YEHEZKIEL 33 - Alkitab Singog In Mongondow Masa In Tanaa

Ki Yehezkiel dinuí i Allah nobaḻí moḷoḷukad

¹ Ki Tuhan in noguman bui kon inakó, kai-Nia,

² “Ei intau ilo-ilow, pogumandon kon bangusamu kon aka Akuoi in mopoangoidon in parang kon ḻipú tobatú, naa in inta mobaḻí. Intau mita inta nogutun kon butá tatua in momiḻíbí kon intau tobatú kon sigad monia mobaḻí moḷoḷukad.

³ Aka moḷoḷukad tatua mokoontong kon musung mamangoi, posingogonneabí in tomponuot in anib sinbá mobasadia in bayongan in intau.

^4-5 Ki ine in mokodongog kon tomponuot in anib tatua táe diá mopandungmai, bo musung in mamangoi bo moḻimod kon inia, dá sia in matoi popisíbí in taḷánea tontaní. Aka kuma bo nopandungmai in sia kon tomponuot in anib tatua, yo notantúbí in sia kon mosaḷamatbí.

⁶ Táe aka moḷoḷukad tatua naonda in mokoontong kon musung bo diábí posingogonnea in tomponuot in anib, bo musung in moḻimod kon intau mita binaradosa tatua, dá siabí in tuntuton-Ku kon kinopatoian monia tua.

⁷ Ei intau ilo-ilow, iko in dinuí-Ku moḷoḷukad in bangusa Israel. Potaaudon kon i monia in tompoingat tanaa:

⁸ Aka Akuoi in mopotaau kon intau moraat tobatú in matoi, táe diápa pinopotoingatmu kon inia sinbá baḷuiannea in gogutúnea bá mosaḷamat in sia, dá matoidon in sia saḷaku intau inta binaradosapa. Táe totaau kon kinopatoiannea in tuntuton-Kubí kon inimu.

⁹ Aka iko nopotoingatdon kon intau moraat tatua bo doí in sia mogogai in mogaid kon inta moraat, yo matoibí in sia saḷaku intau binaradosa, táe iko in mosaḷamatbí.”

Batúan in intau mobaba kon bungai in aidnea tontaní

¹⁰ Ki Tuhan in noguman kon inakó, “Ei intau ilo-ilow, potaaudon bui kon intau in Israel in tosingogon monia tanaa, ‘Mororiga totok in gina nami popisí in inuntuan in dosa bo aid moraat nami. Naonda sinbá kami in umuran mobiag?’

¹¹ Potaaudon kon i monia, kon podoyon kon i-Nakó, ki Allah inta nobiag, ki Tuhan Inta Totok in moḷantud, diábí mopia in gina-Ku, aka intau moraat matoi; ibogon-Ku in sia in monaḷámai kon dosanea mita sinbá sia in umuran mobiag. Ei bangusa in Israel, pogogaidon in mogaid kon inta moraat! Nongonu sin moibogbí in moiko matoi?

¹² Yo, intau ilo-ilow, pogumandon kon intau in Israel kon aka intau inta moraat mogaid kon dosa, dá aidnea mopia inta dungkuḷ in diábí mokotuḷung kon inia. Aka intau moraat mogogai in mogaid kon dosa, yo sia in diábí hukumon bo aka intau mopia mogaid kon dosa, yo sia in diábí posaḷamaton.

¹³ Aka Akuoi in modandi kon moposaḷamatbí kon intau inta mopia, táe aka sia momangkoidon momia kon dosa bo moharap mako kon sia in posaḷamatonbí popisí in aidnea mopia dungkuḷmai, yo notoboḻingodon in sia. Diá bidon toropon-Ku in aidnea inta mopia dungkuḷmai bo matoibí in sia popisí in dosanea mita.

^14-15 Akuoi in nopotoingatdon kon intau inta moraat kon sia in matoibí. Táe aka mogogai in sia in mogaid kon dosa bo momangkoidon mogaid kon onu inta mopia bo moitutui, ná mopobui in pakakat inta pinogade in intau, andeka pakakat inta ain sinakownea bo dumuduidon kon hukum mita inta mokopoangoi kon kobiagan, dá diábí in sia matoi.

¹⁶ Akuoi in diá bidon monoropmai kon dosa mita inta ain inaidannea, bo sia in mobiagbí popisí in mogaid kon onu inta moitutui bo inta mopia.

¹⁷ Táe bangusa tatua in noguman kon aid-Ku tatua in diá moadil! Bokaka aidbí monia in diá moadil.

