YEHEZKIEL 3 - Alkitab Singog In Mongondow Masa In Tanaa

¹ Ki Allah in noguman, “Ei intau inta ilo-ilow, kaandon in ḻitodan in buk tanaa, bo bayádon bo posingogdon kon intau mita in Israel.”

² Bo binukáku in bibigku bo inogoi i Allah in ḻitodan in buk tatua sinbá kaanonku.

³ Guman-Nea, “Ei intau inta ilo-ilow, kaandon! Bonuaidon in sianmu in ḻitodan in buk tanaa.” Bo buk tatua in kinaanku nanamnea in moromimit naonda bo biluk.

⁴ Ki Allah in bui noguman, “Ei intau inta ilo-ilow, bayádon kon intau mita in Israel bo potaaudon in bayongan in koyow-Ku kon i monia.

^5-6 Kon i moniata potabá-Ku in iko, bo deeman kon bangusa inta singognea in mororiga, torupa bo diá komangaḻeanmu. Aka kuma bo iko potabá-Ku kon bangusa inta ná tatua, dá mosia in mokidongogbí kon tosingogonmu mita.

⁷ Táe bangusa in Israel in doíbí mokidongog kon inimu, nodapot in Akuoi in diábí doman pinandungmai monia. Mosia komintan pamandot bo moibog momaḷawang.

⁸ Tanaa iko in baḻíon-Kubí pamandot bo motontogat doman in gina naonda bo mosia.

⁹ Iko in baḻíon-Ku ná koroton in batu karang bo ná kotogat in intan. Dikadon moondok kon intau mita momomarontak tatua.”

¹⁰ Noiduduimai kon tua ki Allah in noguman, “Ei intau inta ilo-ilow, taridiai kopira bo toropdon in bayongan inta poguman-Ku kon inimu.

¹¹ Bayádon kon bangusamu inta kon bonu in pinoḷumbúan tatua, bo potaaudon in onu inta potaau-Ku, ki Tuhan Inta Totok in moḷantud kon i monia, moibog andeka doí in mosia mokidongog.”

¹² Bo Roho i Allah in nobingkat kon inakó bo kon tumiku in kinodongoganku in singog in gotup inta noguman, “Dayowdon in kamuliaan i Tuhan kon soroga.”

¹³ Dinongogku in singog in koḻikip in mahaḷuk mita tatua inta moyoḻiai, bo koḷangká in roda mita tatua inta ná koḷangon in singog in ḻinug.

¹⁴ Kawasa i Tuhan in namangoi kon inakó motoyang totok, bo naonda in akuoi biningkat bo dinia in Roho-Nea, ginaku in koraasaan mopait bo mopatú.

¹⁵ Dá noiyaputdon in akuoi kon tampat pinogutunan in intau mita inta iḻumbú kon Tel-Abib kon bingkí in Ongkag in Kebar. Pitu nosinggai in akuoi nogutun kon tua; noitongau mako in akuoi popisí in bayongan in inta bagukupa dinongog bo inta inontongku.

Ki Tuhan nomiḻí kon i Yehezkiel nobaḻí moḷoḷukad in Israel

¹⁶ Naonda in pitu nosinggai, ki Tuhan in noguman kon inakó,

¹⁷ “Ei intau ilo-ilow, iko in duíon-Ku mobaḻí moḷoḷukad in bangusa in Israel. Poyaputdon kon i monia in tompoingat inta inogoi-Ku tanaa.

¹⁸ Aka Akuoi mopotaau kon intau moraat tobatú in matoibí, táe iko in diá mopotoingat kon inia sinbá baḷuiannea in gogutúnea modapot in sia mosaḷamat, dá matoi in sia saḷaku intau inta binaradosa, bo totaau kon kinopatoiannea in moibaba kon inimu.

¹⁹ Aka iko mopotoingat kon intau moraat tatua bo doí in sia mogogai in mogaid kon inta moraat, yo sia in matoibí saḷaku inta binaradosa, táe iko in mosaḷamatbí.

²⁰ Aka intau inta mopia momangkoidon momia kon dosa, bo sia in potayow-Ku kon anib, dá sia in matoibí aka iko in diá mopotoingat kon inia. Sia in matoibí popisí in dosanea mita, bo aidnea mita inta mopia in diá bidon toropon-Ku. Táe totaau kon kinopatoiannea in moibaba kon inimu.

²¹ Aka intau inta mopia tatua ogoianmu in tompoingat sinbá diá mogaid kon dosa, bo dumudui in sia kon tongginamu, dá diábí in sia hukumon-Ku, bo iko in mosaḷamatbí.”

Ki Yehezkiel in mobaḻí mobobó

²² Kinorasaanku in ropot in kinoangoian i Tuhan bo dinongogku in Sia noguman kon inakó, “Pobangondon bo bayádon kon ḷopá. Kon tua Akuoi in mopoyaput in singog kon inimu.”

²³ Dá minayádon in akuoi kon ḷopá, bo kon tua inontongku in bayag nonindar inta moponiata kon kinoangoian i Tuhan ná inta ain inontongku kon bingkí in Ongkag in Kebar. Bo noitongkob in akuoi kon tudu in butá,

²⁴ táe Roho i Allah in sinumuot bo noposindog kon inakó. Ki Tuhan in noguman kon inakó, “Pobuidon bo tuotdon kon bonu in baḷoi dika ḷumua-ḷuai.

²⁵ Ei intau inta ilo-ilow, iko in togoton-Ku in tontogot modapot in diá mokoḷuai bo diá motaau moyodungkuḷ in intau.

²⁶ Potorondóon-Ku in dilámu, dá iko in diádon motaau mopotoingat kon bangusa momomarontak tanaa.

²⁷ Bain, aka Akuoi mosingog bui kon inimu bo mopobui in ropotmu mosingog bui, yo iko in mustibí mopotaau kon onu inta poguman-Ku, Tuhan Inta Totok in moḷantud kon i monia. Tongosilai kon i monia in mokodongogbí, táe tongosilai doman in diábí mokidongog, sin mosia in totuubí kon bangusa momomarontak.”