inta Totok in moḷantud kon inimu:

⁸ Podoyon kon tangoi-Ku, ki Allah inta nobiag, tondudutdon! Domba-Ku mita ain dinomok bo kinaan in mahaḷuk moraat, popisí in diá in noḷukad kon i monia. Moiko in gombala-Ku mita in diábí nopandungmai kon domba mita tatua. Moiko in tongábí morai kon awakmu tontaní, deemanbí kopontingan in dombamu mita.

⁹ Dá indongogai ei gombala mita,

¹⁰ Akuoi, ki Tuhan Inta Totok in moḷantud in moguman kon inimu, kon Akuoi naa in musungmu. Domba-Ku mita tatua in gamáan-Kubí bui nongkon inimu bo diádon ogoi-Ku bui kon i monimu; moiko in diá bidon ogoi-Ku morai kon kopontingan monimu tontaní. Domba-Ku mita in posaḷamaton-Kubí nongkon inimu dá mosia in diádon mobaḻí kokaanonmu.’ ”

Gombala inta mopia

¹¹ Ki Tuhan Inta Totok in moḷantud in noguman, “Tayakon-Kudon tontaní in domba-Ku mita bo tompiaan in mosia,

¹² naonda bo gombala motayak bo mosipun kon dombanea mita inta noirarit bo bui tompiaan. Mosia in diaan-Ku bui nongkon tampat mita inta kinoraritan monia kon singgai inta nosindip bo inta diá mopia tua.

¹³ Poḷuaion-Kudon in mosia nongkon yua-yuak in bangusa mita bo nongkon butá mita in intau, bo sipunon-Ku pobayá in butánea tontaní. Mosia in ḷukadan-Ku bo pokaanon kon buḷud mita bo kon ḷopá mita in Israel bo diaan-Ku in mosia kon rawang mita in bonok inta moodom.

¹⁴ Totuu, Posadiaan-Kubí in mosia kon rawang mita in bonok inta moḷumbá kon buḷud bo kon ḷopá mita in Israel. Kon tua mogogai in mosia poḷat mokaan kon bonok takin pia-pia mako.

¹⁵ Akuoidon tontaní in mobaḻí gombala in domba-Ku mita tatua bo mosadia kon pogogogaian monia; Akuoi ki Tuhan Inta Totok in moḷantud ain nosingog,

¹⁶ Inta nobuḻi tayakon-Ku, inta noiḷaḻe diaan-Ku mobui, inta kinekeban bakuton-Ku in kekebnea inta notakit in undaman-Ku; táe inta noḷongó bo inta mosehat in yopúon-Ku, sin Akuoi in gombala inta mogaid kon onu inta mopia.

¹⁷ Indongogaidon, ei domba-Ku mita! Akuoi, ki Tuhan Inta Totok in moḷantud in moguman kon inimu kon Akuoi in monisigbí kon i monimu kon batúannea bo mopoyotondí kon inta mopia nongkon inta moraat, domba mita poyotondíon in bembé mita.

¹⁸ Kon sigad monimu oyúon in diá moorop aka tongá mokaan kon bonok inta totok in moḷumbá, táe poḷatbí moruntai kon bonok inta diá kinaan monia! Mosia in nonginum kon tubig inta nosilang bo mopaḷut mako moḷobog kon tubig inta diá ininum monia!

¹⁹ Domba-Ku mita ibanea in mustibí mokaan kon bonok inta ain iruntai magí-mako bo monginum kon tubig inta ain iḷobong.

²⁰ Tuamai, Akuoi, ki Tuhan Inta Totok in moḷantud moguman kon inimu, ei domba mita inta noḷongó, kon Akuoi in mamangoibí bo mobaḻí hakim kon sigad in domba mita inta moropot bo domba mita inta noḻemé.

²¹ Moiko in nogundud poḷat nondangat kon domba inta notakit nodapot in moitondí in mosia nongkon paanan in domba.

²² Táe Akuoibí tontaní in moposaḷamat kon domba-Ku mita, sinbá diádon pomiaan monia ibo-ibog. Akuoi in monisigbí kon domba-Ku mita kon batúannea bo mopoyotondí kon inta mopia nongkon inta moraat.

²³ Akuoi in moduíbí kon datu tobatú inta ná mogogundoi-Ku ki Daud, sin baḻíon-Ku gombala monia totobatú tua, bo sia in moḷukad kon i monia.

²⁴ Akuoi, ki Tuhan, in mobaḻíbí ki Allah monia, bo datu inta ná mogogundoi-Ku ki Daud tua in mobaḻí mongongawasa monia. Akuoi ki Tuhan ain nosingog.

²⁵ Akuoi in momiabí kon dodandian takin i monia, inta noḷukad kon kobiagan monia. Untunon-Kubí in bayongan mahaḷuk moraat nongkon sinangkub in butá, dá domba-Ku mita in mogutun moodom kon rawang mita bo mosiug kon kayuon mita.

²⁶ Barakatan-Kudon in mosia bo ogoi-Ku in mosia mogutun kon diug in tombuḷud-Ku inta motusi. Mosia in ogoian-Ku in uyan aka moibog in mosia.

²⁷ Pangkoi mita in kayu in momungaidon, pinomuḷa mita kon gobá in mobogoidon in bungainea, bo bayongan in intau in mogutunbí moodom kon butánea tontaní. Aka rante pinotogot kon umat-Ku bo botowandon bo mosia in poḷuaton-Kudon nongkon intau mita inta nononggata kon i monia, dá kotaauandon monia kon Akuoibí in ki Tuhan.

²⁸ Mosia in diá bidon pogagowan in bangusa mita inta diá nonotaau kon i-Nakó, andeka domokon in mahaḷuk mita moraat. Mosia in mobiag bidon motompia bo mooyúon, bo diá bidon in tobatúmai in intau in mopogogondok kon i monia.

²⁹ Poḷumbaan-Kubí in gobá mita monia dá diá bidon in malarat in kaanon kon butá tatua. Mosia in diá bidon singkuḻeon bui in bangusa mita ibanea.

³⁰ Dá kotaauandon in bayongan in intau kon Israel in umat-Ku bo mosia in iḷukadan-Kubí. Akuoi, ki Tuhan Inta Totok in moḷantud ain nosingog.

³¹ Totuu, moikobí in paanan in domba-Ku inta pinokaan-Ku. Moiko in umat-Ku, bo Akuoi in ki Allahmu. Akuoi ki Tuhan Inta Totok in moḷantud ain nosingog.”