¹⁸ Komintanpa doman in poguman-Ku kon aka intau inta mopia momangkoidon mogaid kon inta moraat, yo sia in matoibí popisí in aidnea tatua.

¹⁹ Aka intau inta moraat mogogaidon mogaid kon dosa, bo momangkoidon mogaid kon onu inta mopia bo inta mobanar, yo sia in mobiagbí popisí in aidnea tatua.

²⁰ Umpaka natua bangusa in Israel in nogumanbí kon aid-Ku tanaa in diábí moadil. Totuu, hakimon-Kubí in mosia kon batúannea podudui in aidnea.”

Habar kon kinoḷabúan in Yerusalem

²¹ Kon singgai noginḻima buḷan impuḷúnea, kon taong impuḷú bodoyowá kon sempo in pinoḷumbúan kon inami, intau tobatú inta nokoḷagui nongkon Yerusalem namangoi kon inakó bo nopotaau kon Yerusalem in noḷabúdon.

²² Kon dodai in doḷom kon tungkuḷ in sia namangoi, kawasa i Tuhan namangoidon kon inakó. Dá kon dodai in intau tatua namangoi kon inakó, nokosingogdon in akuoi diádon nobobó.

Dosa mita in bangusa tatua

²³ Ki Tuhan in noguman kon inakó,

²⁴ “Ei intau ilo-ilow, intau mita inta nogutun kon apug in kotá mita kon butá in Israel tatua in noguman, ‘Ki Abraham in nokouḻí kon nobayong in butá, bokaka sia in tongábí sia-sia mita. Kita naa in nobayong, dá butá tanaa in nobaḻídon kapunyaan naton.’ ”

²⁵ Tuamai in ki Tuhan Inta Totok in moḷantud in nopotabá kon inakó nopotaau in koyow-Nea tanaa kon i monia, “Moiko in nokaan kon ponoyá inta oyúonpa in dugúnea; moiko in nosumba kon berhala bo noḻimod. Mokobaḻíbí totok in moiko in mongaku kon butá tanaa moiko in kitogi.

²⁶ Moiko in mopongatabí in kedangmu. Aidmu mokorongó. Moiko komintan nonuaḻing. Mokobaḻípa degá in moiko moguman kon butá tanaa moiko in kitogi?

²⁷ Podoyon kon i-Nakó, ki Allah inta nobiag, ki Tuhan Inta Totok in moḷantud, intau mita inta nogutun kon apug in kotá tatua in matoibí ḻimodon. Mosia inta nogutun kon rawang mita in kaanonbí in mahaḷuk mita inta moraat. Mosia inta nogadop kon buḷud mita bo kon angob mita in matoibí kotugatan in yampoi in takit.

²⁸ Butá tatua in baḻíon-Kubí padang gurun inta moingongow, bo kawasa inta pongatamai monia in moinggamádon. Buḷud mita kon Israel in moingongow bidon dá diádon in tobatúmai in intau in mokobaḻí tumaḻib kon tua.

²⁹ Kon tungkuḷ in Akuoi mohukum kon bangusa tatua popisí in dosa mita monia bo nopobaḻí noingongow in butá tatua, yo kotaauandon monia kon Akuoibí in ki Tuhan.”

Bungai in tongkoyow i nabi

³⁰ Ki Tuhan in noguman, “Ei intau ilo-ilow, iko in nobaḻídon toouman mako in intau tobangusamu aka mosia moyodungkuḷ kon diug in dinding mita in kotá andeka kon tayowon in ngara mita in baḷoi. Mosia in mosigumanan, ‘Koḻigai, indongogan mongo onu in koyow i Tuhan singgai in naa.’

³¹ Mosia in namangoi moyo-moyokapung bo saḷaku umat-Ku ḻimitú in mosia mokidongog kon tosingogonmu mita, táe onu in pokiaidmu diábí duduian monia. Bibig monia in moguman kon tosingogon mita motabi, táe gina monia in tongábí morai kon kauntungan.

³² Iko in inanggap intau inta mopodondong in dondong totabian inta mopia kodongogan bo mopia mopogogitog in kecapi. Totuu kon mokidongogbí in mosia kon tosingogonmu mita táe diábí duduiannea.

³³ Bayongan inta pinogumanmu tatua in mobaḻíbí, bo aka moiangoidon in wakutunea, kotaauandon monia kon nokoimontandon in nabi tobatú nogutun kon yua-yuak monia.”