YEHEZKIEL 27 - Alkitab Singog In Mongondow Masa In Tanaa

Dondong poḷobongan kon Tirus

^1-3 Ki Tuhan Inta Totok in moḷantud in noguman kon inakó, “Ei intau ilo-ilow, podondongdon in dondong poḷobongan kon Tirus, kotá kon pintad inta nodagang takin intau mita kon bayongan in pintad: Tirus iḷumoḷatú iko in moguman, ‘Koḷunatku in totuu kon notompod.’

⁴ Kon inimu baḷangon in naonda bo baḷoi. Iko in pinosindog naonda bo kapaḷ inta mogaga.

⁵ Dindingmu in kayu aras in Buḷud Hermon oigi in ḻeagmu in kayu ḷokuyú nongkon Libanon.

⁶ Bobotoimu mita in pinomia nongkon pangkoi mita in kayu moḷoben kon Basan. Taḷogmu in pinomia nongkon kayu ḷokuyú, nongkon ḻibuton in Siprus, ḷambánea in pinomia nongkon gading inta nomahaḷ.

⁷ Ḻeag bo tomponuotmu in nongkon linen in Mesir, inta sinujian in noyagi-yagimai. Moaḷus totok in bahan mita in ḷoḷaiganmu, didit nongkon Siprus nokamumu in batangannea.

⁸ Mobobotoimu in nongkon Sidon bo Arwad. Intau mita in kapaḷmu in moḷoḻeag mita inta mokaḻet.

⁹ Mogogimok mita inta nomia kon kapaḷ in mogogimok mita nongkon Gebal. Nongkon bayongan in butá kapaḷ mita in mamangoi moyopakat mototaḷuian.

¹⁰ Tontara mita nongkon Persia, Lidia bo Libia in tumuot mobaḻí tontaramu. Mosia in motadang kon kaḻeaw bo sapoyo uwaja monia kon dinding mita in kotámu. Mosia in noduḷudon nonaḷow kon musung mita bo nokodugang kon koḷoḷantud in tangoimu.

¹¹ Tontara mita nongkon Arwad in noḷukad kon dindingmu mita; ḷangkeangmu mita in iḷukadan in intau mita nongkon Gamad. Kaḻeaw monia in noibambé noyopipid kon dindingmu. Mosia tuata inta nogintompod kon kogogagamu.

¹² Iko in nopotaḷui in pakakat mita in daganganmu inta mobayong totok tua kon Spanyol, bo inta nobaḻí uboḻinea kon inimu in saḷaka, uatoi, tangat mobudó bo tangat morondí.

¹³ Iko in nodagang kon Yunani, kon Tubal, bo kon Mesekh, bo tomboḻinea kon inimu in ata mita bo pakakat mita nongkon porunggu.

¹⁴ Iko in noponoḻiu in pakakatmu mita kon kabaḷo in kereta, kabaḷo totakoian bo bagal nongkon Bet-Togarma.

¹⁵ Intau in Rodus nodagang doman takinmu bo intau mita inta nogutun kon pintad in notaḷui kon pakakat mita inta pinotaḷuimu takin uwaḷa bo kayu moyondí.

¹⁶ Mododagang mita nongkon Siria in notaḷui kon pakakat mita inta pinotaḷuimu bo inta nongouḻímu mita inta mobayong tua. Inuboḻian monia in permata nongkon batu zamrud, kaeng nokamumu, kaeng sinujian, linen moaḷus, permata nongkon batu koral bo batu nopura delima.

¹⁷ Yohuda bo Israel in noponoḻiu in pakakat daganganmu in gandum, biluk, ḷana in zaitun bo toyokayu mita.

^18-19 Intau in Damsyik in notaḷui kon pakakat pinodagangmu bo inta nouḻímu mita bo inuboḻian monia in anggur nongkon Helbon, bubuḷ in domba nongkon Sahar, uatoi bo toyokayu mita.

²⁰ Intau in Dedan noguboḻi kon pakakatmu mita nomaké in kaeng mita in sabarak.

²¹ Intau in Arab bo mongongawasa in butá in Kedar notaḷui kon pakakatmu mita nomaké in ki adí in domba, domba koḷakian bo bembé.

²² Popisí in motaḷui kon pakakatmu mita dá mododagang nongkon Syeba bo Raema nodia kon permata mita, buḷawan bo toyokayu mita inta totok in mongopia.

²³ Kotá mita in Haran, Kane, Eden, mopopotaḷui nongkon Syeba, kotá mita in Asyur bo Kilmad, komintan nodagang takinmu.

²⁴ Mosia in nopotaḷui kon inimu in pakeang mita inta totok in mongopia, kaeng nokamumu, kaeng sinomboréan, permadani mita inta norupa-rupamai in batangannea, bo tontogot mita inta morigon.

²⁵ Pakakat mita inta potaḷuimu dinia in kapaḷ dagang inta mongoḷoben mita. Iko in nádon onda bo kapaḷ inta mobogat in datognea, kapaḷ inta iḷumeag kon baḷangon.

²⁶ Mobobotoi mita nodia kon inimu minayá in baḷangon. Iko in dinumpak in tompot in pomukaan inta nondangat.

²⁷ Bayongan in pakakat dagangan inta dinatogmu, komintan in ḷumoḷeag takin intaumu mita, bayongan in mogogimok bo mopopotaḷuimu, pomuḷoi in tontara kon kapaḷ tatua, mosia in komintan nobuḻi noḷomot kon tungkuḷ in noitaḷom in iko.

²⁸ Moḷoḷeagmu mita in kinumarak popisí in noondok karaknea in kodongogan kon pintad mita in dagat.

²⁹ Tanaa kapaḷ tatua in sinaḷáandon, bayongan in ḷumoḷeagmu minayádon in toba.

³⁰ Inombaḷan monia in ukurmu, nokuani bo nogamui totok. Mosia in nopoinggú in ḷobud kon uḷu. Bo nonangkuḻitod kon bonu in ḷobud tomponuot in togumatoi.

³¹ Popisí in iko dá nokibangkuḷug in mosia, nomaké in kaeng karong tomponuot in morobonoḷ in gina. Nongombaḷ totok in mosia bo nogamui kon ukurmu.

³² Bo nopodondong in mosia in dondong poḷobongan, ‘Tirus, ki ine in koḻimonikanmu? Tirus, kon dagat kibio-biómaidon in iko.

³³ Kon tungkuḷ in baḷangon iḷoḷananmu takin nopuḻing in datog, dinatoganmu in inta pakéon in bangusa mita, nodapot in datu mita binaḻímu nooyúon.

³⁴ Tanaa noitaḷomdon in iko, norimumud kon apad in dagat. Bayongan in intaumu bo bayongan in datog nobuḻi noyotakinmu kon yuak in dagat.’

³⁵ Bayongan in intau inta nogutun kon bingkí in dagat noondok in nokodongog kon ukurmu. Nodapot in datu mita monia totok in noondok; koningkim in awak koontongan kon pogot mita monia.

³⁶ Iko in nobuḻi noinggamá nodapot in mononoi. Mododagang mita kon sinangkub in dunia nodoḻiok popisí in noondok in mokonanam kon ukur ná tatua.”