YEHEZKIEL 28 - Alkitab Singog In Mongondow Masa In Tanaa

Datu in Tirus ihukum

¹ Ki Tuhan in noguman kon inakó,

² “Ei intau ilo-ilow, potaaudon kon i datu in Tirus, onu inta poguman-Ku, Akuoi ki Tuhan Inta Totok in moḷantud kon inia, ‘Iḷumoḷatú totok in iko in nonganggap kon iko in dewa inta nomarenta kon yua-yuak in dagat. Motaaubí doman iko in tumon dewa, táe toropdon, iko in tongábí intau ilo-ilow.

³ Kainimukamai ikobí in mopando-pandoi in ki Danel, dá diá in rahasia in noibuni kon inimu.

⁴ Pinakému in hikmat bo pomomangaḻemu posipun kon kapunyaan, buḷawan bo saḷaka.

⁵ Totuu, mopandoi in iko modagang bo tanaa in nooyúondon totok, bo kaoyúonanmu tua in nokoḷoḷatú kon inimu!’ ”

^6-7 Ki Tuhan Inta Totok in moḷantud in noguman, “Ei Tirus, popisí in inanggapmudon kon iko in notongkai i Allah, dá potabá-Kudon mangoi in tontara in intau inta totok in moḻingá sin monubu kon inimu. Mosia in morimumudbí kon bayongan in kogagamu inta ain kinodapotanmu popisí in hikmat bo pomomangaḻemu.

⁸ Iko in ḻimodonbí bo ḷobongon kon bonu in dagat.

⁹ Yo, aka moiangoidon in wakutunea tatua, mokopogumanpa degá in iko kon iko in ki Allah? Kon tayowon in moḷoḻimodmu mita, moniatadon kon iko in tongábí intau ilo-ilow.

¹⁰ Iko in matoibí naonda bo intau noempeng popisí in ḻimodon in intau ango-angoi inta diá nonotaau kon i Allah. Akuoi, ki Tuhan Inta Totok in moḷantud ain nosingog.”

Kinoḷabúan i datu in Tirus

¹¹ Ki Tuhan in bui noguman kon inakó, kai-Nia,

¹² “Ei intau ilo-ilow, amuiaidon in ki datu in Tirus. Potaaudon in onu inta poguman-Ku, Akuoi Tuhan Inta Totok in moḷantud kon inia, ‘Iko in nokoimontandon in nobaḻí lambang in kosompurnaan; dungkuḷmai iko in totuu mobijaksana bo mogaga!

¹³ Pogogutunanmu in kon Eden, taman i Allah. Pakeangmu iḷambáan in noyagi-yagimai in permata: batu delima bo intan, topas, batu pirus, batu yakut, ratna, cempaka, batu nilam, zamrud bo batu alkali nopura. Ḷambá buḷawanmu in mobayong doman. Pakakat mita tatua in pinomia kon inimu kon singgai iko binaḻí.

¹⁴ Malaekat inta mokoondok sinampatmu kon tua sin moḷukad kon inimu. Iko in nogutun kon tudu in buḷud-Ku inta motusi bo minayá kon yua-yuak in batu permata inta mopouḻi-uḻinag.

¹⁵ Oaidmu in nosompurna pinangkoi iko binaḻí nodapot in iko nomangkoi nogaid kon moraat.

¹⁶ Iko in mosibuk in modagang, bo tuata in nodia kon inimu pamandot bo nogaid kon dosa. Dá pinoguntun-Ku in iko nongkon buḷud-Ku inta motusi, bo malaekat moḷoḷukadmu nogampoi kon inimu nongkon yua-yuak in permata inta mopouḻi-uḻinag tua.

¹⁷ Batanganmu inta mogaga nokoḷoḷatú kon inimu bo kaoyúonanmu nokopopisí kon inimu notombodok. Tuamai pinomobak-Ku in iko kon butá bo binaḻí-Ku tompoingat kon datu mita ibanea.’ ”

¹⁸ Ki Tuhan in noguman, “Ei Tirus, iko in nongotor kon pooibadaanmu popisí in taḷá mita bo tombogá kon dodai in nodagang. Tuamai in tubáan-Ku in iko modapot in motondodai in butá. Bayongan in intau inta moindoi kon inimu tongádon moindoi kon ḷobud.

¹⁹ Iko in noinggamádon modapot in mononoi. Bayongan in bangusa inta nonotaau kon inimu nourot popisí in moondok in mokonanam kon ukur ná tatua.”

Toḷanow kon pohukuman kon Sidon

²⁰ Ki Tuhan in noguman kon inakó,

²¹ “Ei intau ilo-ilow, kutukdon kotá in Sidon.

²² Potaaudon kon intaunea mita kon Akuoi ki Tuhan Inta Totok in moḷantud noguman kon i monia, ‘Akuoi naa in musungmu, ei Sidon. Intau mita in modayowbí kon i-Nakó popisí in inta inaidan-Ku kon i monia. Kon tungkuḷ in Akuoi nohukum kon intaumu, kotaauandon monia kon Akuoibí in ki Tuhan inta motusi.

²³ Akuoi in mopoangoibí in yampoi in takit, bo mopomayádon mako in koiḻigan in dugú kon daḷanmu mita. Iko in tubuonbí in musung nongkon bayongan in tampat, bo intaumu mita in ḻimodonbí. Dá kotaauanmudon kon Akuoibí in ki Tuhan.’ ”

Israel in barakatanbí

²⁴ Ki Tuhan in noguman, “Ḻipú mita topodiugmai inta nokoimontandon in noningkuḻe kon Israel, diábí mobaḻí ná dugi inta mokoyaat kon gina in Israel. Mosadar bidon in mosia kon Akuoibí in ki Tuhan Inta Totok in moḷantud.”

²⁵ Ki Tuhan Inta Totok in moḷantud in noguman, “Sipunon-Kubí in intau mita in Israel nongkon butá mita moyayú kon tampat inta ain pinoporaritan-Ku kon i monia, bo bayongan in bangusa in monotaaudon kon Akuoi in motusi. Bangusa in Israel in mogutunbí bui kon butá monia tontaní, butá inta ain inogoi-Ku kon mogogundoi-Ku ki Yakub.

²⁶ Mosia in mobiagbí moodom kon tua bo moposindog in baḷoi mita bo mononggobá poḷat momuḷa kon anggur. Akuoi in mohukumbí kon bayongan in topodiug monia inta ain noningkuḻe kon i monia, dá Israel in moodomdon. Dá kotaauandon monia kon Akuoibí in ki Tuhan Allah monia.”