YEHEZKIEL 29 - Alkitab Singog In Mongondow Masa In Tanaa

Hukuman kon Mesir

¹ Kon singgai impuḷú bodoyowá kon buḷan impuḷúnea, kon taong nogimpuḷú kon sempo in pinoḷumbúan kon inami, ki Tuhan in noguman kon inakó,

² “Ei intau ilo-ilow, torúaidon in ki datu in Mesir. Potaaudon kon inia kon sia takin bayongan in rayat in Mesir in hukumonbí.”

³ Ki Tuhan Inta Totok in moḷantud in nopotabá kon inakó mopotaau kon i datu in koyow tanaa, “Akuoi naa in musungmu, ei bangkeḻé moḷoben inta nosiug mako kon yuak in ongkag. Iko in mongambungangaḷ kainimu in Ongkag in Nil iko in kitogi bo iko in nomia.

⁴ Taanan-Kubí in kokaud in tunggimu bo ukatan in toyá mita kon unapmu. Bo uguton-Ku in iko poḷuai kon Ongkag in Nil takin bayongan in toyá inta noikompit kon unapmu tua.

⁵ Onda intua iko bo bayongan in toyá tatua in pogambat-Ku kon rawang in bungaion. Awakmu in moirobudon kon butá bo moitongkob mako kon tua. Diábí tobatúmai in intau in moḷobong kon inimu. Awakmu in ogoi-Kubí kon ḷagapan mita bo mahaḷuk mita ibanea sin kaanon.

⁶ Dá kotaauandon in bayongan in rayat in Mesir kon Akuoibí in ki Tuhan.” Ki Tuhan in noguman, “Ei bangusa in Mesir! Intau in Israel in mogoḷat mako kon totuḷungmu, táe noniata magí iko nion in tongábí tungkud inta noḷukó

⁷ Kon dodai in mosia umandoḷ kon inimu, noputoḷ in iko bo noiturak kon iyok monia, dá ḻikud monia in noiḷogit.

⁸ Tuamai Akuoi, ki Tuhan Inta Totok in moḷantud, noguman kon inimu, kon Akuoi in mopotabá mangoi in tontara inta monubu kon inimu momaké in kedang, bo ḻimod kon intau takin bobiagonmu.

⁹ Mesir in mobaḻídon butá inta moingongow totok. Dá kotaauandon monimu kon Akuoibí in ki Tuhan.” Ki Tuhan in noguman, “Ei datu in Mesir! Popisí in iko in noguman kon Ongkag in Nil iko in kitogi bo iko in nomia,

¹⁰ dá Akuoi in mobaḻí musungmu, bo musung in Ongkag in Nilmu. Sinangkub in Mesir baḻíon-Ku butá inta moingongow totok pangkoion kon kotá in Migdol kon utuan modapot kon kotá in Aswan kon toḷatan, modapot kon pinosigadan in Sudan.

¹¹ Diábí in intau andeka mahaḷuk in tumaḻib kon tua. Kon bonu in opat nopuḷú notaong diábí in intau in mogutun kon tua.

¹² Baḻíon-Kubí in Mesir moingongow dá kon sigad in butá mita inta noingongow ibanea, Mesirdon in totok in moingongow. Kon bonu in opat nopuḷú notaong kotá mita in Mesir in mobaḻíbí apug inta moiḻiudon kon apug mita in kotá kon ondakabí. Bangusa in Mesir in baḻíon-Kubí moḷoḷagui mita. Mosia in moibaya-bayábí mako kon bayongan in butá bo mogutun kon yua-yuak in bangusa ibanea.”

¹³ Ki Tuhan Inta Totok in moḷantud in noguman, “Ei bangusa in Mesir, mopaḷut mako in opat nopuḷú notaong tatua, moiko in diaan-Kubí bui nongkon butá mita inta pinoporaritan kon i monimu.

¹⁴ Moiko in tompiaan-Kubí bui bo pokipogutunan kon Mesir kon dotá in toḷatan, butámu dungkuḷ. Kon tua aidan monimu in dodatuan inta moyangkó,

¹⁵ inta moiḻiu in yangkó kon sinangkub in dunia. Baḻíon-Ku in moiko totok in moyangkó dá moiko in diábí mokoparenta kon bangusa mita ibanea andeka dumodia kon monia.

¹⁶ Israel in diá bidon mopoigum in totuḷung kon inimu. Ukurmu ei bangusa in Mesir in moponoropbí kon Israel kon noitaḷádon totok in nopongata in Mesir, ná inta nokoimontandon inaidannea. Dá kotaauandon in Israel kon Akuoibí in ki Tuhan Inta totok in moḷantud.”

Ki Datu Nebukadnezar in monaḷowbí kon Mesir

¹⁷ Kon singgai imitánea kon buḷan doman imitánea kon bonu in taong indoyowa nopuḷú bo pitu kon sempo in pinoḷumbúan kon inami, ki Tuhan in noguman kon inakó,

¹⁸ “Ei intau ilo-ilow, ki Datu Nebukadnezar nongkon Babel in monububí kon Tirus. Sia in mopotabábí kon tontara mita momotaan kon dodiaan mita inta mobogat totok, modapot in uḷu monia in moḷogatdon bo motompaḻí in obaga monia, táe pinomayá datu andeka tontaranea diábí nokouḻí kon onu in sinayak onukabí in siniḷopían tua.

¹⁹ Tuamai, Akuoi ki Tuhan Inta Totok in moḷantud in noguman: Butá in Mesir in ogoi-Kubí kon i Datu Nebukadnezar. Sia in mogagowbí poḷat modia kon bayongan in kapunyaan in Mesir mobaḻí tondan kon tontaranea.

²⁰ Butá in Mesir in ogoi-Ku kon inia mobaḻí toguboḻi in bayongan oaidnea, popisí in tontaranea in nogaidon kon oaidan-Ku. Akuoi ki Tuhan Inta Totok in moḷantud ain nosingog.

²¹ Aka tua bo mobaḻídon, baḻíon-Ku in Israel bangusa inta moropot, bo mobogoi kon inimu Yehezkiel, mosingog diá in moḷamboi dá bayongan in intau mokidongogdon kon inimu. Dá kotaauandon monia kon Akuoibí in ki Tuhan.”