YEHEZKIEL 25 - Alkitab Singog In Mongondow Masa In Tanaa

Toḷanow kon pohukuman kon intau in Amon

¹ Ki Tuhan in noguman kon inakó,

² “Ei intau ilo-ilow, kutukdon in butá in Amon.

³ Potabádon in bangusa tatua mokidongog kon onu inta poguman-Ku, ki Tuhan Inta Totok in moḷantud kon i monia, ‘Mopia in gina monimu in mokoontong kon Baḷoi-Ku in kotoron bo butá in Israel in poguyaaton bo bangusa in Yahudi in akuton kon poḷumbúan.

⁴ Tuamai in pomayá-Kudon mako in moiko in taḷowon in suku mita in bangusa nongkon rawang in Pomukaan. Mosia in moposindogbí in ḷoḷaigan mita kon butámu bo mogutun motantú kon tua. Mosia in mokaanbí kon bungai in pinomuḷamu bo monginum kon susu in bobiagonmu.

⁵ Kotá in Raba in baḷuian-Ku mobaḻí popokaanan kon unta, bo sinangkub in butá in Amon mobaḻí popokaanan in domba. Dá kotaauandon monimu kon Akuoibí in ki Tuhan.’ ”

⁶ Ki Tuhan Inta Totok in moḷantud in noguman, “Moiko in monggoḷokap sindaḷan motayok sin moḷunganga in gina. Moiko in mopoompámai kon butá in Israel.

⁷ Tuamai in ogoi-Ku in moiko kon bangusa mita inta bain mogagow kon bayongan in kapunyaanmu. Moiko in yopúon-Kubí námai tua, modapot in diádon mobaḻí tongobangusa bo diádon kobutá tontaní. Dá kotaauandon monimu kon Akuoibí in ki Tuhan.”

Toḷanow pohukuman kon Moab

⁸ Ki Tuhan Inta Totok in moḷantud in noguman, “Moab in noguman kon Yohuda tua in notongkai in bangusa mita ibanea.

⁹ Tuamai in kotá mita inta moḷukad kon sigad mita in butá in Moab in pomayá-Kudon mako tubuon in musung moitakin doman in kotá mita inta totok in mogaga, tuata in: Bet-Yesimot, Baal-Meon bo Kiryataim.

¹⁰ Pomayá-Kubí in suku mita in bangusa nongkon rawang pomukaan in monaḷow kon Moab takin butá in Amon, dá Moab in diádon mobaḻí bangusa tobatú.

¹¹ Hukumon-Kubí in Moab, dá kotaauandon monia kon Akuoibí in ki Tuhan.”

Toḷanow pohukuman kon Edom

¹² Ki Tuhan Inta Totok in moḷantud in noguman, “Bangusa in Edom ain nogaid kon taḷá moḷoben popisí in noḻingádon kon Yohuda, saḷaku aid motuḻí kon yaat in gina.

¹³ Tuamai in potaau-Kudon kon Akuoi in mohukumbí kon Edom bo moḻimod kon bayongan in intau bo mahaḷuk kon tua. Sinangkub in butá tatua, nongkon kotá in Téman modapot kon kotá in Dedan, baḻíon-Ku moingongow totok; rayatnea in matoi kon poparangan.

¹⁴ Bangusa-Ku Israel in pakéon-Ku motuḻí kon yaat in gina kon Edom, bo Edom in pomiaan podudui in koḷoben in torú-Ku. Kotaauandon in Edom naonda in nanamnea aka kotugatan in torú-Ku. Akuoi ki Tuhan Inta Totok in moḷantud ain nosingog.”

Toḷanow kon pohukuman kon Pilistin

¹⁵ Ki Tuhan Inta Totok in moḷantud in noguman, “Intau mita in Pilistin ain notuḻí kon yaat in gina takin noḻingá kon musung mita monia bo noyopú kon i monia takin sakí in gina.

¹⁶ Tuamai in potaau-Ku kon Akuoi in monububí kon intau mita in Pilistin bo moyopú kon i monia. Batúan in intau inta kiagatnea kon butá in Pilistin in ḻimodon-Kubí.

¹⁷ Hukumon-Kubí in mosia kobogaton totok bo mopoaid in yaat in gina-Ku modapot in moorop. Aka konanamandon monia in torú-Ku, yo kotaauandon monia kon Akuoibí in ki Tuhan.”